ခုရိုက် ခုတင် တဲ့။
ခုတင်ဆိုတာ မှားရေးထားတဲ့ ခုခေတ် ဆေးရုံဆိုင်းဘုတ်။
မယ်ခွေ ရည်းစား ဆေးလိပ်ထောင်ခဲ့လို့မရ။
ကုတင်နဲ့ ခုတင် မတူပါ။
ခုတင် = ခံတင်
ထိုသည့်ရှေ့က၊ ထားလေ့တသွယ်၊ ခုတင်ငယ်ကား၊ နံလျားတောင်စွင့်၊ အမြင့်နှစ်မိုက်။ (ကုသပျို့)
ခုတင်က (ကြိဝိ) = မကြာသေးမီအတွင်းက၊ ခုနက။ ခုတင်က လန့်သည်မှာ မိမိတို့ဆင် လန့်သည်မဟုတ်လား။ (ဝံသ)
ခုတင်တုန်းက = ခုတင်က။
ကုတင်နဲ့ ခုတင် မတူပါ။ ဆေးရုံကြီးတချို့ ဆိုင်းဘုတ်တွေမှာ ခုတင်လို့ ရေးထားကြတာ မမှန်ပါ။ ခုတင်ဆိုတာ ခုံတမျိုးသာဖြစ်တယ်။
အိပ်စရာကုတင်၊ ဆေးရုံကုတင်၊ လူနာကုတင်၊ ခွဲစိတ်ကုတင်၊ သားဖွားကုတင်၊ ကုတင်ညောင်စောင်း။ တောအရပ်မှာ အသံထွက်အရ ဂဒင် လို့ ထွက်တယ်။
၁။ မယ်ခွေ ရေးတဲ့မူရင်းကဗျာနဲ့တူညီလားခင်ဗျာ
၂။ ဆရာခင်ဗျာ အိပ်ရာ / အိပ်ယာ မှာဘယ်ဟာအမှန်ဖြစ်ပါလဲခင်ဗျာ
၃။ ကတင်၊ ကုတင်၊ ခုတင် အမှန်သိပါရစေ။ ဆေးရုံတွေမှာ နှစ်မျိုးစလုံးသုံးတာတွေ့နေပါတယ်။
၄။ ကုတင်၊ ခုတင် ရှင်းပြပေးပါခင်ဗျား
၅။ ခုတင်လို့ ရေးမှ မှန်မှာပါ။ မြန်မာ့အဘိဓာန်မှာ ကုတင်လို့ မရှိပါ။ ဒါကြောင့် မယ်ခွေ သတ်ပုံမှားတယ်လို့ ဆိုနိုင်ပါတယ်။ ဒါမှမဟုတ် နောက်ပိုင်း ခေတ်အဆက်ဆက် ဆက်ခံရေးသားလာကြသူတွေ မှားတယ်လို့လည်း ဆိုနိုင်ပါတယ်။ (မှားတယ်လို့ ပြောတဲ့သူကသာ မှားတာ။)
မယ်ခွေ ကဗျာ သင်တဲ့ မြန်မာစာဆရာတွေက တစ်ကြတယ်။ မယ်ခွေ ကုတင်ကိုလည်း ခုတင်တဲ့။ အိပ်မရလောက်။ ကျွန်တော်တို့ ဆယ်တန်းတုန်းက ကဗျာ့ပန်းကုံးကို ကုတင်ပေါ်အိပ် ဖတ်ခဲ့ရတယ်။
- မြန်မာစာရေးထုံးကျမ်း (ဦးသာမြတ်၊ ၁၉၆၂) မှာ ခတင်အိပ်ရာလို့ ပါတယ်။
- ခုသတ်ပုံစာအုပ်တွေမှာ ခုတင်လို့ရေးတယ်။ မှန်တင်လို့ မထင်ပါ။
- မယ်ခွေကဗျာနှစ်ပုဒ်လုံးမှာ ကုတင်လို့သာရေးပါတယ်။ မှန်တယ်။
၁။ ဆေးတံတို
ဆေးတံတို တညှိုလောက် ရော့သောက်တော့ပေး။
မယူလိုက်က မိုက်လို့ထင်၊ ယူလိုက်ပြန်က ကြိုက်လို့ထင်၊ သောက်စေချင် ကုတင်တွင် ထောင်ခဲ့ကွဲ့၊ ညိုနွဲ့ရဲ့လေး။
