မဟာမင်းလှမင်းခေါင်ကျော်၏ အတ္ထုပ္ပတ္တိ

ငယ်မည်ကား ဦးရွှန်းတည်း။ ဦးရွှန်း၏ ဖွားရာဇာတိကား အဝမြို့တွင်းမှာ ဖွားသတည်း။ ၎င်းနောက် အမရပူရမြို့ နန်းတော်အနောက်တောင်ထောင့်ရွှေလင်းပင်ဘုရားအနီးမှာ အာဝါသပြုလုပ်၍ အမှုတော်ထမ်းရသတည်း။ ထိုဦးရွှန်းမှာ ရတနာပူရ စတုတ္ထမြို့တည် ဘကြီးတော်လက်ထက် ဘွဲ့ငါးရပ်ဖြင့် ချီးမြှင့် သည်ကို ခံရသတည်း။ ထိုဘွဲ့ငါးရပ်တွင် နောက်ဆုံးဘွဲ့မှာ မဟာမင်းလှမင်းခေါင်ကျော် ဟူ၍ခံယူရသတည်း။ ရာထူးကား ဆီမီးခုံရွာ သာထွန်းရွာ ငနန်းရွာ မြစ်ကိုင်းရွာများကို ရွာစား အသနားတော်ခံရကာ ပညာရှိအရာ ခန့်ထားသည်ကိုလည်း ခံရသတည်း။ ၎င်းပြင် လက်ရုံးဘက်မှာလည်း လိမ္မာကျွမ်းကျင် သတ္တိ ဗျတ္တိ ရှိသောကြောင့် ပုဂံမြို့ဝန်အရာ ပုဂံစီရင်စုအတွင်း သေနတ်ဗိုလ်အရာများကို ခန့်ထားသူကောင်းပြုခံရသူလည်းဖြစ်သည်။ ပညာရှိမျိုး ရိုးရာ ဆင်းသက်အပ်သော အဌကုလိကာ အမတ်မျိုးလည်း ဖြစ်သတည်း။ ၎င်းဦးရွှန်း၏ အဘကား လေးထပ် ရွှေကျောင်းတော်ကြီးနှင့်တကွ ဘုရားကြီး ဒါယကာ သူရမနုဘွဲ့ခံ လွှတ်တော်အမိန့်ရပေတည်း။ ၎င်းဦးရွှန်း၏ ဘိုးကား အဝဆင်ဖြူရှင်လက်ထက်တွင် အနောက်ဘက်တိုက်ဝန် ပုခန်းကြီးမြို့စား မင်းကြီးမဟာရာဇသင်္ကြံ ပေတည်း။ ရတနာပူရ စတုတ္ထမြို့တည် ဘကြီးတော်မင်းတရား နန်းက ဆင်းတော်မူပြီးနောက် ရွှေဘိုမင်းတရား လက်ထက်သို့ရောက်သည့်အခါမှာလည်း မဟာမင်းလှမင်းခေါင်ကျော်ဘွဲ့နှင့် ပညာရှိစာဆိုအရာနှင့်တကွ သားမယားအခြွေအရံများပါ ဝတ်စားနေထိုင်ရေးအတွက် ဆက်လက် သူကောင်းပြုသည်ကို ခံရသတည်း။ 

ရွှေဘိုမင်းသားတော် ပုဂံမင်းလက်ထက်မှာလည်း ရွှေဘိုမင်းနည်းပင်ချီးမြှင့် သူကောင်းပြုသည်ကို ခံရသတည်း။ 

ထိုဦးရွှန်း၏ဖွာနှစ်ကား ကြတ္တိကာနှစ်အမည်ရှိသော ၁၁၂၇ ခု နှစ်ဖွားတည်း။ ၎င်းဦးရွှန်း၏ ကွယ်လွန်သောနှစ်မှာ သေချာစွာမသိနိုင်။ စပ်ဆိုင်ဆီလျော်ရာ ယူလိုက ၁၂၁၁ ခုနောက်မှကွယ်လွန်သည်ဟူ၍ယူနိုင်သော သဘောလမ်း ဖြောင့်တန်းသတည်း။ အကြောင်းမူကား စာဆို ပညာရှိများစာရင်းအတွင်း ပုဂံမင်းလက်ထက်မှာသာ ဦးရွှန်း အမည်ပါရှိ၍ ပဉ္စမသင်္ဂါယနာတင် မင်းတရားကြီး လက်ထက် ပညာရှိစာဆိုသူတို့စာရင်းတွင် ဦးရွှန်းအမည် ရှာမတွေ့၍ ဖြစ်သတည်း။ 

၎င်းပြုစုသော ဥမ္မာဒန္တီပျို့ အပါအဝင် ရတု ဧချင်း ပျို့ ကျမ်းမှာ ၁၆ စောင်ရှိသတည်း။ 

၁။ တောင်ငူဆိုရတုအဖြေ

၂။ ဘကြီးတော်၏သားတော်နားတော်သွင်း ဧချင်း

၃။ ၎င်းသမီးတော်ဧချင်း

၄။ မဟာသုတသောမပျို့

၅။ မဟော် ဥမင်ခန်းပျို့

၆။ မဟော်ပြဿနာခန်းပျို့

၇။ သရဘင်္ဂပျို့

၈။ အာယုဒီဃ ဆေးကျမ်းလင်္ကာ

၉။ မဟာသာမဗေဒဋီကာ

၁၀။ တဘက်ပြသတ်ပုံ

၁၁။ ဘုရားတိုင်အတွက် ရတု

၁၂။ အဘိဓမ္မတ္ထသင်္ဂြိုဟ် ဘုံစိတ်အကျဉ်းရတု

၁၃။ ဂါမဏိစန္ဒပျို့

၁၄။ မဟာဇနက္ကပျို့

၁၅။ ဥမ္မယဒန္တီပျို့

၁၆။ ဓမ္မဓဇပျို့

ဥမ္မာဒန္တီပျို့ မှ ထုတ်နှုတ်ပါသည်။ (Myint Swe) ဆီမီးခုံ အ.ထ.က ကျောင်းသူ/ကျောင်းသားများ ကျေးဇူး။ 

ဆီမီးခုံမြို့သည် မြင်းခြံမြို့နယ်ရှိ မြို့ဖြစ်သည်။ ယခင်က ဆီမီးခုံကျေးရွာဖြစ်ပြီး ၂၀၁၈ခုနှစ် ဩဂုတ်လ ၁၀ရက်နေ့တွင် မြို့အဖြစ် တိုးချဲ့ဖွဲ့စည်းခဲ့သည်။ ဆီမီးခုံဟုဆိုသော်လည်း ဆမိတ်ခုံဟု ခေါ်ဝေါ်ကြသည်။

ဒေါက်တာတင့်ဆွေ