(၁) မိမိ၏အဖြစ်အပျက်အခြေအနေတို့ကို ရေရေလည်လည်ဖော်ပြသဖြင့် "ဘောလယ်"။
(၂) ဘောလယ်မြို့စားမင်းသမီးရေး၍ "ဘောလယ်"။
(၃) ကနောင်မင်းသား၏သဘောထား လှိုင်ထိပ်ခေါင်တင်အပေါ် ပြန်၍လည်လာစေသောကြောင့် "ဘောလယ်"။
(၄) ဘောလယ်မြို့တွင် စတင်၍ လှိုင်မင်းသမီးရေးဖွဲ့သောကြောင့် "ဘောလယ်"။
(၅) ဘဝ၏တက်သက်စုန်ဆန် ပြန်လှန်လှည့်ပတ်မှုကို ဖွဲ့ဆို၍ "ဘောလယ်"။
(၆) တင့်တယ်သောသဘောရှိ၍ "ဘောလယ်"။
ယခု 'ဘောလယ်' ဟူသောဝေါဟာရနှင့်စပ်လျဉ်း၍ ကျွန်တော်၏ထင်မြင်ယူဆချက်ကို တင်ပြပါမည်။ သီချင်းများသည်အများအားဖြင့် တောနယ်ကျေးရွာများတွင် စတင်မြစ်ဖျားခံလေ့ရှိပါသည်။ သို့ဖြစ်ရာ ဘောလယ်ကဗျာသည်လည်း ဘောလယ်တောနယ်မှ သီဆိုပေါ်ပေါက်လာသော တေးသီချင်းမျိုးဖြစ်တန်ရာ၏။
- ရွှေဘိုမြို့မြောက်ဘက်အရပ်တွင် သီဆိုကြသောကြောင့် "မြောက်ဘက်သံလွမ်းချင်း" ဟုခေါ်ကြ၏။
- မြေလတ်ပိုင်းဖြစ်သောတောင်တွင်းနယ်မှ စတင်သီဆိုပေါ်ပေါက်လာသော သီချင်းကိုမူ "မြေလတ်သံ"ဟုခေါ်ကြ၏။ အလားတူပင် ဒေသကိုစွဲ၍ခေါ်သော "ကောင်းတုံသံ"၊
- "ကျောက်တလုံးသံ" စသည်များသည်လည်း ထင်ရှားရှိနေပေသည်။ ထို့ကြောင့် ဘောလယ်အရပ်မှစတင်သီဆိုကြသော သီချင်းဖြစ်၍ ထိုသီချင်းကို "ဘောလယ်သံ" ဟုခေါ်သည်ဟု ကျွန်တော်ယူဆပါသည်။
ဤဘောလယ်သီချင်းကို လှိုင်ထိပ်ခေါင်တင် စတင်တီထွင်ရေးသားသည်ဟု "မြန်မာစာပေသမိုင်း" နှင့် "ကဝိဘာရတီ" ကျမ်းများတွင်ဆိုသည်။ အမှန်စင်စစ် ဤအယူအဆမှာ မှားယွင်း၍နေပေသည်။ အကြောင်းမူကား ဘောလယ်တေးသွားများသည် လှိုင်ထိပ်ခေါင်တင်ခေတ်မတိုင်မီ ရှေးအထက်ကတည်းကပင် ရှိခဲ့ပေသည်။ ထိုဘောလယ်များ၏စာသားများကိုလည်း နိုင်ငံတော်မူမဟာဂီတ၊ ဒုတိယတွဲ စာမျက်နှာ ၁၅ နှင့် ၁၆ တွင်ဖော်ပြထားပေသည်။ (ဆရာကြီးဦးမြင့်ကြည်၊ မြန်မာတေးဂီတ အနုစာပေသမိုင်း)
ကျောက်တလုံးသံစာလုံးကိုတွေ့လို့ ကူးယူတင်ပြပါတယ်။ စာရိုက်တာကိုသာ ပြင်စရာ တချို့ ပြင်ပါတယ်။ ကျေးဇူး။
ဒေါက်တာတင့်ဆွေ
Comments
Post a Comment