လူ လူချင်း လူလိုမြင်၍ လူလိုနေခဲ့ရခြင်း
၁၉၄၈ ခု၊ ဇန်နဝါရီလ (၄) ရက်နေ့ မနက် ၄ နာရီလောက်မှာ ကျနော်တို့အိပ်ရာက ထကြရပြီး အဖေက ရေနွေး ဆန်းလိုက်ဆပ်ပြာနှင့် ရေချိုးပေး၊ အင်္ကျီပုဆိုးသစ်ဝတ်ကြရ၏။ မှောင်နေသေးသော်လည်း လမ်းပေါ်မှာ လူတွေသွားလာနေကြပြီ။ “ကျိုက်ထီးရိုး ဘုရာဖူးများ အခမဲ့တည်းခိုဆောင်" မှာ ဗမက အဖွဲ့က သက်သတ်လွတ် ထမင်းကျွေးရာ လူကြီးများနှင့်အတူ ဝင်စားကြရ၏။ သူကြီးကတော် မမနွဲ့က အမိမြန်မာပြည် အဖြစ်ပြည်ထောင်စုအလံကိုင်၊ စည်တော်ရွမ်းကာ စည်းတန်းလှည့်လည်ရာ တရွာလုံးလိုက်ပါကြ၏။ ကျောင်းတက်ရသော်လည်း လွယ်အိပ်ယူမသွားရ၊ စာမသင်ရ၊ ဆရာကြီး ဦးအုန်းမောင်က လွတ်လပ်ရေးနေ့အကြောင်း ရှင်းပြသည်။ စေတနာ့ဝန်ထမ်း အင်္ဂလိပ်စာပြဆရာ ဦးဘရွှေပြောပြသည့် “အမေရိကန်နိုင်ငံမှာ ဆင်ရဲသား တောသား အီဗရာဟင် လင်ကွန်း သမတဖြစ်လာပုံ" ခေါင်းထဲစွဲနေ၏။ ကျောင်းဆင်း၍ မုန့်ဝယ်စားတော့ မုန့်သည်တွေက နေပါစေဆိုကာ ပိုက်ဆံမယူကြ၊ အံ့ကိုသြရော။
၁၉၅၃ ခု၊ တက္ကသိုလ်ဝင်စာမေးပွဲအောင်တော့ ကိုယ်ပိုင်ပိုက်ဆံ ၂ ကျပ်။ ၃ မူးတပဲသာရှိ၊ မိဘကလည်း တပြားမှမကူနိုင်၊ MCFT ၏ဆင်းရဲနွမ်းပါးသူများ ပညာသင်နိုင်းရေး အထောက်အပံ့နှင့် ရန်ကုန်တက္ကသိုလ်တက်ဘွဲ့ရပြီး၊ ဆင်ရဲသား တောသား ဝင်းအောင်ကြီးလည်း အမေရိကန်ရောက်နေသည်မှာ နှစ် ၂၀ ကျော်နေပြီ။
အာဖရိကတိုက်က လူမည်းတွေကို ကျွန်လုပ်ထားသည်ကို၊ အီဗရာဟင် လင်ကွန်း သမတဖြစ်လာတော့ အဆုံးသတ်လိုက်သည်။ လူဖြူများနှင့် တန်းတူနေလာခဲ့ကြရာ ယခုအခါ လူမည်း အိုဘားမားသမတဖြစ်နေပြီ။
မြန်မာပြည်တွင် အရပ်သား ဦးထင်ကျော် သမတဖြစ်လာ၍ ပျော်နေကြသည်များကို မြင်ရတော့ ပထမဆုံး လွတ်လပ်ရေးနေ့က ပျော်ခဲ့ဖူးသည်ကို၊ အီဗဟရာဟင် လင်ကွန်းကို အားကျဖူးပုံ ပြန်သတိရမိ၏။ လူလူချင်း လူလိုမြင်သော အီဗဟရာဟင် လင်ကွန်းကြောင့် အမေရိကန် ကမ္ဘာ့ထိပ်တန်းနိုင်ငံဖြစ်လာခဲ့၏။ သမတ ဦးထင်ကျော်မှာ ဆေးကြိမ်လုံးမရှိ၊ နတ်ရေကန်မရှိလို့ ခက်ချင်ခက်နေမည်။ သို့သော်လည်း လူလူချင်း လူလိုမြင်သောခေတ်က မြန်မာပြည်လည်း ထိပ်တန်းနိုင်ငံဖြစ်ခဲ့ဖူသည်ကို သတိရရင်း အားတက်မိကြောင်းပါ။
၂၀၁၆ ခု၊ မတ်လ ၃၀ ရက်။
မှတ်ချက် - မောင်အောင်မွန်သည် အဖြစ်မှန်တွေလည်းသိတော့ အမှန်တွေ ရေးပါသည်။ ထိုအထဲတွင် စာလုံးပေါင်းသတ်ပုံလည်း ပါသည်။ တရွာလုံး၊ ၃ မူးတပဲ၊ တပြားမှမကူနိုင်လို့ ရေးသည်။ လွယ်အိပ်ယူမသွားရကို လွယ်အိပ်မယူသွားရလို့ မရေးပါ။
ဒေါက်တာတင့်ဆွေ
Comments
Post a Comment