ပင်နီအင်္ကျီနှင့် ယောထမီ

ဆရာမင်္ဂလာပါဗျ ကျွန်တော်က ဆက်ကျော်သက်တယောက်ပါဗျ ကျွန်တော်ဆရာ့ကို Messenger နဲ့ Whats App တို့မှာ မေးထားပါတယ်ဗျ Our value costume ဆိုတဲ့ post တခုတင်ခဲ့ဖူးပါတယ်ဗျ အဲ့ဒီဟာနဲ့ ပတ်သတ်(ပတ်သက်) တဲ့ အကြောင်းအရာလေး costume အကြောင်းလေးကို သိချင်လို့ပါဗျ အကြောင်းအရာလေးကို လေးစွာဖြင့်ဖြေကြားပေးပါရန် မေတ္တာရပ်ခံပါတယ်ဗျ ပင်နီအကြောင်းပါဗျ။

Whats App ကို မသုံးပါ။

ပင်နီ = အုန်းခွံရောင်ရှိသော ဝါချည်ဖြင့်ရက်လုပ်သော အထည် ။

ပင်နီအင်္ကျီနှင့်ယောထမီ။ ကျွန်ဗြူ ။၂၅၈ ။ ချည်ထည်ကြမ်းများဖြစ်သော ပင်နီ ၊ ပင်ဖြူ။

ပင်နီ အစစ်နဲ့ အတုလို့ရှိတယ်။ အတုဆိုတာ ပင်နီအရောင်အတိုင်း ချည်ချောနဲ့ လုပ်ထားတာ။ အညာပင်နီအစစ် နဲ့ ရှမ်းပင်နီအစစ် လို့ ရှိတယ်။

ဒုတိယ ပင်နီခေတ်

လွန်ခဲ့တဲ့ ၂၀၁၆ ခုနှစ်က ဗမာပြည် ညီကပို့လိုက်တာ။ ပင်နီတွေများစွာ၊ တမိသားစုလုံးအတွက်တဲ့ဗျာ။အဝေးမှာ အနေကြာ၊ နွေမှာ မင်္ဂလာယူဖို့ပါ။ 

ကုမ္မာရီအပျိုစင်များမှာ မျိုးချစ်စိတ်တွေထက်သန်လာကြပြီ၊ ဝတ်ကြဆင်ကြပါသည်၊ တို့ဗမာဖျင်နီ၊ တို့ဗမာဖျင်နီ၊ အမော်အကြွားအတုအပ တခုမျှမရှိကြပါသည်၊ ယခုမှ သတိရလေတော့သည် -

ပင်နီဖျင်၊ ပင်နီအင်္ကျီနဲ့ ယောထဘီတွေကို ရှေးပဝေသဏီကတည်းက ဝတ်ဆင်ခဲ့ကြတယ်။ စိုက်ပျိုးရေးသာ အားကိုးရပြီး၊ တခြားနိုင်ငံတွေနဲ့လည်း ခရီးမပေါက်ခင်ကာလမှာ သဘာဝထွက်နဲ့သာ လူလုပ်ခဲ့ကြတယ်။ စားစရာကို အောက်အရပ်နဲ့ ဝတ်စရာကို အညာဒေသကနေ စိုက်ပျိုးထုတ်လုပ်ပေးခဲ့ပါတယ်။ မုတ်သုန်ဥတုရှိတဲ့တိုင်းပြည်မှာ ဖျင်ထည်ချည်ထည်ဟာ အကောင်းဆုံးဖြစ်တယ်။

ကျွန်တော်ငယ်ငယ်က ပုလဲနဲ့ မုံရွာမှာ ပင်နီသုတနည်းနည်းရခဲ့ပါတယ်။ ပင်နီဆိုတာ ချည်ဖြူကို ဆေးနီဆိုးထားတာ မဟုတ်ပါ။ ပင်ကိုယ်အနီဖြစ်ပါတယ်။ ဝါအဖြူနဲ့ ဝါအနီလို့ရှိတယ်။ ဝါနီက ဂွမ်းထွက်လျော့ပြီး အမွှေးလည်းတိုတယ်။ ဝါဖြူပင်ထက် ကြုံလှီတယ်။ ဝါပင်တရာမှာ ဝါနီတပင်နှစ်ပင်သာပါလေ့ရှိတယ်။ ဝါကောက်ခါစမှာ အရောင်မရင့်သေးပါ။ သီတင်းကျွတ်နဲ့ တန်ဆောင်မုန်းလမှာ ဝါကောက်ပြီး မြေအိုးကလေးထဲ သိပ်ပြီးနှပ်ထားရတယ်။ တပို့တွဲ၊ တပေါင်းကျတော့ အိုးထဲကနေထုတ်ယူပြီး၊ ဝါကြိတ်၊ ကြိတ်ပြီးရင် ဝါဖန့်၊ ချည်ငင်ပြီး ရက်တော့ ပင်နီဖျင်အုပ် ဖြစ်လာပါတော့တယ်။

