ဆရာတော့ မလုပ်တတ်ပါ။
တိုင်းပြည်တိုင်းမှာ အသက်မွေးမှုအရ ဆရာအလုပ် လုပ်ကြသူတွေ အလွန်များပါတယ်။
ကျွန်တော်က ပြည်တွင်းမှာ ဆရာမလုပ်ခဲ့ဘူးပါ။ ယူအက်စ်အေကိုရောက်မှ မြန်မာဘာသာပြန်ဆရာ ၆ နှစ် ကြာလုပ်ဘူးတယ်။ မြန်မာလိုလည်းသိပြီး၊ အင်္ဂလိပ်လိုလည်း အတန်အသင့်သိလို့ ဆရာအလုပ်ရတာ။
မြန်မာစာအကြောင်း တိုတိုထွာထွာ ရေးနေတာ ၁၀ နှစ်လောက်ရှိလာပြီ။
ကျွန်တော့အရေးအသားက ဆရာလုပ်သလို မဟုတ်တာကို နည်းနည်းပါးပါး ဖတ်ဘူးသူတွေက သိကြပါလိမ့်မယ်။ ဒီလိုရေးတာ မမှန်ပါ။ အဲဒါ မှားနေတယ်။ ဒီလိုက အမှန်။ ဟောဒါတွေက မူကွဲ။ ဘယ်တုန်းက၊ ဘယ်ထဲမှာ၊ ဘယ်ဆရာတော်တွေ၊ ဘယ်ပုဂ္ဂိုလ်တွေက ဘယ်လိုရေးပါကြောင်း သက်သေခံတွေနဲ့ တင်ပြပါတယ်။
• အစိမ်းရောင် အမှန်ခြစ်၊ အနီရောင် အမှားခြစ်နဲ့ ပြသခြင်း အလျဉ်းမရှိပါ။
• ဒီအတိုင်းသာ လိုက်ရေးကြပါလို့လည်း နိဂုံးမှာမပါ။
• သတိပေးချက်နဲ့သာ တင်ပြပါတယ်။
• ကျောင်းတွေမှာ သတ်ပုံမှန်နဲ့ သင်ရင် အလုပ်ထိခိုက်နိုင်တယ်။
• ကျောင်းတွေမှာ သတ်ပုံမှန်နဲ့ ဖြေရင် စာမေးပွဲ ကျနိုင်တယ်။
• ဘဏ်တွေမှာ ငွေသွင်း ငွေထုတ် လုပ်မရနိုင်။
• စာအုပ်ထုတ်ချင်ရင် သတ်ပုံမှန်နေတာကို မှားအောင်ပြင်ထုတ်ပေးခြင်းခံရနိုင်တယ်။
• ဖေ့စ်ဘွတ်မှာ သတ်ပုံမှန်နဲ့ရေးရင် လူကြိုက်နည်းမယ်။
• ဖေ့စ်ဘွတ်မှာ သတ်ပုံအမှန်တွေအကြောင်း ရေးသူတွေ၊ ထောက်ပြသူတွေ ရန်တွေ့ခံရနိုင်တယ်။ မသကာအဆဲခံရနိုင်သေးတယ်။ (မသကာ = ယုတ်စွအဆုံး၊ အလွန်ဆုံး၊ မတတ်သာသည့်အဆုံး။)
အဲလိုတင်ပြသူဟာ ဆရာလုပ်တတ်သူ မဟုတ်ပါ။ ဆရာလုပ်တာ မဟုတ်ပါ။ စာသင်ကျောင်းပြင်ပ ပညာရေးရဲ့ တစိတ်တပိုင်းလို့တော့ ပြောလို့ရတယ်။ လူတိုင်းဟာ စာသင်ကျောင်းတွေမှာ အလွန်ဆုံး ဥပမာ ဆရာဝန် ၁၇ နှစ်သာ သင်ယူကြပါတယ်။
လက်တွေ့မှာ ဆရာဖြစ်တတ်ပေမဲ့ ပင်စင်ယူပြီးနောက် ဆရာမလုပ်တော့သူတွေ များတယ်။ ဆရာမဟုတ်ဘဲ ဆရာလုပ်သူတွေကလည်း မနည်းပါ။
“စာမတတ် လမ်းဖတ်” ဆိုတာ ဟိုးခေတ်တွေတုန်းက မှန်တယ်။ အမြင်မတော်တာတွေ့ရင် တတ်သိသူတွေက ပြင်ပေးသွားကြတာကို ခေါ်တယ်။ ကျေးဇူးတင်ဘို့ကောင်းတယ်။
“ပညာရှာ ပမာသူပုန်းစား”
ကနေ့ခေတ်မှာ -
“ပညာရှာ နိုင်ငံတော်မူသတ်ပုံစာအုပ် အားကိုးထား”
“စာမတတ် ဖေ့စ်ဘွတ် ဖတ်”
“စာမတတ်သေး ဖေ့စ်ဘွတ် ရေး”
ခေတ်ကတော့ ဖေ့စ်ဘွတ် အကောင့်ပိုင်ရှင်တိုင်းကို ကင်ဆာအထူးကုလို့ ယူဆနေတဲ့ခေတ်။
ဒေါက်တာတင့်ဆွေ
Comments
Post a Comment