Tilapia တီလားပီးယားငါး

- ဇလားဘီးယား ငါးခြောက်လေးတွေ ရပါမယ်ရှင့် (ပုံအတွက် ကျေးဇူး။)

- အင်းလေးဆလားဗီးငါးခြောက် ခေါ် ကျောက်ငါး

- ဒေသခံတွေ အတတ်နိုင်ဆုံးရှောင်တဲ့ငါးပါ။ ကျောက်ငါးလို့လည်းခေါ်ပါတယ်ဆရာ။ သွေးအရမ်းတိုးတယ်လို့ ပြောလို့ မစားရဲခဲ့ဘူးဆရာ။

အစားအသောက်တွေကို သွေးတက်တယ်၊ အကြောတက်တယ်လို့ ပြောကြတယ်။ ပြောသလို မဟုတ်တာက အဆမတန်များနေတယ်။ တမာရွက်၊ တညင်းသီး စတာတွေက သွေးတက်တယ်ပြောခြင်းဟာ တို့စရာနဲ့ တွဲစားတဲ့ငန်ပြာရည်ကြောင့်။

တီလားပီးယားငါး ကောင်းပါတယ်။ vitamin B12 ပါတာများတယ်။ Phosphorus ဖေါ့စ်ဖါးရပ်စ်ပါတာလည်း ကောင်းတယ်။ အဆီဓါတ်ပါတာ နည်းတယ်။ salmon ဆယ်လ်မွန်နဲ့ tuna ကျူနာငါးတွေလောက်တော့ tilapia ငါးမှာ omega-3 fat မများပါ။

အားနည်းချက်လည်း ရှိတယ်။ ဘက်တီးရီးယား၊ ပါရာဆိုက်နဲ့ ပိုးသတ်ဆေးတွေနဲ့ ထိတွေ့မှု များနိုင်တယ်။ မွေးမြူရေးလုပ်သူတွေက သတိထားကြတာမှန်ရင် စိုးရိမ်စရာ မရှိပါ။

တီလားပီးယားငါးရဲ့ ချိုတဲ့အရသာကို ဆယ်လ်မွန်နဲ့ ကျူနာငါးတွေထက် ပိုကြိုက်တယ်။ မြန်မာပြည်မှာသာရတဲ့ ငလူးခေါင်ချွန်းအရသာကိုလည်း အမေရိကန်နဲ့ ကနေဒါငါးတွေထက် ကြိုက်တယ်။ နယူးဒေလီ မြောင်းဘေး ငါးဈေးကနေ တခါတခါ ငလူးခေါင်ချွန်းရတယ်။ ညကအိမ်မှာ မကားရဲငါး ပေါင်းတယ်။ ကောင်းတယ်။ 

ဒီမှာရတဲ့ တီလားပီယားငါး အကြီး-အသေး-အလတ်တွေ ကောင်းပါတယ်။ ငပိချက်နဲ့တွဲမစားရင် သွေးတိုး မတက်ပါ။

တီလားပီးယားငါးကို မြန်မာပြည်မှာ စပြီးမွေးမြူကြဘို့ ဆော်သြတာက မဆလ ထက်ထက်စောစောပိုင်းက။ ရှေ့သို့စာစောင်မှာ ဆောင်းပါးတွေတင်တယ်။ ငါးမွေးကန်တွေ ဖြစ်လာတယ်။ စီးပွါးလည်း ဖြစ်တယ်။

ဆလားဗီးယားလို့ ရေးရင် အဲဒီခေတ်က ယူဂိုဆလားဗီးယားနိုင်ငံနဲ့ ရောထွေးလိမ့်မယ်။ မဆလ လက်ထက်မှာ လက်ဝဲနိုင်ငံတွေကသာ အဖက်လုပ်တယ်။ ထွန်စက်ဆိုလည်း ယူဂိုဆလားဗီးယားက။ ကြေးနီစီမံကိန်းကလည်း ယူဂိုဆလားဗီးယားနဲ့ စခဲ့တာ။ နောက်မှာ ကနေဒါ။ နောက်ဆုံးက တရုပ်။ 

Tilapia fish ငါးဟာ ခြင်လောက်လန်းလေးတွေကို စားတယ်။ ငှက်ဖျားတိုက်ဖျက်ရေးအဖြစ်သုံးဘို့ သုတေသနတွေလုပ်တယ်။ နိုင်းမြစ်မှာ ငှက်ဖျားခြင်းနှိမ်နင်းရေး လုပ်တယ်။

တီလားပီးယားငါးကို အင်္ဂလိပ်စာလုံးရော အသံထွက်ပါ တင်ပြသေးတယ်။ အရပ်ခေါ်တွေက နှုတ်ကျိုးနေပြီ။

ဘယ်အရာမဆို အမည်စာလုံးပေါင်း၊ အသံထွက် မလွဲအပ်ပါ။ မှားနေတာကို ပြင်လို့ရရင်လည်း ပြင်ကြပါ။ ပြင်ရတော့ ခက်မယ်။ ဝယ်တဲ့သူတွေက အမှန်ကိုမသိကြတော့ ရောင်းရ ခက်မယ်။

ဒေါက်တာတင့်ဆွေ