ငွေတာရီ

ဆရာခင်ဗျာ ဒီကဗျာဟာတချိန်က ဆဋ္ဌမတန်းမြန်မာစာပြဌာန်းစာအုပ်မှာ ထည့်သွင်းဖော်ပြဖူးတယ်လို့ သိရပါတယ်။ ဘယ်အချိန် ဘယ်ကာလကရေးသားခဲ့တဲ့ ကဗျာလဲဆိုတာ သိပါရစေ။

ဟုတ်။ ဒီကဗျာကို ကျောင်းသုံးစာအုပ်မှာ သတ်ပုံတွေကို မှားအောင်ပြင်ထားတယ်။

ပြန်တင် ပြန်ထုတ်တွေမှာလည်း သတ်ပုံတွေကို မှားအောင်ပြင်ထားတယ်။

မြန်မာစာ အောက်ဆုံးရောက်နေပြီ။

ထိပ်ဆုံးသို့ 

တတောင်ပေါ် တတောင်ဆင့်

တောင်အမြင့်ပတ်ခြံရံ

တတောင်ဆုံးပြန်တော့

တလုံးကျန်ပြန်ပေသမို့

ဖန်ဖန်လေ အားအင်နှိုးလို့ရယ်

ကြိုးလျှောက်ရပြန်။

ခါတလေ တကယ်ပန်းတာကြောင့်

တော်ပါပြီ ဆက်မလှမ်းချင်ဘု

ရပ်တန်းကရပ်မယ်ကြံ

အမှန်တော့ ဖြစ်နိုင်ပါ့မလား

စခဲ့မိဟာပေါ့

တနေ့မှာ ဆုံးရာရောက်ပါလိမ့်

အားလျှော့ကာ ဆုတ်ချင်စမ်းပါနဲ့

စိတ်နွမ်း အသာဖြေလို့

မာလာငွေ ကန်ရေအေးရယ်နှင့်

ငှက်တေးကို အာရုံဆင်လို့

မူတသွင် အားအင်သစ်လိုက်ပါ့

ချစ်ဖွယ့်လူသား ။ ။

ကဗျာဆရာမ ငွေတာရီ ဟာ ၁၆-၂-၁၉၂၅–မှာမွေးဖွါးပြီး ၁၉-၃-၁၉၅၉ နေ့မှာ ကွယ်လွန်ခဲ့ပါတယ်။ ဗြိတိသျှဘားမား ဦးညွန့်နဲ့ ဒေါ်ချစ်တင်တို့ကနေ မွေးတယ်။ အမည်ရင်းက ဒေါ်ခင်ရီ။ ၁၂ နှစ်သမီးကတည်းက ဇော်ဂျီနဲ့ မင်းသုဝဏ်တို့ရဲ့ ကဗျာတွေကို လေ့လာပြီး ကဗျာတွေစပ်တယ်။ ၁၄ နှစ်သမီးမှာ ကျန်းမာရေးကြောင့် ကျောင်းဆက်မနေရတော့ပါ။

ကဗျာစာအုပ် ၄ အုပ်ထုတ်ဝေခဲ့တယ်။ ကဗျာ ၁ဝဝ စာအုပ်က ၁၉၆ဝ ခုနှစ်၊ စာပေဗိမာန်ကဗျာဆုရတယ်။ ခင်ပွန်းဖြစ်သူ မင်းယုဝေနဲ့ ပူးတွဲ ဘာသာပြန်တဲ့ အီစွတ်ပုံပြင်များစာအုပ်က ၁၉၅၄ ခုနှစ်၊ စာပေဗိမာန် ဘာသာပြန်ဆုရတယ်။ ငွေတာရီရဲ့ ကဗျာတွေကို ကျောင်းသုံး စာအုပ်တွေမှာ ပြဋ္ဌဌာန်းခြင်း ခံရတယ်။ ငွေတာရီအုတ်ဂူပေါ်မှာ သူရေးထားတဲ့ ဘဝကွေ့ဝယ် ကဗျာထဲကနေ ထုတ်နုတ်ရေးထိုးထားပါတယ်။

ဘဝကွေ့ဝယ် 

ပျော်မွေ့ကြည်သာ

သွားလေရာက 

နှစ်ဖြာလွမ်းခွဲ ရောက်မလွဲတည့်။ 

ဘဝတိုတို 

လမ်းတခို၌ 

လျှပ်လိုခဏ 

တွေ့ကြရခိုက် 

မေတ္တာ့မဏ္ဍိုင် တူစိုက်ပြိုင်စို့

တတ်နိုင်သမျှ၊ ချစ်ပါကြစို့။ 

ဘဝလမ်းတာ

တိုတောင်းစွာကို 

သာယာသမှု ငါတို့ပြုစို့ 

ညစ်ကျူမတင်၊ စိတ်ဖြူစင်ဖြင့် 

များရှင် လူသူ၊ ငါတို့ကူစို့။ (ငွေတာရီ)

မေးတာကို အတိအကျ မဖြေနိုင်ပါ။ ဆောရီး။ မင်းယုဝေနဲ့ ငွေတာရီတို့ရေးသမျှစာတွေထဲမှာ တတွေကို မလိုအပ်ပဲ စသတ်မထားပါ။

ဒေါက်တာတင့်ဆွေ

၁၂-၉-၂၀၁၉