A Subject ဘာသာရပ်တခု

- ဆရာ ဗမာစကားကနေ မွေးစားထားတဲ့စကားတွေ စာအုပ်တအုပ်လောက်ထုတ်ဝေပါလား။ ဥပမာ အင်္ဂလိပ်စကား ပြင်သစ်စကား ပါဠိ သက္ကထ္ထတွေမှ -

- ကျွန်တော်က အဲလောက်ထိ မတတ်ပါ။

- အချိန်ပေးလုပ်ပေးစေချင်ပါသည်။

ကျွန်တော် ဆိုရှယ်မီဒီယာမှာ ဘာသာရပ် ၃ ခု ရေးပါတယ်။ နိုင်ငံရေး၊ ဆေးပညာနဲ့ သုတစာ။ သုတထဲမှာ မြန်မာစာနဲ့ သမိုင်း စတာလေးတွေပါတယ်။ မြန်မာစာထဲမှာ တဝမ်းပူစသတ်အကြောင်းကို လူသိများမယ် ထင်တယ်။ အဲဒါက အထင်သာဖြစ်ပါတယ်။ တ နဲ့ တစ် မဟုတ်တာက ပိုများတယ်။

ကျွန်တော် နယူးဒေလီမှာနေစဉ်က ၂ဝ၁ဝ၊ အောက်တိုဘာလထုတ် မြန်မာသစ် ရသစုံမဂ္ဂဇင်း၊ စာမျက်နှာ ၉၉ မှာ သာရဝေါစိုးကြည်ရေးသားတဲ့ အမျိုးသားပညာဝန်ဦးဖိုးကျားဆောင်းပါးမှာ ကျောင်းနာမည်ဟာ တိုင်တစ်ရာလို့ ဖတ်ရတော့ မျက်လုံးပြူးပါတယ်။ မြန်မာ့စွယ်စုံကျမ်း၊ အတွဲ ၇၊ စာမျက်နှာ ၂၉၂-၂၉၃ မှာ မြန်မာစာပေလောက၌ ထင်ရှားသော ပုဂ္ဂိုလ်တဦး ဖြစ်သည်။ ပုသိမ်မြို့ တိုင်တရာ (စကောကရင်) ကျောင်းတွင် ဆက်လက် ပညာသင်ကြားလို့ပါတယ်။ 

၁၂-၁၂-၂ဝ၁၂ က အမြို့မြို့ အနယ်နယ်မှာ သံဃာတော်တွေက ထပ်ပြီးဆန္ဒပြကြတဲ့အခါ သမတရဲ့ လက်ပန်းတောင်း ကြေးနီမိုင်းအရေးအခင်းပြန်ကြားစာဆိုတာကို ဆရာတော်ကြီးတွေထံ လိုက်လံ ဆက်ကပ်ပါသတဲ့။ စာထဲမှာ ထိမ်းသိမ်းလို့ စာရိုက်ထားတယ်။ ထိန်းသိမ်းသာဖြစ်ရပါမယ်။ 

၁-၅-၂ဝ၁၄ နေ့ ဆေးရုံတခုက အပြာရောင် ဆိုင်းဘုတ်လေးတခု တွေ့လာတယ်။ အာထွာရာစောင်းစခန်းတဲ့။ အာလ်ထွာဆောင်းလို့ဖြစ်သင့်တာပါ။ အာထွာဆောင်းဆိုလဲရတာပါ။ 

၃-၅-၂ဝ၁၄ နေ့မှာ မော်ဒယ်မိန်းကလေးတယောက်ရင်ဘတ်ကိုလက်ဝါးနဲ့ဖိပြီး ပါးစပ်လေးဟနေတဲ့ ပုံအောက်မှာ ရှင်ထဲကို ထိသွားတာဘဲဟယ်ဆိုပြီးရေးထာ တွေ့ရပြန်ပါတယ်။

အဲလို အမှားတွေတွေ့ရာကနေ သတ်ပုံအကြောင်း ထောက်ပြဖြစ်လာတာ။ တတ်လို့၊ ဆရာလုပ်ချင်လို့၊ သင်ပြပေးချင်လို့ မဟုတ်ပါ။ အခုဆို ၁၂-၁၃ နှစ်ရှိပြီ။ စာလုံးပေါင်းသတ်ပုံ၊ အသံထွက်တွေ နမူနာ ထောင်ဂဏန်းရှိပြီ။ အမှားနမူနာလည်း သောင်းဂဏန်းရှိလောက်ပြီ။ ကြာလေ သိလေ။ အမှားတွေကို သိလေ။

စာရေးတာ အမှားဆုံးနေရာတွေက -

၁။ ကင်ဆာနေရာ၊

၂။ ရသနေရာနဲ့

၃။ မြန်မာစာနေရတွေမှာ ဖြစ်ပါတယ်။

တလောက ကျွန်တော်ပြောလိုတာကို အစီအစဉ်လုပ်ပေးမယ်လို့ ရုပ်သံအစီအစဉ် တခုက သဘောတူတယ်။ အစီအစဉ်မှာသုံးဘို့ ကျွန်တော့ ပတ်စပို့အရွယ် ဓါတ်ပုံရိုက်ပေးဘို့လည်း ကင်မရာကောင်းတဲ့သူကို ပြောထားပြီးပြီ။ 

အခုထိ မလုပ်ဖြစ်ပါ။ ကျွန်တော့ထက် တတ်သိသူတွေကသာ လုပ်သင့်တယ်လို့ ယူဆတယ်။ ကိုယ်တိုင်သာ လုပ်ရကောင်းမလားလည်း စဉ်းစားနေတယ်။ ဆောက်ဖြစ်မှ ကျောင်းဒကာ။ အုတ်ခဲနဲ့ သဲ စုနေဆဲ။ 

အစီအစဉ် မလုပ်ဖြစ်သေးလေ အမှားတွေ ပိုတွေ့လာလေ။ မှန်အောင် ပြင်လာတာတွေလည်း တခုစ နှစ်ခုစ တွေ့ပါတယ်။ ကွန်ဂရက်ကျူလေးရှင်း။

ဒိထက် လူပိုမအိုခင် ဓါတ်ပုံကို အရင်ရိုက်ထားရမလား မသိ။ အဲဒါက လွယ်တာကိုး။

ဒီစာတင်ပြတာ တနှစ်တိတိကြာပြီ။ ရုပ်သံအစီအစဉ် မလုပ်ဖြစ်လောက်ပါ။ လူကလည်း ပိုအိုလာပြီ။ မြင်ရကြည့်ရသူတွေကို အားနာရမယ်။

ဒေါက်တာတင့်ဆွေ