The Tropic of Cancer Pass မြောက်ယဉ်စွန်းတန်း အမှားပြင်ထားပြီး

မှန်အောင် ပြင်ပေးထားသူ ကွန်ဂရက်ကျူလေးရှင်း။

၁၆-၆-၂၀၁၇ နေ့ စတွေ့ကတည်းက မှားရေးထားတာကို ထောက်ပြခဲ့ပါတယ်။ ဆိုင်းဘုတ်ဟာ မြန်မာနိုင်ငံ ကလေးမြို့နားမှာရှိတဲ့ မြောက်ယဉ်စွန်းတန်းဖြတ်ရာနေရာဖြစ်ပါတယ်။ ကျောက်ပြားမှာ The Tropical Cancer Pass Here လို့ ရေးထားတာ မှားနေတယ်။ မြန်မာလို အမှားနဲ့ အင်္ဂလိပ်လို အမှား။

ယဉ်စွန်းတန်းမှာ ရေးချမပါရပါ။ ယာဉ်ဆိုတာ သွားလာစရာယာဉ်။ အင်္ဂလိပ်လို မှားနေတာကို သိအောင် အိန္ဒိယနိုင်ငံ အနောက်ပိုင်း ဂူဂျရတ်ပြည်နယ်ကဆိုင်းဘုတ်ကိုပါ ယှဉ်ပြပါတယ်။ 

မြောက်ယဉ်စွန်းတန်းကို Tropic of Cancer လို့နဲ့ တောင်ယဉ်စွန်းတန်းကို Tropic of Capricorn လို့ ရေးပါတယ်။ Cancer နဲ့ Capricorn တို့ဟာ ဆယ်နှစ်ရာသီခွင် အမှတ်အသားတွေဖြစ်ကြတယ်။ Cancer ဆိုတာ ပုစွန်လုံး (ကရကဋ်) နဲ့ Capricorn ဆိုတာ (မကရ) ဆိတ်ရုပ်ဖြစ်တယ်။

ကမာ္ဘကြီးဟာ ၂၃့၅ ဒီဂရီစောင်းပြီး လည်နေရင်း နေကို တနှစ်မှာတပတ်ကျ လှည့်ပတ်နေတာမှာ ကမာ္ဘပေါ် နေတည့်တည့် ဖြတ်သန်းရာစက်ဝိုင်းမျဉ်း ၂ ခုရှိပါတယ်။ Tropic of Cancer မြောက်ယဉ်စွန်းတန်း စက်ဝိုင်းမျဉ်းဟာ မြောက်လတ္တီတွတ်  ၂၃့၅ ဒီဂရီမှာဖြစ်တယ်။ နှစ်စဉ် ဇွန်လ (၂၁) ရက်နေ့ မွန်းတည့်ချိန်မှာ နေနဲ့တည့်တည့် ကျရောက်တယ်။ Tropic of Capricorn တောင်ယဉ်စွန်းတန်းကတော့ တောင်လတ္တီတွတ်  ၂၃့၅ ဒီဂရီမှာဖြစ်တယ်။ နှစ်စဉ် ဒီဇင်္ဘာလ (၂၁) ရက်နေ့ မွန်းတည့်ချိန်မှာ နေနဲ့တည့်တည့်ကျရောက်တယ်။

နာမည်ပေးခဲ့တာက နှစ်ပေါင်း ၂ဝဝဝ ကြာပါပြီ။ ယနေ့ခေတ်မှာ အရင်ကထက်တိတိကျကျ တိုင်းတာလာနိုင်ပြီဖြစ်လို့ အရင်သတ်မှတ်ချက်တွေ နည်းနည်းလွဲနေတာသိလာရတယ်။ နာမည်ကိုတော့ မပြောင်းပါ။ Tropic of Cancer မြောက်ယဉ်စွန်းတန်းနေရာဟာ တသမတ်တည်းမကျပါ။ မြန်မာနိုင်ငံ ချင်းပြည်နယ်၊ စစ်ကိုင်းတိုင်း၊ မန္တလေးတိုင်းနဲ့ ရှမ်းပြည်နယ်တွေကိုဖြတ်သန်းတဲ့ စိတ်ကူးယဉ်စက်ဝိုင်းမျဉ်း မြောက်ယဉ်စွန်းတန်းဟာ 23°26′N 93°23′E ဖြစ်ပါတယ်။

၂ဝ၁၆ ခုနှစ် မတ်လ (၂၈) ရက်နေ့တုံးက Tropic of Cancer မြောက်ယဉ်စွန်းတန်း စက်ဝိုင်းမျဉ်းဟာ မြောက်လတ္တီတွတ် 23°26′13.8″ (23.43718°) မှာကျရောက်ခဲ့ပါတယ်။

အင်နယ်လ်ဒီအစိုးရလက်ထက် စစ်ကိုင်းတိုင်းအစိုးရဆီကို ပြင်သင့်ပါကြောင်း စာတစောင်ရေးသားပို့ခဲ့တယ်။ ပြင်ဖြစ်၊ မပြင်ဖြစ် မသိပါ။ အခုတော့ မိတ်ဆွေဆရာဝန်တဦးက အမှန်အတိုင်းရေးထားတဲ့ ကျောက်ပြားပုံ တင်တာတွေ့တယ်။ ကျေးဇူး။ 

Here စာလုံးထည့်တာတော့ လွဲနေသေးတယ်။ Pass က ဒီနေရာမှာ နာမ်။ is passing here လို့ရေးရင် မမှားပါ။

အဲလိုဘဲ မှားနေတာတွေကို အခုပြင် အခုမှန်ပါတယ်။ ပြင်စရာတွေကတော့ တိုင်းပြည်နဲ့အဝှမ်း အများကြီး။ စေတနာနဲ့ ပညာလိုတယ်။ ကင်ဆာဆေးနည်းတွေ ပေးကြသလို စေတနာတခုတည်းတော့ အမှန်မရပါ။ စိတ်တော့ရှည်ရမယ်။ အခွင့်အခါ သာရမယ်။

အဖြူရောင် ကျောက်ပြား မပြင်ရသေးဘူးထင်တယ်။

ပြင်စရာတွေ တတိုင်းတပြည်လုံးမှာ အများကြီးကျန်သေးတယ်။

ဒေါက်တာတင့်ဆွေ