ပင်နီအစ ဝိုင်အမ်ဘီအေကလို့ ဆိုကြတယ်။ ဝံသာနုခေတ်မှာ အမျိုးသားရေးဝိသေသလက္ခဏာအဖြစ် ပေါ်ထွန်းခဲ့တယ်။ နိုင်ငံခြားဖြစ်အသုံးအဆောင်တွေကို ဆန့်ကျင်ပြီး ရိုးရာပင်နီအင်္ကျီနဲ့ ယောလုံချည်၊ ယောထဘီတွေကိုသာ ဝတ်ဆင်ကြဖို့ လှုံ့ဆော်မှုတွေနဲ့အတူ ကျယ်ပြန့်ခဲ့ပါတယ်။ လူကြီးတွေ၊ လူပျိုတွေ၊ အပျိုတွေပါ အမြတ်တနိုးဂုဏ်ယူဝတ်ဆင်ကြသည်။ ပင်နီဝတ်သူကို ဝံသာနုစိတ်ရှိသူလို့ သတ်မှတ်ခဲ့ကြတယ်။ သပိတ်မှောက်ကျောင်းသားကြီးတွေက ပင်နီကိုဝတ်ပြီး တရားဟောကြတယ်။ အမျိုးသားကျောင်းတွေက ဆရာ၊ ဆရာမတွေကလည်း ပင်နီဝတ်ပြီးစာသင်တယ်။ သခင်တွေက ပင်နီကိုဝတ်ပြီးနိုင်ငံရေးလုပ်တယ်။ ကျောင်းသားခေါင်းဆောင်အောင်ဆန်းလည်းပါတယ်။ အမျိုးသားပညာဝန် ဦးဖိုးကျားနဲ့ ဒီးဒုတ်ဦးဘချိုတို့လည်းပါတယ်။ အထင်ရှားဆုံးပုဂ္ဂိုလ်ကတော့ သခင်ကိုယ်တော်မှိုင်းဖြစ်တယ်။ အဲတာကို ပင်နီတခေတ်ဆန်းခြင်းလို့ ခေါ်ပါတယ်။

မောင်တို့ရွာမှာ ဘာတွေပေါပါလိမ့်၊ ပင်နီချောနဲ့ ယောထဘီ၊ ပင်အင်္ကျီမှာ ကြွေတွေစီလို့ အင်္ကျီပါးကိုပယ်မည်၊ ယနေ့ပင် ဝတ်မည်ပင်နီ့ ကမ္ဘာတွင် မြန်မာမျိုးတို့ ဓမ္မာရိုးအစဉ် ဖျင်ပင်နီနှင့် ဆင်ထဘီ တဘက်ကြမ်းတို့ကို ရက်ကန်းတွင် လွန်းပြန် ထိုးပါလို့ ပန်းဆိုးကာ ကိုယ်စီဝတ်ကြရ မိုးစွတ်နှင့်နေပူခံ -

လူထုဒေါ်အမာက ပင်နီဆိုတာ ပင်ကိုယ်ကနီနေတယ်တဲ့။ ပေါ်ပင်နိုင်ငံရေးလုပ်သူတွေကို ဆိုးဆေးပင်နီဝတ်တဲ့သူတွေ၊ ပင်နီအတုတွေလို့ ကဲရဲ့ကြတယ်။ ပင်နီချည်စကို ချုပ်မဝတ်ခင်မှာ ပျော့ပျောင်းအောင် ရေစိမ်ပေးရသေးတယ်။ ငယ်ငယ်က မုံရွာအိမ်မှာ မိဘတွေ အဲလိုတကူးတက လုပ်ခဲ့ကြရတာကို မှတ်မိနေတယ်။ ဆေးကျောင်းသားအထိ ပင်နီတိုက်ပုံ ဝတ်ရတယ်။ ခေတ်ကာလအလျှောက် ပင်နီအစစ် ဝတ်ကြတာတော့နည်းပြီ။ ပင်နီချော၊ ပင်နီရောင်နဲ့ ဒီဇိုင်နာ ပင်နီထည်တွေကိုဝတ်နေကြပြီ။ အဲတာအထိတော့ လိုက်မပြောလိုပါ။ ပင်နီတခေတ်ဆန်းချိန်မှာ ခေတ်မီတာ ကောင်းပါတယ်။ စိတ်ထား၊ အပြောနဲ့ အလုပ်တွေကတော့ ပင်နီစစ်ကြစေချင်တယ်။

တမျိုးယဉ်တာ ပိုးဖျင်လွှာ၊ မြန်မာပြည် ပင်နီယောနဲ့ ဝတ်ဆင်ဦးမှာ၊ အပေါင်းပြည်ရွာ နေကောင်းကြစေပါ။ 

မောင်တို့ရွာမှာကွယ် ဘာဘာတွေပေါတယ်

ပင်ထနောင်းနဲ့ထန်းပင်တွေရယ် မန်ကျည်း ဝါးပင်ပေါပါတယ် ဗျ

ပင်ပင်နီချောရယ်နဲ့ ယောထမီ ယောထမီ

မောင့်ချစ်သူလေးကိုလ ဆင်စေ့ချင်သည် လှစေချင်သည်

ယောသူတို့ရွာ https://burmese-spelling.blogspot.com/2022/10/blog-post_193.html

ပုံ သူငယ်ချင်းဆရာဝန်တယောက်က ရှမ်းပြည်ကနေဝယ်လာတဲ့လက်ဆောင်။ ကျေးဇူး။

ဒေါက်တာတင့်ဆွေ