အဋ္ဌမတန်းလို့ ရေးရပါသည်

ယူနီကုတ်မှာ ဋ္ဌ စာလုံးကအရေးရခက်ပါသည်။ တချို့ဖုန်းတွေမှာ ယူနီကုတ်နဲ့ ဋ္ဌ ရိုက်ရတာခက်တယ်လို့ပြောကြတယ်။ ကျွန်တော်ကတော့ ကွန်ပြူတာကနေသာ ရိုက်တယ်။

ဌ နဲ့ ဋ္ဌ မတူပါ။

ဋ္ဌ = ထဝမ်းဘဲ မဟုတ်ပါ။ အကိုးအကားတခု တင်ပြပါမယ်။

ဌဝမ်းဘဲ ဒါမှမဟုတ် ဌဝင်ဘဲမှာ လည်ရစ်မပါတဲ့ ဌဝမ်းဘဲနဲ့ လည်ရစ်ပါတဲ့ဋ္ဌ ဆိုပြီး နှစ်မျိုးရှိပါတယ်။

လုံးဆင့်ရေးနေရင် နေရာကျယ်မှာစိုးလို့ နှစ်လုံးပေါင်းပြီး အကျဉ်းချုံး ရေးပါတယ်။ အပေါ်က င လိုပုံစံလေးကတော့ နှစ်မျိုးစလုံး အတူတူဖြစ်တဲ့ အတွက် အဲဒီ င သဏ္ဌာန်လေးကို သူ့အတိုင်းယူပါတယ်။ ဋဆီကနေတော့ လည်ရစ်ကိုယူပြီး ဌ ဆီကတော့ ဟထိုးသဏ္ဌာန်လေးကို ယူလိုက်တဲ့အခါ ဋ နဲ့ ဌ နှစ်မျိုးပေါင်းထားတဲ့ ဋ္ဌအက္ခရာ ဖြစ်လာပါတယ်။

လည်ရစ်မပါတဲ့ ဌဝမ်းဘဲကတော့ ရိုးရိုးဌဝမ်းဘဲပါ။

အဲဒီလည်ရစ်ပါတဲ့ ဌဝမ်းဘဲ (ဋ္ဌ) ကိုပဲပါဠိလိုသံယုဂ်ပါတဲ့ ဌဝမ်းဘဲ လို့လည်းခေါ်ပါသေးတယ်။

ဌဝမ်းဘဲဟာ ဝေါဟာရတလုံးရဲ့ ရှေ့ဆုံးစာလုံး ဖြစ်နေရင်တော့ အဲဒီဌဝမ်းဘဲဟာ လည်ရစ် မပါဘူးဆိုတာ လုံးဝသေချာတယ်လို့ ဆိုနိုင်ပါတယ်။ ဥပမာအားဖြင့် ဌာနဆိုတဲ့ စကားလုံးဟာ လည်ရစ်မပါတာ သေချာပါပြီ။ ဌာနကနေ ဆင်းသက်လာတဲ့ ဌာန်ကရိုဏ်းမှာလည်း လည်ရစ် မပါပါဘူး။ ဌာပနာ ဆိုရင်လည်း လည်ရစ်မပါပါဘူး။ ဌာယိဘာဝ ဆိုရင်လည်း လည်ရစ် မပါပါဘူး။ ဥပါဒ်ဌီဘင် တို့မှာ သုံးတဲ့ ဌီဟာလည်း လည်ရစ်မပါပါဘူး။ ရာထူး ဌာနန္တရမှာ သုံးတဲ့ ဌာနန္တရမှာလည်း လည်ရစ်မပါပါဘူး။

ဌဝမ်းဘဲလည်ရစ်ပါတဲ့ စာလုံးတချို့ကို ပြောရရင်တော့ ဆဋ္ဌမ၊ အဋ္ဌမ၊ သမ္မာဒိဋ္ဌိ၊ ရှင်မဟာရဋ္ဌသာရ ၊ အဓိဋ္ဌာန်၊ သန္နိဋ္ဌာန်၊ ပြဋ္ဌာန်း၊ ပဋ္ဌာန်း စတဲ့ စကားလုံးတွေ ဖြစ်ပါတယ်။ အများကြီး ရှိပါတယ်။ (ကိုသိမ်းမြတ် အလင်္ကာပုလဲပန်း အစီအစဉ် ၁၈ ဇန်နဝါရီ ၂၀၁၈)

တရားစာမှာ စူဠကို စူ ဋ္ဌလို့ မှားရေးထားတယ်။ အသူရကာယ် လို့ ရေးရတယ်။ တိရစ္ဆာန်လည်း မှားနေတယ်။

တရားစာတွေမှာ သတ်ပုံမှားတာက ပိုပြီး တာဝန်ကြီးပါတယ်။ မကြာခဏ အမှားတွေ တွေ့နေရတယ်။ တခါတခါဆရာတော်ဘွဲ့အမည်တွေပါတယ်။ ဆရာတော် မှားသလို ထင်စေနိုင်တယ်။ တရားဆိုတာ ဘုရား ဟောတာ။ ဘုရား မှားသလို ထင်စေအောင် မလုပ်သင့်ကြပါ။

ကျောင်းသုံးစာအုပ် အမှားများအကြောင်း https://burmese-spelling.blogspot.com/.../blog-post_43.html

ဒေါက်တာတင့်ဆွေ