လောက်လေးခွ
လောက်လေး
လေးနဲ့မြား
ဒူးလေး
ဘတ်ခွကို လေးခွ နဲ့ လောက်လေးခွလို့လည်း ခေါ်ကြတယ်။
လောက်လေးက တမျိုး။ မြားတံနဲ့ပစ်ရတဲ့ လေးနဲ့လည်း မတူပါ။ လောက်လေးမှာ ကြိုးနှစ်ချောင်းပါပြီး ကြိုးအလယ်နေရာက လောက်စာလုံး၊ ခဲလုံးထားစရာနေရာလေးမှာ ကြိုးနှစ်ချောင်းကို ကန့်လန့်ကျစ်ထားတယ်။ ငယ်ငယ်ကရွာမှာ တွေ့ဘူးတယ်။ ကျီးကန်းခြောက်ရတယ်။
Rambo First Blood ‘ရမ်ဘို’ စတဲ့ ရုပ်ရှင်တွေမှာသုံးတာက ရိုးရိုးလေးနဲ့မြားကို ဆန်းသစ်ထားတယ်။
Hawk Crossbow ‘ခရော့စ်ဘိုး’ က မြန်မာပြည်က ဒူးလေးနဲ့ ဆင်တယ်။ ဆန်းသစ်ထားတယ်။
Archery ခေါ် ခေတ်ပေါ်မြားပစ်ပြိုင်ပွဲတွေမှာလည်း ခေတ်မီလေးနဲ့မြားကို ဆန်းသစ်ထားတာ။
Catapult လောက်လွှဲက တမျိုး။ ဂရိခေတ်၊ ရောမခေတ်က စစ်ပွဲတွေမှာ သုံးကြတယ်။ ကျောက်တုံးတွေ မီးလုံးတွေနဲ့ ရန်သူမြို့ရိုးကို ကျော်ပြီးပစ်နိုင်တာမျိုး။
ဒူးလောက်တင်မှ ရင်လောက်ကျ မတူတဲ့ဖွင့်ဆိုချက်များ
(၁) စကားပုံ
သားကောင်ကို လက်နက်ဖြင့် ချိန်ရွယ်၍ ပစ်ခတ်ရာတွင် ရင်ဒူးနေရာသို့ မှန်း၍ပစ်မှ ရင်ဘတ်ကို မှန်နိုင်သကဲ့သို့ အလုပ်လုပ်ရာတွင် ပို၍ ရည်မှန်းထားမှ သင့်ရုံကျသည်။
ဒူး (ရင်ဒူး) = တိရစ္ဆာန်၏ ရင်ညွန့်တွင် နံရိုးနှစ်ဖက်ဆုံရာ အရိုးနု။ (ရင်နုရိုးဟုလည်း ခေါ်သည်။)
(၂) အလင်္ကာ ပုလဲပန်း
ဒူးလောက်တင်မှ၊ ရင်လောက်ကျ
အညာမှာ အမျိုးသမီးငယ်တွေ ရေခပ်တဲ့ အခါ ရေအိုးကို ခေါင်းပေါ်ပင့်တင်ဖို့အတွက် တဆင့်တည်းနဲ့ ရောက်အောင် မတင်နိုင်တတ်လို့ ဒူးပေါ်ကတဆင့် ခေါင်းပေါ်ပင့်ရပါတယ်။ ဒူးလောက်တင်တဲ့အခါမှာ ရေအိုးဟာ ရင်ညွန့်နဲ့ တတန်းတည်း ဖြစ်သွားတာကို ရည်ရွယ်ပြီး ဒူးလောက်တင်မှ ရင်လောက်ကျတယ် လို့ဆိုတာ ဖြစ်ကြောင်း ဆရာမောင်သာနိုးက ပြောပါတယ်။
နောက်ထပ် မူကွဲတမျိုးကတော့ ဒူးဆိုတာ ခြေထောက်မှာရှိတဲ့ ဒူးကို ဆိုတာမဟုတ်ဘဲ၊ ရင်ဒူးကို ခေါ်တာလို့ ဆိုပါတယ်။ ရင်ဒူးဆိုတာ ရင်ညွန့် အထက်နားကပ်ရက် နေရာကို ဆိုချင်တာဖြစ်ပါတယ်။ လူမှာ ရင်ဒူး အသုံးပျောက်ကွယ်သွားပေမယ့် ဆိတ်သားမှာ ရင်ဒူးဆိုတဲ့ အသုံး ရှိနေသေး ကြောင်း ဆိုကြပါတယ်။ ဒါ့ကြောင့် ဒူးလောက်တင်မှ ရင်လောက်ကျမယ် ဆိုတာဟာ ရင်ဒူးလောက်တင်မှ ရင်လောက်ပဲကျတာကို ရည်ရွယ်တာလို့ ဆိုပါတယ်။
နောက်တတိယ မူကွဲကတော့ သားကောင်ကို မုဆိုးက ပစ်ခတ်ဖို့ ချိန်ရွယ်တဲ့ အခါ မုဆိုးဒူးထောက် ထောက်ပြီး ချိန်ရွယ်ပါတယ်။ အဲသလို ချိန်ရွယ်တဲ့ အခါမှာ လေး၊ ဒူးလေးတို့ကို ကိုယ့်ဒူးလောက်မှာတင်မှ သားကောင်ရဲ့ ရင်လောက်ကျမယ်လို့ ပြောတာလို့ ဆိုပါတယ်။
KyawkyawWin Taungdagar
လေး နဲ့ မြား (bow and arrow) က လေး ကို လင်းလေး လို့ ခေါ်သေးတယ်။ လောက်လေး ကို လောက်လွှဲ လို့ ခေါ်ကြသေးတယ်။ လွှဲပြီး ပစ်ရတာ။ မပစ်တတ်ရင် လေးကိုင်း ကို ကိုင်ထားတဲ့ လက်မ ကို ထိတတ်တယ်။
ဒေါက်တာတင့်ဆွေ
Comments
Post a Comment