- အာရှမှာ မြန်မာကသာ အနိုင်ယူ ဗိုလ်ဆွဲ ရမည်
ဗိုလ်စွဲ နဲ့ ဗိုလ်ဆွဲ မတူပါ။
- တခါက ဥပဓိရုပ်လက္ခဏာကောင်းတဲ့လူကြီး တစ်ဦး(တဦး)ဟာ လက်စွဲပုံး(လက် ဆွဲ ပုံး) တစ်ဖက်(တဖက်) တံမြက်စည်းတစ်ဖက်(တဖက်)နဲ့ ဝေဘူရိပ်သာ (ဘာသာရေးစာဖြစ်တော့ သတ်ပုံပြင်ရမှာ အားနာ။ အကုသိုလ်တော့ မဖြစ်လောက်လို့ ထင်တယ်။ စွဲ နဲ့ ဆွဲ မှားနေတယ်။)
- စစ်ခွေးတွေက ကျနော်တို့ ယာကြီး ဘုန်းတော်ကြီးကျောင်းထဲမှာ တပ်ဆွဲပြီး ရွာထဲလူတွေကို သူတို့မထင်ရင် မထင်သလို ဝင်ဖမ်း ရိုက်နှက် ခေါ်စစ်ဆေးတော့ ရွာသားတွေက ကြောက်လှန့်ပြီး ရွာနဲ့နီးစပ်တဲ့တောတွေထဲ ရှောင်ပုန်းနေကြရတယ်။ (DVB)
တပ်စွဲလို့ ရေးရတယ်။ ကြောက်လန့်ပြီးလို့ ရေးရတယ်။ ခြောက်လှန့်၍ လန့်နေသည်။
- ဆရာရှင့် ကျေးဇူးပြု၍ စွဲ နှင့် ဆွဲ ကိုလဲ ခွဲခြား ရှင်းပြ ပေးပါလားရှင်။ ယခု face book မှာ တော်တော်များများ မှားနေကြပါတယ်။
ဆွဲဆောင့် ပစ်ချင်တယ်အစား စွဲဆောင့်၊ စွဲလမ်းအစား ဆွဲလမ်းလို့ရေးနေကြပါတယ်။
- ဆရာရှင့် အသက်က ၂၇ နှစ်ပါ။ ဆေးကို အကြာကြီးဆွဲသောက်သင့်ပါသလား။
ဆေးကို ဆရာဝန်ညွှန်တဲ့အတိုင်း စွဲစွဲမြဲမြဲသောက်ပါ။ အချိန်မဆွဲပါနှင့်။
- ကြိုက်တဲ့အစာတွေ့တော့ စွဲပြီ။
သည်ဆိုင်ကအစားအစာတွေကို စွဲနေပြီ။ ဘန်းစကားဆိုရင် စားတော့မယ်ကို ဆွဲပြီ။
- သူငယ်ချင်းနဲ့ ငြင်းနေတာဆရာ ကျွန်တော်က (အထုပ်ဆွဲ) သူက(အထုပ်စွဲ) အဖြေမှန် သိချင်လို့ ကျေးဇူးပါဆရာ။
အကိုက်အခဲပျောက်ဆေး စွဲနေသည်။ အပြန်မှာ ခေါက်ဆွဲတထုပ် ဆွဲခဲ့ပါ။
- BBC Burmese ကရင်ပြည်နယ်၊ မြဝတီမြို့တောင်ဘက်က ငြိမ်းချမ်းရေးမြို့ လေးကေ့ကော်မှာတပ်ဆွဲထားတဲ့ စစ်ကောင်စီတပ်တွေ
တပ်စွဲလို့ ရေးရ။
- ဆရာရှင့် ကျေးဇူးပြု၍ စွဲ နှင့် ဆွဲ ကိုလဲ ခွဲခြား ရှင်းပြ ပေးပါလားရှင်။ ယခု face book မှာ တော်တော်များများ မှားနေကြပါတယ်။
ဆွဲဆောင့် ပစ်ချင်တယ်အစား စွဲဆောင့်၊ စွဲလမ်းအစား ဆွဲလမ်းလို့ရေးနေကြပါတယ်။
