ဘုရား နှင့် ဖုရား

- မိဖုရား လား မိဖုယား လားခင်ဗျာ

- အမိပုရှာ - မိဘုရား - မိဖုရား - မိဖုယား ဘယ်ဟာကအမှန်လဲဆရာ

- သကျမုနိဘုရားလား သကျမုနိဖုရားလား 

- ပေါင်းတည်မြို့ သကျမုနိ မိုဃ်းကောင်း ဘုရားကြီး

နှစ်မျိုးလုံး ရေးတာတွေ တွေ့ပါတယ်။

အစဉ်အဆက် ဘုရား၊ မြတ်စွာဘုရား၊ ဘုရားသခင်၊ ဘုရားတရားသံဃာ၊ ဘုရားစေတီတော် လို့သာ ရေးပါတယ်။

ဘုန်းတော်ကြီးတွေကို လျှောက်ထားတဲ့အခါ တင်ပါ့ဘုရား၊ မှန်ပါဘုရားလို့ ရေးတယ်။

ဘုရင်တွေနဲ့ သက်ဆိုင်တာတွေမှာတော့ မှန်လှပါဘုရား။ ဘုရင့်ဇနီးကို မိဖုရား။ ရှင်ဘုရင်နဲ့ညား မိဖုရား။

ဣတ္တိလိင်အတွက် ဖုရား ကိုသုံးကြတယ်။

မြန်မာအဘိဓာန် အကျဉ်းချုပ် (၁၉၇၉) ထဲမှာ ဖု၊ ဖုလုံး၊ ဖုဿရထား၊ ဖုသျှနက္ခတ် လို့သာပါတယ်။

ဒီအဖြေစာအတွက် အွန်လိုင်းမှာ ရှာတော့ အတော်မှားရေးနေကြတာတွေ တွေ့တယ်။ ဘုရား မှားအောင်ရေးကြသည်။

• မကြာမီ ဖုရားဖူးများနှင့် အလွန်စည်ကားလာမည့် ကျောက်စိမ်းဖုရားအဝင်လမ်းမမှ (မှား)

• စိပ်ကြည်နူးစရာဤနေရာ ဗုဒ္ဓဖုရားအမွေအနက်တည်ရှိနေခြင်းသည့်လူသါးတွေကို ညိမ်းအေးစေသည် (မှား)

• ထိပ်စုဖုရားထွေး 

• ထူးဆန်းသော လူရိုင်းမျိုးနွယ်စုရဲ့ ဂမ္ဘီရနတ်ဖုရားမ 

• နေလဝိဇ္ဇာ - ရွှေတိဂုံဖုရား (မှား)

• ပျော်ပါဖုရား (မှား)

• ဖုရားပုံပြင် (မှား)

• ဖုရားဖူးအမှတ်ရ (မှား)

• ဖုရားရှိခိုး (မှား)

• ဖုရားသမိုင်းများ (မှား)

• ဘာသာမဲ့တဲ့အချစ်ကိုဘယ်နတ်ဖုရား 

• ဘူးသီးတောင် ဖုရားပြင်အောင်ပ၌ ရွာသားအချင်းချင်း ရန်ဖြစ်သည်ကို အကြောင်းပြု၍  ကျေးရွာအုပ်ချုပ်ရေးမှူးက နှစ်ဖက်စလုံးမှ ငွေညှစ် (မှား)

• ရိရေကန်အနီး နဂါရုံဖုရားလမ်း တိုးချဲ့ဖောက်လုပ်မည့်အပေါ် ဒေသခံပြည်သူများ  မလိုလား (မှား)

• လောကနန္ဒာစွယ်တော်ဖုရား ပုဂံမြို့သစ် (မှား)

• သိုက်ဆက်အပေါင်းပျော်စံရာ - ဘုရားမှာဆံတော်နှင့် နတ်မှာကန်တော်ပါဖုရား (မှား)

• အင်းနီရေလယ်ဖုရားထီးတင်ပွဲအမှတ်တရ (မှား)

• အားလုံးမဂ်လာပါ လာလယ်ခဲ့ပါ ဖုရားရှိတဲ့နေရာ (မှား)

