သူရိယာလျှင်၊ အဝါ မမူ၊ အဖြူ အနီ
စုံစီခြယ်လွင်၊ ပြင်ထပ်တင်၍
နေဝင်မြင်သည်၊ ဝရွှေပြည်ကား
ဆည်းရည် ပတ်ချုပ်၊ မှိုင်းအုပ်ပျပျ
ပုညတောင်ဆီ၊ ရီလျက် မလင်း
မဝင်းအုံ့မှိုင်း၊ စစ်ကိုင်းတဖက်
သန်လျှက်ပေါ်ထွန်း၊ ကျွန်းမျာ့း တံခွန်
နန်းဗိမာန်သည်။ ။ လေသွန်ဖြည်းလှည့်လိမ့်တကား။
သုံးထောင်သင်္ချာ၊ ဟေမာဝန္တ
တောရပ်ကသည်၊ ပုညထွတ်တင်
ဘုရားရှင်တောင်၊ ယဉ်မြောင်မဝေး
စိမ့်အေး ညင်းညင်း၊ ဆောင်းသက်နှင်းနှင့်
ပင်းကြသောထွေ၊ ဧသန်လေလည်း
စုံခြေဆိုင်းဆိုင်း၊ စစ်ကိုင်း ဥယျာဉ်
ချိုချဉ် ပင်စုံ၊ ပန်းမျိုးပုံသည်
ပွင့်ထုံကြိုင်မြူး၊ ဖက်ဆွတ်ဦးကို
သုတ်ဖြူး ဆော်သွေး၊ ဖြည်းဖြည်းပြေးလျက်
အေးအေး အလွှံ့၊ နှလုံးပျံ့သည်။ ။ ရနံ့ချည်း
လှည့်လိမ့်တကား။
ကျောက်တိခံ၍၊ မင်းဝံချက်မ
ဒေသမင်္ဂလာ၊ သာသနာ ထွန်းစည်
ပြည်၏တံခွန်၊ နန်းဗိမာန်၌
ဆင်းကြန်နိကာယ်၊ ကြီး ငယ် ရွယ်လတ်
ဆင်မှတ် ထွေပြား၊ ဝတ်စား နတ်နှိုင်း
သင်တိုင်း ရွှေပြောက်၊ စိန်ကျောက်လည်မာ
သူဇာ ယိုးဖွယ်၊ ပျိုရွယ် ရုပ်သွင်
နဖူးပြင်ဝယ်၊ ရည်ရှင်ဇောတ
တပ်ကြငြိရွှန်း၊ မှန် စက်ဝန်းနှင့်
ရွှေပန်းရွှေဖြီး၊ ညီးရရီးတည့်
မဏိကိုးပါး၊ ဦးကြား ကြယ်ပြောင်
ခရုချောင်နှင့်၊ ရွှေတောင်ထက်တွင်
နတ်သဘင်သို့။ ။ မွမ်းဖြင်ပည်းလှည့်လိမ့်တကား။
ဦးချမ်းမြ။ (၁၉၆၁)။ ကဗျာယဉ် စာယဉ် လက်ရွေးစင်။ မန္တလေး၊ လှခင်အင်ဆန်း စာပုံနှိပ်တိုက်။ စာမျက်နှာ ၃၇-၃၈ မှ ကူးယူဖော်ပြပါသည်။
ရှင်ထွေးနားသိမ်ဟာ မြန်မာသက္ကရာဇ် ၈၂၅ နဲ့ ၈၇၅ ကြား (ခရစ်နှစ် ၁၄၆၃ နဲ့ ၁၅၁၄ ကြား) ပေါ်ခဲ့တဲ့ စာဆိုတစ်ဦး(တဦး)ခန့်မှန်းထားကြပါတယ်။ အင်းဝ ရွှေနန်းကြော့ရှင် ဘုရင် နရပတိလက်ထက် သက္ကရာဇ် ၈၆၃ ခုနှစ်၊ နတ်တော်လထဲမှာ နန်းတွင်းရေးကြောင့် ရှင်ထွေးနားသိမ်တို့ အင်းဝကနေ တောင်ငူကို ပြေးဝင်ခိုလှုံခဲ့ကြရတယ်လို့ မှတ်တမ်းဖော်ပြကြပါတယ်။ ခု ဖော်ပြထားတဲ့ ရတုကို စာဆို အင်းဝကနေ ထွက်လာခဲ့ပြီး တောင်ငူရောက်မှ စပ်ဆိုတယ်လို့ ကောက်ချက်ချကြပါတယ်။ ရှင်ထွေးနားသိမ် ကွယ်လွန်တဲ့အချိန် တောင်ငူ မြို့တည်မင်း မင်းကြီးညို ကိုယ်တော်တိုင် လာရောက် ကြည့်ရှုတော်မူရာမှာ ဒီရတုကို ရှင်ထွေးနားသိမ်ရဲ့ခေါင်းအုံးအောက်ကနေ ရတယ်လို့ မှတ်တမ်းတွေ့ရပါတယ်။ (riend Bookshop)
'ဦးချမ်းမြ'
မန္တလေး တက္ကသိုလ် မြန်မာစာဌာန ကထိက (၁၉၅၁)၊ ၁၉၅၈ တွင် မန္တလေး တက္ကသိုလ် မြန်စာဌာန ပါမောက္ခ ဖြစ်ခဲ့ပြီး ၁၉၇၃ တွင် အငြိမ်းစား ယူခဲ့သည်။ ၉၃ဝ ပြည့်လွန် နှစ်များ ကတည်းက 'မြကေတု' ကလောင် အမည်ဖြင့် ကဗျာ၊ ဆောင်းပါးများ စတင်ရေးခဲ့သည်။ တောင်ငူရာဇဝင် အကျဉ်းချုပ်နှင့် ဘုရားသမိုင်း (၁၉၆၂)၊ ယုဇနမာလာကဗျာများ (၁၉၆၅)၊ နန်းဓလေ့ မှတ်တမ်း (၁၉၆၆)၊ စာပေတန်ဆောင် (၁၉၆၇)၊ အချုပ်တန်း ဆရာဖေ (၁၉၇၇)၊ သီလရှင်ထိပ်သား (၁၉၇၉)၊ နတ်ရှင်နောင် ဘဝနှင့် ပတ်ဝန်းကျင် (၁၉၈၅)၊ တက္ကသိုလ် စာပေတန်ဆောင် (၁၉၉၄)၊ နှောင်းခေတ် တက္ကသိုလ် မှတ်တမ်းများ (၁၉၉၅) စသည် တို့ကို ရေးသားခဲ့သည်။
'ဦးချမ်းမြ' အမည်ရင်းဖြင့် မြန်မာနိုင်ငံ သုတေသနအသင်း အတွက် နတ်ရှင်နောင် ရတုများ (၁၉၄ဝ)၊ ဦးယာ၏ ဆယ့်နှစ် ရာသီ လူးတား (၁၉၄၁)၊ ကဗျာယဉ် စာယဉ် လက်ရွေးစင် (၁၉၅၈ - ၁၉၆၁) စာအုပ်များကို တည်းဖြတ် ပြုစုခဲ့သည်။ ကလောင် အမည်ခွဲ တခုမှာ 'ယုဇန' ဖြစ်၏။ ၁၉၈၁ တွင် နိုင်ငံ့ ဂုဏ်ရည်ဘွဲ့ (ဒုတိယဆင့်) ရရှိခဲ့သည်။
ဒေါက်တာတင့်ဆွေ
Comments
Post a Comment