One Sided Stories Are Dangerous တဖက်နား

သတင်း = နိုင်ငံရေးပြဿနာကို တွေ့ဆုံညှိနှိုင်းဆွေးနွေးတဲ့နည်းနဲ့ ဖြေရှင်းမယ်လို့ RCSS ပြော

ဒီသတင်းနဲ့ဆက်ပြီး ထုတ်ဖေါ်ရေးသားလိုတာတခုကို ရေးပါမယ်။

နိုင်ငံရေးစကားပြောရတာ တခါတခါ အားနာလို့ ထုတ်မပြော ထုတ်မရေးတာမျိုးရှိပါတယ်။ တိုင်းပြည် သို့မဟုတ် အသင်းအဖွဲ့တခုမှာ တာဝန်ကြီးကြီး ယူထားရသူတွေက သေတပန်သက်တဆုံး ထုတ်ဖေါ်ခြင်းမပြုတာလည်း တိုင်းပြည်တိုင်း၊ ခေတ်ကာလတိုင်းမှာ ရှိတယ်။

ကျွန်တော်က အဲလောက်ထိမကြီးကျယ်ပေမဲ့ ပြည်ပမှာ မြန်မာ့ဒီမိုကရေစီရေးကို ၁၉၉၀ အကုန်ကနေ စလုပ်ခဲ့သူတွေထဲက တယောက်ဖြစ်ပါတယ်။ တာဝန်အရလည်း အတန်အသင့် ကြီးတယ်။ ကျွန်တော်ဟာ NCGUB ခေါ် အမျိုးသားညွန့်ပေါင်းအစိုးရ စတင်သန္ဓေတည်ချိန် ၁၉၉၀ ခုနှစ် နှစ်လယ်ကနေ ၁၄-၉-၂၀၁၂ နေ့မှာ ကိုယ်တိုင် တရားဝင်ဖျက်သိမ်းတဲ့အထိ တာဝန်ယူခဲ့သူတွေ နည်းနည်းထဲက တယောက် ဖြစ်တယ်။

အခုလပိုင်းတွေမှာ ပြောနေကြတယ်။ 

- ဗမာတွေက ဘလာဘလာဘလာ။ 

- တိုင်းရင်းသားတွေက မကျေနပ် ဘလာဘလာဘလာ။

- NCGUB အစိုးရက တိုင်းရင်းသားခေါင်းဆောင်တွေနဲ့ တိုးချဲ့ဖွဲ့စည်းရေးလုပ်ဘို့ ပျက်ကွက်ခဲ့လို့ ပိုပြီးသံသယကြီးသလိုလို ပြောတာတွေကြားရတယ်။

အသေးစိတ် မရေးလိုပါ။ သတင်းနဲ့ဆိုင်တဲ့အချက်တခုတည်းသာ တင်ပြပါမယ်။ ခုနှစ်တွေ၊ လူအမည်တွေနဲ့ နေရာဒေသတွေ အတိအကျ မထည့်တော့ပါ။

NCGUB အစိုးရကို တိုင်းရင်းသားခေါင်းဆောင်တွေ၊ ဒီမိုကရေစီအင်အားစုခေါင်းဆောင်တွေနဲ့ တိုးချဲ့ဖွဲ့စည်းရေးအတွက် တာဝန်တွေခွဲပြီး သွားတွေ့ကြပါတယ်။ အစိုးရ ပြင်ဆင်တိုးချဲ့ ဖွဲ့စည်းရေးမှာ ပါဝင်ဖို့ သဘောထားပေးပါရန် တင်ပြကြပါတယ်။ ကျွန်တော်နဲ့ ၃ ယောက်အဖွဲ့က SSA (South) ခေါင်းဆောင်နဲ့ တွေ့ဖို့ တာဝန်ကျပါတယ်။ သတင်းထဲက ခေါင်းဆောင်နဲ့ ( - ) နိုင်ငံ၊ ( -) မြို့မှာတွေ့ကြတယ်။ သူက စကားပြန်နဲ့ ပြောပါတယ်။ အချုပ်ကတော့ -

“ကျွန်တော်တို့သာ ဆက်လက်ဆောင်ရွက်ကြပါ။ သူ့အနေနဲ့ ပါဝင်နိုင်ခြင်းသေးမရှိပါ။ ထောက်ခံပါတယ်။” 

