'ကြာဆစ်ကြိုး'ကဗျာ

     ကြာဖြူကြာနီ ကြာညိုနှောလို့

      တို့လယ်တောမှာ ပွင့်ကြတယ်။

      ကောက်စိုက်အပြန် ရေကန်ကြီး

      ကြာတစည်းလောက် ချိုးခဲ့ကွယ်။

      ကြာပွင့်ကြာငုံ ထုံထုံမွှေးကို

      မလေးဘယ်သို့ သုံးပါ့မယ်။

      ကြာရိုးကြာနွယ် ဘယ်ညာဆစ်လို့

      ရွှေကြာဆစ်ကြိုး ဆွဲပါ့မယ်။

      ဆွဲပါ့မယ်။ (မင်းသုဝဏ်)

မင်းသုဝဏ်။ (၁၉၈၆)။ မောင်ခွေးဖို့ ကဗျာများ။ ရန်ကုန်၊ မြစ်မခစာပေတိုက်။ စာမျက်နှာ ၄ မှ ကူးယူဖော်ပြပါသည်။ ပန်းချီ - ဦးဘကြည်

၁။ အထက်ပါကဗျာမှာ ကြာ"တစ်စည်း"လောက် လို့ ရေးထားတာတွေ့ရလို့ မူရင်း ဟုတ်/ မဟုတ် သိလိုပါတယ်ခင်ဗျ

မကြာခဏတွေ့ပါတယ်။ မူရင်း မဟုတ်ပါ။ ပုံနှိပ်မူတချို့က နောက်ထုတ်တွေ။ 

၁၉၄၀ တွင် မောင်ခွေးဖို့ ကလေးကဗျာများထွက်ရှိ၍ ၁၉၄၁ ၌သပြေညိုနှင့်အခြားကဗျာများ ထွက်ရှိသည်။

မောင်ခွေးဖို့ ကဗျာများ တတိယအကြိမ်ထုတ် မျက်နှာဖုံး (၁၉၅၆)

ဦးနေဝင်းခေတ် နောက်ပိုင်းမှာ မြန်မာစာ စ ပျက်လာတယ်။ ဆရာမင်းသုဝဏ် ဒီကဗျာရေးခဲ့တာက ၁၉၄၀ ကတည်းကဖြစ်တယ်။ ၁၉၅၆ ခုနှစ် ပြန်ထုတ်တော့လည်း သတ်ပုံ မှန်တယ်။

၁၉၈၆ ခုနှစ်ဟာ ဦးနေဝင်းရဲ့ တတိယနောက်ဆုံးနှစ်။ မြန်မာစာ အတော်ပျက်လာချိန်။

၁၉၈၈ ဒုတိယအကြိမ်စစ်အာဏာသိမ်းတော့ မြန်မာစာ စာလုံးပေါင်းသတ်ပုံတွေ ပျက်လာတယ်။ တတိယအကြိမ်စစ်အာဏာသိမ်းတော့ ၁၉၉၁ စက်တင်ဘာလကထုတ်ထားတဲ့ မြန်မာအဘိဓာန်ကိုသာ ရုံးသုံးလုပ်ထားတော့ မြန်မာစာနဲ့ရေးသားသူ ၉၀% လောက်က စာလုံးပေါင်းသတ်ပုံ မှန်အောင် မရေးတတ်ကြတော့ပါ။ ပြန်ထုတ်စာအုပ် ၉၉% က မှန်နေခဲ့တာကို မှားအောင်ပြင်ထားတယ်။

ဆရာမင်းသုဝဏ် မောင်ခွေးဘို့ကဗျာများရေးစဉ် ၁၉၄၀ က တဝမ်းပူတွေကို ရန်ရှာမဲ့သူတွေရဲ့ မိဘတွေတောင် မွေးကြသေးရဲ့လား မသိပါ။

၂။ ဆရာဗျာ တခုလောက်သိချင်လို့ပါ စာလုံပေါင်းသတ်ပုံက ဘယ်နှစ်ခုနှစ်ကနေစပြီး ပြောင်းလဲလာတာလဲဗျ ဘယ်နှစ်ခုနှစ်ထိနောက်ဆုံးမှန်ခဲ့လဲဗျ အဲ့တာလေးသိချင်လို့ပါဗျ။ ကျေးဇူးပြုပြီးဖြေကြားပေးပါဆရာခင်ဗျာ။

အရင်ကလည်း တ နဲ့ တစ် ရောထွေးနေခဲ့တာ ရှိခဲ့တယ်။ အဲလိုကနေ ဦးနေဝင်းက တပြေးညီလုပ်ခိုင်းရာက တစ် တစ် တစ် ဖြစ်လာတာ။

အခုခေတ်မှာ မူရင်းအမှန်တွေကို လိုက်ရှာရတာ အတော်ခက်နေပြီ။ အပြင် အလွဲ အမှားတွေသာ များတော့တယ်။ အဖတ်နည်းလို့ ထပ်မထုတ်တဲ့ ဦးကုလား မဟာရာဇဝင်ကြီးနဲ့ ကင်းဝန်မင်းကြီး၏ လန်ဒန်သွား နေ့စဉ်မှတ်တမ်းလို စာအုပ်တွေသာ မူရင်းအတိုင်းရှိတော့တယ်။ မြန်မာ့စွယ်စုံကျမ်း ၁၅ တွဲကို ပီဒီအက်ဖ် ဖိုင်ပြောင်းကြတယ်။ မူရင်းအတိုင်း မှန်တာ ၂ နေရာသာတွေ့တယ်။ ကျန်တာတွေက မှားအောင်ပြင်ထားကြတယ်။ မလုပ်ကောင်းတာတွေ။

မူရင်းအမှန်စာအုပ်တွေ စုဆောင်းနေတာ အတန်အသင့်သာ ရသေးတယ်။ မြန်မာစာအဖြစ်ကတော့ သစ်လေ မှားလေ။ အခုမေးခွန်ကတော့ သိပ်မသစ်ဘဲ မှားနေတာဖြစ်တယ်။

ဒေါက်တာတင့်ဆွေ