- ဆရာရှင့် အသက်က ၂ရနှစ်ပါ။ ဆေးကို အကြာကြီးဆွဲသောက်သင့်ပါသလား။
ဆေးကို ဆရာဝန်ညွှန်တဲ့အတိုင်း စွဲစွဲမြဲမြဲသောက်ပါ။ အချိန်မဆွဲပါနှင့်။
စွဲ
စွဲချက်တင်
စွဲငြိနေပြီ
စွဲစွဲမြဲမြဲ
စွဲလန်း
စိတ်ထဲမှာစွဲနေ
ဆေးစွဲနေသည်
တပ်စွဲထားသည်
တရားစွဲ
နိုင်ငံရေးအစွဲ
ဘာသာရေးအစွဲ
ရောဂါစွဲကပ်နေသည်
အတပ်စွဲသည်
အသည်းစွဲ
ဆွဲ
ကမ္ဘာမြေကြီးဆွဲငင်အား
ကြိုက်သလောက်သာ ဆွဲပေတော့။
စွဲလမ်းတမ်းတပို ရွှေရင်အသဲထဲမှာလှိုက်ဖို မောင့်မမငြိမ်းကို (ဝင်းဦးသီချင်း)
ဆွဲ၍လိမ်သည်
ဆွဲကြိုးချသေဆုံး
ဆွဲကြိုးတန်ဆာ
ဆွဲကိုင်သည်
ဆွဲချိတ်ရှိသလား
ဆွဲချိန်ခွင်
ဆွဲချိုင့်နဲ့ ထမင်းဝယ်လာ
ဆွဲခြင်းနဲ့ စျေးသွား
ဆွဲငင်သည်
ဆွဲဖြတ်သည်
ဆွဲမီးအိမ်
ဆွဲအံ (အံဆွဲ)
ဆေးစွဲနေသူတွေကို ရဲကလာဆွဲသွားသည်။
ဆေးစွဲပြီးသောက်ပါ။ အချိန်ဆွဲမနေပါနှင့်။
တပ်စွဲထားသည်။ စစ်ပွဲကို အချိန်ဆွဲပြီးမတိုက်ပါနှင့်။
တုတ်ဆွဲ ဓါးဆွဲ
ဒီဆိုင်မှာ စွဲစွဲမြဲမြဲစားပါတယ်။
နတ်အုန်းသီးဆွဲထားသည်
နားသန်သီးဆွဲထားသည်။ ဆွဲကြိုးလည်းပါ၏။
နေ့ခင်းမှာ ဆိုက်ကားဆွဲ၏။
ပြိုင်ပွဲတွင် ပဌမစွဲ၏။
မှိုင်းစွဲနေတဲ့ လက်ဆွဲမီးအိမ်ကို ချိတ်ဆွဲထားသည်။
မီးပုံးဆွဲထားသည်
မုံ့တပွဲလောက် ဆွဲခဲ့ပါ။
ရန်ကုန်နှင့် နေပြည်တောာ်ကား ကားဆွဲနေသည်။
လွန်ဆွဲပွဲမှာ ဆေးစွဲနေသူတွေဘက်က ရှုံး၏။
အချိန်ဆွဲကစားနေသည်
အစွဲအလမ်းကြီးမားသူ။
ဗိုလ်ကေတထောင်မှာ တယောက်လောက်တော့စွဲကောင်းပါရဲ့ ကျွဲမ ကျွဲမ ကျွဲမ အသားညို
ကျွဲမသီချင်းကို နန်းတော်ရှေ့ဆရာတင်ကရေးပြီး မကြည်အောင်က စတင်ဆိုခဲ့ပါတယ်။ ခုခေတ် ပြန်ဆိုသီချင်းတွေရဲ့ နောက်ခံစာသားမှာတော့ သတ်ပုံအမှန်အတိုင်း မရေးတတ်ကြပါ။ မန်ကျည်းမှား၊ တထောင်မှား၊ တယောက်မှားကြတယ်။ တယောက်လောက်တော့(ဆွဲ)ကောင်းပါရဲ့လို့ ရေးရင်တော့ ရဲကလာဆွဲသလား၊ ဆွဲလားရမ်းလားလုပ်သလားလို့ ဆိုလိုရာရောက်ပါမယ်။
ကျွဲမ