တခြားအဖွဲ့တွေကရတဲ့ အဖြေကလည်း ခပ်ဆင်ဆင်သာဖြစ်တယ်။ ပါဝင်နိုင်ပါတယ်ဆိုတဲ့ အဖွဲလည်း နည်းနည်းရှိပါတယ်။ ပါနိုင်သူလောက်နဲ့သာ တိုးချဲ့ခြင်း မပြုနိုင်ခဲ့ပါ။

သမိုင်းနောက်ခံ

ပြည်တွင်းမှာ NLD နဲ့ UNLD ပူးတွဲ ဗိုလ်အောင်ကျာ်လမ်းကြေငြာချက်နောက် လပိုင်းမကြာခင်၊ လွတ်မြောက်နယ်မြေမှာ သမိုင်းဝင် မာနယ်ပလောစာချုပ် စတာတွေ အဆင့်ဆင့် သဘောတူချုပ် ချုပ်ဆိုနိုင်ခဲ့ကြပါတယ်။ ဒီမိုကရေစီအင်အားစုတွေနဲ့ တိုင်းရင်သားအင်အားစုတွေကြား သဘောတူညီချက်တွေ ဖြစ်ပါတယ်။

ပြည်တွင်းမှာ ရွေးကောက်ပွဲအနိုင်ရ အမျိုးသားဒီမိုကရေစီအဖွဲ့ချုပ် (NLD) နဲ့ ပြည်ထောင်စုတိုင်းရင်းသားများ ဒီမိုကရေစီအဖွဲ့ချုပ် (UNLD) တို့ ၂၃-၈-၁၉၉၀ ရက်မှာ ဗိုလ်အောင်ကျော်လမ်းကြေညာချက်ကို လက်မှတ်ရေးထိုးခဲ့ကြတယ်။

လပိုင်းအတွင်းမှာ ဖမ်းဆီးထိန်းသိမ်း၊ ထောင်ချခြင်းမခံရသူတွေက လွတ်မြောက်နယ်မြေကို ရောက်လာကြပြီး အနာဂတ်ဖက်ဒရယ်ဒီမိုကရေစီနိုင်ငံတော်အတွက် ဆောင်ရွက်ခဲ့ကြပါတယ်။

- ၁၉၉၂ မာနယ်ပလော ညီလာခံ၊ 

- ၁၉၉၇ မယ်သရောထာ ညီလာခံ၊ 

- ၁၉၉၈ သုမွဲကလော ညီလာခံ၊ 

- ၂၀၁၃ လိုင်ဇာ ညီလာခံနဲ့

- ၂၀၁၄ လော်ခီးလာ ညီလာခံတွေမှာ ဘုံသဘောတူညီချက်တွေ အခိုင်အမာရရှိခဲ့ကြတယ်။

- The Constitution of the Federal Republic of the Union of Burma (FCDCC) ရေးဆွဲရာမှာ MPU ပြည်ပရောက် ၁၉၉၀ အမတ်တွေအကုန် အစအဆုံးပါဝင်ခဲ့ကြပါတယ်။ ကျွန်တော်တို့က အခုထိလည်း ဒီ မူ၊ ပဋိညာဉ်နဲ့ ဖွဲစည်းပုံကို အလေးထားကြပါတယ်။ 

- ကျွန်တော်တို့ MPU/NCGUB ဆိုတာ ဗမာလို့ အခေါ်ခံရသူတွေသာ မဟုတ်ပါ။ NLD သာလည်း မဟုတ်ပါ။ ၁၉၉၀ ပြည့်နှစ် ရွေးကောက်ပွဲကို ကိုယ်စားပြုကြသူတွေ ဖြစ်ပါတယ်။

တင်ပြချက် -

လက်ခုတ်တီးတောင်းတဲ့ အပြောမျိုးတွေ၊ မောင်ဖြူတွေ သဘောကျအောင် မောင်မည်းတွေကို သာသာနဲ့ နာနာဆော်တဲ့ အပြောမျိုးတွေကို တခုချင်းစီ ပြန်မရေးလိုပါ။

မြန်မာလိုရော အင်္ဂလိပ်လိုပါ သမိုင်းကို သမိုင်းလိုရေးတာက ရှားတော့ သူတို့ပြောတာ ဟုတ်သလိုလို မထင်ကြစေလိုပါ။ အင်္ဂလိပ်လိုပါ ရှားတော့ လူဖြူတွေကလည်း တဖက်နား။

ဒေါက်တာတင့်ဆွေ