အကိုးအကားများ

- မင်းနှင့် မိဖုရား၊ နှစ်ပါးစုရုံး (အာကာသ သျှတ္တရပျို့)

- အမရပူရ ဒုတိယမြို့တည် နန်းတည် သာယာဝတီမင်းနှင့် တောင်ဆောင်တော် ကျောက်မော်မြို့စား မိဖုရားသီရိသုစန္ဒာ မလ္လာမဟေ တို့မှ ဖွားမြင်သော သားတော် ၂ ပါးအနက် သားတော်ကြီးဖြစ်သည်။

- “ဒီငါးကြီးဟာ အထီးလား အမလား၊ အမကို ဝယ်ချင်တယ်” လို့ မိဖုရားက ငါးသယ်မကို မေးသတဲ့။ မိဖုရားရဲ့စကားကိုကြားတော့ ငါးကြီးက ကျယ်လောင်စွာ ရယ်လိုက်သတဲ့ကွယ်။ (ငါးရယ်သံ)

- မိဖုရားကြီးတွင် သန္ဓေရှိရာ၊ နဂါးငွေ့သင့်သောကြောင့် ဖွားမြင်လာသော အမြွှာညီနောင်တို့မှာ စက္ခုနှစ်ကွင်း အလင်းမရရှိချေ (မောင်ပေါက်ကျိုင်း - အောင်သင်း)

- ပဲခူး (ဟံသာဝတီ) ဘုရင်တွင် မိဖုရား(ခေါင်) တပါး၊ မောင်းမ ကိုယ်လုပ်တော် ၃၀၀ ရှိသည်။ သားတော် သမီးတော်များကား ကိုးကျိပ်ဟူ၏။ (၁၉၇၉ ခုနှစ်ထဲမှာ ဖတ်ကြားတင်သွင်းတဲ့ ခရီးသွားစာပေ စာတမ်း)

- ပူမီးဗျာပွား မိဖုရား မစားရေစာ၊ မနေပါနှင့် (ဝိဓူရဒုက္ခ - ဇော်ဂျီ ၁၉၆၄)

- ရှင်ဘုရင်နဲ့ညားရင် မိဖုရား (မောင်သာရ)

- ရှင်ဘုရင်နဲ့ညားမိဖုရား ဇာတ်လမ်း 

- "ဦးပုည ဆဒ္ဒန်ဆင်မင်းဝတ္ထု"

တရံခါ၌

သန္တာရိုးတန်၊ မင်းစံရွှေပွင့်

ကိုးဆင့်နဝရတ်၊ ဘုံပြာသာဒ်ကဲ့သို့

တမွတ်စွင့်စွင့်၊ ပင်လုံးပွင့်သော

အင်ကြင်းပင်ပျို၊ မြရွက်ညို၌…

ဦးကင်းဖြင့် ဝှေ့ခိုက်၍

ပြိုက်ပြိုက်ကျကြွေ

ရွှေနီဖလံ၊ ဝတ်ဆံဝတ်မှုန်

အထုံအခိုး၊ ဝန်းကျင်ဖြိုးမျှ

ပန်းမျိုးရွာစေတော် မူသတည်း။…

မဟာသုဘဒ္ဒါ၊ မိဖုရား၏အပေါ်၌ကား

ပုံကြီးနံလျား၊ ရွှေမျက်ပါးကို

တပြားစီလွှာ၍၊ လေညာကလွှင့်သကဲ့သို့…

တရံခါလည်း၊ သန္တာရိုးတံ

ဝတ်ဆံရွှေဆင်း၊ ထိန်ထင်ဝင်းသည့်

အင်ကြင်းပင်ကြီး၏ အရိပ်၌…

ဘဝဟောင်းက

ငယ်ပေါင်းပီပီ၊ လည်ချင်းမှီ၍

နရဏီခိုင်၊ အင်ကြင်းမြိုင်နှင့်

မြစိုင်ပညောင်၊ ရွှေဂူချောင်မှာ

ဆွေမောင်နှင့်မယ်

ကျီစယ်သမှု၊ ပန်းခိုင်လု၍… (ဦးပုည ဆဒ္ဒန်ဆင်မင်းဝတ္ထု)

ဒေါက်တာတင့်ဆွေ