၂။ ဆေးလိပ်လက်ဆောင်
မဝယ်ဘူး မယ်ခူးတဲ့ဖက်စို။
မီးမကူ နေပူမှာ မကင်အားလို့၊ ထားရတယ် အိပ်ရာအောက်မှာ၊ မင်းသောက်ဖို့ကို။
ညှာအနား၊ ရှေ့သွားနဲ့ကိုက်လို့တို၊ မချိုတောင့်လိပ်ဆေး။
ပိုးမကူ၊ ဝါချည်ဖြူ တပင်ရစ်ကယ်နှင့်၊
ငယ်ချစ်မောင် ရွှေဝသွားကို၊ ပါးလိုက်ကဲ့လေး။ ။ (မယ်ခွေ)
ဒီဆေးလိပ်လက်ဆောင်ကဗျာကို မယ်ခွေရေးတာလို့သာ လူသိများတယ်။ ဒါပေမဲ့ ဟံသာဝတီ ဦးဘရင် ရေးတဲ့ ကဗျာ့ပန်းကုံး အဖြေစုံ စာအုပ်ထဲက မယ်ခွေအောက်မှာ ဆေးတံတိုနဲ့ ဆေးလိပ်လက်ဆောင် ၂ ပုဒ်ပါတယ်။ မှတ်စုမှာ ထိုဆေးလိပ်လက်ဆောင်ကဗျာကို ကင်းဝန်မင်းကြီးရေးသည်၊ သဘင်ဝန် ဦးသော်ရေးသည် စသဖြင့် မူကွဲများ ရှိလေသည်လို့ ရေးထားတယ်။ အဲဒါကြောင့် ကဗျာရေးသူအမည် မူကွဲ ၃ မျိုးလို့ မှတ်သားရပါတယ်။
မူရင်းသတ်ပုံတွေကလည်း အရေးကြီးတယ်။ ဆေးတံတိုကဗျာမှာ ဆေးတံတို တညှိုလောက် နဲ့ ကုတင်တွင် ထောင်ခဲ့ကွဲ့။ ဆေးလိပ်လက်ဆောင်ကဗျာမှာ အိပ်ရာအောက်မှာ နဲ့ တပင်ရစ်ကယ်နှင့်။
နောက်ပေါက်မြန်မာစာအရာရှိတွေက အဲဒီသတ်ပုံတွေကို ပြင်ထားကြတယ်။ ကျွန်တော်ကတော့ သတ်ပုံပြင် ပါမောက္ခတွေဟာ ဟံသာဝတီ ဦးဘရင်ထက်တော့ မြန်မာစာတော်ကြလိမ့်မယ် မထင်ပါ။ ကန်တော့။ ဆောရီး။
ခုတင် အမည်ပါ ဆိုင်းဘုတ်တွေကို ပြင်သင့်တယ်။
- ခုတင် ၅၀၀ ဆံ့ သင်ကြားရေးနှင့်အထွေထွေရောဂါကုဆေးရုံကြီး အင်းစိန်
- ခုတင် (၅၀၀) ဆံ့အထူးကုဆေးရုံကြီး၊ ရန်ကုန်
- ပြည်မြို့ခုတင် (၅၀၀) ဆံ့အထွေထွေရောဂါကုဆေးရုံကြီး
ကျောင်းသူကျောင်းသားတွေ သတ်ပုံမူကွဲကို တလွဲထင်စေနိုင်တယ်။
ကုတင်စာလုံးပေါင်းကလည်း မူကွဲရှိသေးတယ်။ ဆရာတော်တပါး ပျံတော်မူတော့ ဆရာတော်ကျိန်းစက်ခဲ့တဲ ကုတင်ကို ကုဋင် လို့ စာရေးထားတာတွေ့လိုက်တယ်။
ခေတ်အပြောင်းအလဲရဲ့သဘောက ပိုရှင်းလင်း၊ ပိုမှန်၊ ပိုမြန်စေရတယ်။ ကုတင်ကို ခုတင်လို့ပြင်တာ မသင့်မှန်။ တခုကို စသတ်တာ မသင့်မှန်။ တသိန်းကို စသတ်လို့ ငွေတန်ဖိုး မတက်။ ကျတယ်။
ဒေါက်တာတင့်ဆွေ
Comments
Post a Comment