Tectona ဒဟတ်ပန်း

 

ကွန်မင့်တခု = အဲ့ဒီ ဒဟတ်ပန်းကဗျာက ၁၉၉၃ ၁၉၉၄ ပညာသင်နှစ်က ငါးတန်း မြန်မာစာမှာ သင်ခဲ့ရတယ်

ဒဟတ်ပန်းကဗျာ မူကွဲ ၂ ခုတွေ့ရတယ်။

(၁)

၁၉၆၄-၆၅ ခုနှစ်က ဆယ်တန်း စိတ်ကြိုက်မြန်မာစာ ပြဋ္ဌာန်းစာအုပ်ဖြစ်ပါတယ်။

"ဒဟတ်ပန်း"

(ပုံပါ ပုံနှိပ်မူအတိုင်း ထပ်မံတင်ပြပါတယ်။)

ယဉ်မရိုင်း အင်တိုင်းရယ်တဲ့ ခပ်ဆန်ဆန်၊   ။

လူမရောက်၊ ကူကျောက်ချောင် တောင်ကတုံးမှာ၊

စုရုံးကာ သူတို့ ပေါက်ရှာကြ၊ အညှောက် ကြူ ကြူ မွှေးရှာဘူ့၊ 

အခေါက်ဖြူ ဖြူ ကလေးရယ်နှင့်၊ ကျေးငှက် ပျော်စံ၊   ။   

ဇလပ်ဝါ ခတ္တာ ခပါတဲ့၊ သာတန်ဆောင် ဝါခေါင်လတွင်မှ၊

ပွင့်ဖူးကြ အချိန်မှန်၊ ဝသန္တ လေချိုဖျန်း၊   ။  

ယဉ်မဆုံးနိုင်ဘူ့၊ ပင်လုံးကုန် ခိုင်ညှာတံမတော့၊

နံ့သာကျံ ဝါဖန် နှောပါလို့၊ ယဥ်တမူ မြင်သူမောလောက်ကဲ့၊ 

လောကဓာတ်ခန်းမှာလ၊ ပြောစမှတ် ဆန်းပေရဲ့

တောဒဟတ်ပန်း။   ။

- မြင်တစ်မူ မဟုတ်ပါ။

- ဂူကျောက် မဟုတ်ပါ။

- ဝဿန္တ မဟုတ်ပါ။

- ဘု မဟုတ်ပါ။

(၂)

စုံနံ့သာမြိုင် (ဇေယျ)

ဒဟတ်ပန်း 

ယဉ်မရိုင်း၊ အင်တိုင်းငယ်တဲ့ (ရယ်တဲ့) ခပ်ဆံဆံ (ခပ်ဆန်ဆန်)။   ။ လူမရောက်၊ ကူ(ဂူ)ကျောက်ချောင် တောင်ကတုံးမှာ၊ စုရုံးကာ သူတို့ပေါက်ရှာကြ၊ အညှောက် ကြူကြူမွှေး ရှာဘု၊

အခေါက်ဖြူဖြူလေးရယ်နှင့်ကွယ် (အခေါက်ဖြူဖြူလေးရယ်နှင့်) ကျေးငှက်ပျော်စံ။   ။ ဇလပ်ဝါ - ခတ္တာခပါတဲ့၊

သာတန်ဆောင် (စာတန်ဆောင်) ဝါခေါင်လတွင်မှ၊ ပွင့်ဖူးကြချိန်အမှန်၊ အို - ဝသန္တ (ဝဿန္တ) လေချိုဖျန်း၊

ယဉ်မဆုံးနိုင်ဘု (ယဉ်မဆုံးနိုင်)၊ ပင်လုံးကုန် ခိုင်ညှာတံမတော့၊ နံ့သာကျံ ဝါဖန်နှောပါလို့၊ ယဉ်တမူ မြင်သူ မောလောက်တဲ့၊ လောကဓာတ်ခန်းမှာလှ၊ ပြောစမှတ်ဆန်းပေရဲ့၊ ခင်လေးရယ်-တောဒဟတ်ပန်း။

ကျွန်တော်တို့က အဲလိုစာတွေ၊ စာအုပ်တွေကို သင်ယူ၊ ဖတ်ရှုလာကြတာ။ အခုတော့ မူကွဲတွေ၊ မူလွဲတွေ တွေ့တယ်။ ကျောင်းသုံးစာအုပ်ထဲမှာ လွဲနေတယ်။ စာရေးသူတွေက ယဉ်(တစ်)မူတဲ့။ ယဉ်တမူ၊ ယဉ်တကိုယ်တွေကို မှန်အောင်မရေးတာတွေ အများကြီးတွေ့တယ်။ 

ပဉ္စမတန်း မြန်မာဖတ်စာထဲက ဒဟတ်ပန်းကဗျာမှာ ယဉ်တမူကို ပေါ်လစီသတ်ပုံနဲ့ပြင်ထားတယ်။ ကဗျာကိုပါ ယူနီဖေါင်းဝတ်ပေးထားတယ်။

(၃)

၂၀၁၈ ခုနှစ်က မြန်မာပြည်ကို အလည်ပြန်တယ်။ ညောင်ကန်ကနေ တွင်းတောင်ကိုသွားတော့ အပြန်လမ်းမှာတွေ့တဲ့ အပင်တွေကို ဒဟပ်ပန်းပင်လို့ထင်ပြီး ပို့စ်တင်လိုက်တယ်။ တူတော်မောင်တယောက်က အဲဒါ ဒဟပ်ပင်မဟုတ်ဘူးတဲ့။ အခုတွဲတင်တဲ့ပုံကတော့ လွဲစရာမရှိ။ အပင်တွေ အပွင့်တွေအကြောင်း စာသင်ပေးတဲ့ဆရာတဦးဆီက ယူလိုက်တာ။ ကျေးဇူး။

မြန်မာစာတောကြီးထဲမှာတော့ ဒဟပ်ပင် မှားထင်တာထက်ဆိုးအောင် မူရင်းစာတွေ ကဗျာတွေကို မှားအောင်ပြင်ထားနေကြပြီ။ ကျောင်းစာအုပ်ထဲမှာ ဒဟပ်ပန်းကဗျာကို မှားအောင်ပြင်ပြီး သင်နေကြပြီ။

မှားအောင်ပြင်အဖွဲ့ကြီး ၂ ခုရှိတယ် မြန်မာအဘိဓာန် ခေါ် သတ်ပုံစာအုပ်အဖွဲ့နဲ့ ကျောင်းသုံးစာအုပ်ထုတ်ဝေရေးအဖွဲ။

နောက်ဆိုရင် မြက်ပင်ကို ဒဟပ်ပန်းလို့ အဘိဓာန်နဲ့ ကျောင်းသုံးတွေမှာ ပါလာမလား မပြောတတ်။

ဒဟတ်ပန်း https://dr-tint-swe.blogspot.com/2022/05/blog-post_33.html

မှားအောင်ပြင်တဲ့ အဖွဲ့ကြီး အဓွန့်ရှည်ပါစေ https://dr-tint-swe.blogspot.com/2022/05/blog-post_671.html

ဦးကြော့ဆို သဘာဝအလှဖွဲ့ ကဗျာတချို့ https://dr-tint-swe.blogspot.com/2022/05/blog-post_28.html

မြန်မာ့မျက်ပွင့် https://burmese-spelling.blogspot.com/2023/01/blog-post_852.html

Tectona grandis TEAK TREE - EXOTIC SEEDS

ဒေါက်တာတင့်ဆွေ