ကစွန်း ကန်ဇွန်း ကန်စွန်း

၁။ (က) စွန်းကို (ကန်)စွန်းလို့  တချို့လူတွေ ရေးနေကြတာကို တွေ့နေရပါတယ်။ ဘယ်လိုကြောင့်၊ ဘာ့ကြောင့် (က) စွန်းကနေပြီး (ကန်) စွန်းဖြစ်ရတာလဲ။ ရေးကြတာလဲ။ သိကြသူများ ပြောကြပါဦးဗျာ။

၂။ ကန်ဇွန်းလား ကန်စွန်း ဆရာ။

ကစွန်း နဲ့ ကန်စွန်း မူကွဲဖြစ်ပါတယ်။ ကန်ဇွန်း မမှန်ပါ။

စကားလုံးဝေါဟာရတွေကို ထင်သလို လိုသလို ဖွင့်ဆိုနေကြတယ်။ မမှန်တာတွေက များတယ်။

တချို့က ပြောကြတယ်။ ရေကန်စပ်မှာပေါက်လို့ 'ကန်စွန်း' တဲ့။ ကျွန်တော့အိမ်မှာ ရေကန်မရှိပါ။ နွေရာသီရောက်တိုင်း မြေကြီးမှာ စိုက်ပါတယ်။ 'မြေစွန်းပင်' လို့တော့ မခေါ်ပါ။

ကန်စွန်း လည်း မမှားပါ။ ၁၉၆၄-၆၅ ခုနှစ်က စိတ်ကြိုက်မြန်မာစာ ကျောင်းသုံးစာအုပ်မှာ ဆရာဇေယျက 'ကန်စွန်းနွယ်' လို့ ရေးထားတယ်။ သိပ္ပံဘာသာတွဲယူတဲ့ ကျွန်တော်က ငှားဖတ်တယ်။ ကောင်းတယ်။ သတ်ပုံတွေလည်း အကုန်မှန်တယ်။

သင်ပုန်းကြီး လင်္ကာ

က ကစွန်းပင် ရေမှာရွှင်

ကန်စွန်းနွယ် (ဇေယျ)

ရိုးတလျှောက် (ဦးကြီး)

ဖြိုးမောက်ပါတဲ့ လယ်ပဒူ

အရွက်ချွန်း ကန်စွန်း ပုဇွန်စာနဲ့

လွန်တရာ ကညွတ်ပေါတယ် (လွန်တစ်ရာ ဆိုရင်တော့ စားမဖြစ်တော့)

တောဖြစ်လို့ထူ။

မှိုနားတို ငွေရောင်ဖျော့ငယ်နှင့်

ရွှေကနဖော့ ကြာရိုးဖြူ

ချိုးယူလို့ မကုန်ခန်း။

ပတ္တမြားရောင်

ဖားကပေါင် သံလွင်နှင့်

ရွှေညံပင် ရှုပ်မရှင်းတယ်

ကွင်းပြည့်ခမန်း။

စတုတ္ထတန်း မြန်မာဖတ်စာ အသစ်ထုတ် မှားနေတယ်။

ဇွန်း

ဟင်းခပ်ဇွန်း

လက်ဖက်ရည်ဇွန်း

ကလေးဆေးတိုက်ဇွန်း

စတီးဇွန်း

ကြွေဇွန်း

ကြေးဇွန်း

ဒန်ဇွန်း

အိုးကြီးချက်ရာတွင်သုံးသော ဇွန်းကြီးကြီးကို ယောက်ချိုဟုခေါ်၏။

ဇွန်းခြစ်အုန်းသီး

၁၉၇၀ ဝန်းကျင်က ရန်ကုန်အဝင် မီးရထားလမ်းဘေးတွေမှာ ကစွန်းခင်းကြီးတွေရှိတယ်။ 'ရထားလမ်းစွန်းပင်' လို့ မခေါ်ပါ။

ဒေါက်တာတင့်ဆွေ