ကျွဲမကြည်အောင် ဆရာနန်းရှေ့ရဲ့ တပည့်အရင်းပါအစ်ကို ကျွန်မကိုခင်ရင် မမြင်ချင်ပါနဲ့ အိုမကြည့်ချင်ပါနဲ့ ဥပမာပြောမယ် ကျွန်မပုံကို အာပုံသည်လုပ်တဲ့ ကုလားမလေးရဲ့ မန်ကျည်းငုတ်တို
ဗိုလ်ကေတထောင်မှာ တယောက်လောက်တော့စွဲကောင်းပါရဲ့ ကျွဲမ ကျွဲမ ကျွဲမ အသားညို
ကျွန်မဓါတ်ပုံကိုပြရန်မလို ထမင်းအိုးဖင်ကိုကြည့်တော်မူပါအစ်ကို ကျွန်မဓါတ်ပုံကိုပြရန်မလို ထမင်းအိုးဖင်ကိုကြည့်တော်မူပါအစ်ကိုလို့
ညည်းနဲ့မတန်ပေါင်ဆိုချင်ဆို အသားလတ်လတ်နဲ့သူကိုသာ ယူချင်တယ်အစ်ကို
ဗိုလ်ကေတထောင်မှာ တယောက်လောက်တော့စွဲကောင်းပါရဲ့ ကျွဲမ ကျွဲမ ကျွဲမ အသားညို
မူရင် ခရာရင် ယောကျ်ားတိုင်းက ချစ်တယ်ဆို မူရင်ခရာရင် ယောကျ်ားတိုင်းက ချစ်တယ်ဆို ကြည်အောင်ကျွဲမခင်ပျို
နွဲ့နွဲ့နွဲ့ နွဲ့လိုက်မှာပဲ ထင်သလို ထင်သလို ပိုက်ကျုံးထက်ကရွှံ့ဗွက်တွေထဲ ကျွဲမလေးကြည်အောင် မောင်ခေါ်စမ်းကို ခေါ်စမ်းကို အရုပ်ဆိုးမလေး အားငယ်တယ်အစ်ကို အများနဲ့မတူတဲ့ အပျို အပျို အပျို အပျို ကျွန်မနဲ့ညားရင် မောင်အားငယ်မှာစိုးသကို
ဗိုလ်ကေတထောင်မှာ တယောက်လောက်တော့၊ တယောက်လောက်တော့ စွဲကောင်းပါရဲ့ ကျွဲမ ကျွဲမ ကျွဲမ အသားညို။ ။
အာပုံမုံ့လုပ်နည်း တင်ထားတာမှာလည်း သတ်ပုံတွေ အတော်လွဲနေတယ်။ အစာပြေတဲ့။ အဆာပြေလို့ ရေးရတယ်။ ချိုစိမ့်ပြီတဲ့။ ချိုဆိမ့်ပြီးလို့ ရေးရတယ်။ သီချင်းတွေ ဘယ်လောက်ကောင်းကောင်း၊ အဆိုအကတွေ ဘယ်လောက်ကောင်းကောင်း၊ စားစရာတွေ ဘယ်လောက်ကောင်းကောင်း ရေးသားတဲ့စာတွေ သတ်ပုံမမှန်ရင် ဘာတခုမှ ကြည့်မကောင်းတော့ပါ။
မြန်မာစာ ကျွဲမထက် အသား ညို ရရှာပြီ။ အခုမှတ်ချက်က မြန်မာလိုရေးတာဖြစ်လို့ အသားအရောင်ကို ထည့်ပြောရတယ်။ ကန်တော့ + ဆောရီး။ နိုင်ငံတကာအသုံးမှာ အသားအရောင်မခွဲခြားရပါ။ ကျွန်တော်တို့ တိုင်းပြည်မှာတော့ အမှန်နဲ့ အမှား မခွဲခြားရသလို ဖြစ်နေပြီ။
ဒေါက်တာတင့်ဆွေ
Comments
Post a Comment