.jpg)
တင်ထားတာတခု = "ဒီနှစ် ကြော်ဦးမှာလား မေမေ"
"အင်း.. နတ်တင်ဖို့ ပဲမုန့်လေးရယ်.. ရှောက်ပင်က ရှောက်ရွက်လေးခူးပြီး အပေါင်းကြော်လေး လေးငါးဆယ်ခုလောက်ရယ်.."
ငါးပေါင်းကြော်လို့ ရေးရ။
တင်ထားတာတခု = မွန်ပြည်နယ်၊ မော်လမြိုင် ချောင်းဆုံ (ဘီလူးကျွန်း) စတိုင် မွန်ရိုးရာ ငါးပေါင်းကြော်။ ဧရာဝတီတိုင်း၊ မြစ်ဝကျွန်းပေါ် ဝါးခယ်မ အခေါ် ဘူးသီးကြော် ကြက်သွန်ကြော်၊ အာလူးကြော်။ ရန်ကုန်မှာ ကြော်ပါသည်။
အညာမှာလည်း ငါးပေါင်းကြော်လို့ ခေါ်ပါတယ်။ အသံထွက်တော့ ငဘောင်းကြော်။
ငါးဆိုပေမဲ့ ငါး မပါ။ သီးအရွက် တမျိုးမျိုးကို ဆန်မှုန့်၊ ပဲမှုန့်နဲ့ ရောကြော်တာ။
ဗူးသီး (ဘူးသီး)၊ ကြက်သွန်၊ အာလူး၊ ဂေါ်ရခါးသီး၊ ခရမ်းသီး၊ မြင်းခွါရွက်၊ ထားဝယ်မှိုင်းရွက်၊ သိပ်မစပ်တဲ့ငရုတ်သီး၊ ပုစွန်စာရွက် စတာတွေ။ ကောင်းတယ်။
ငါးသေးသေးလေးတွေကိုလည်း ကြော်ပါတယ်။ ပုစွန်ဆိတ်သေးသေးလေးတွေနဲ့လည်း ကြော်တယ်။ ကောင်းတယ်။
အဲလို အခုလိုက်ကြော်တာအပြင် ဗူးသီးတချောင်းချင်းကို ဆန်မှုန့်နဲ့ ကြော်တာကိုတော့ ဖြူးကြော်လို့ ခေါ်တယ်။ ဖြူးမြို့နဲ့တော့ မဆိုင်ဘူးထင်တယ်။
ကျွန်တော်တို့ အထက်တန်းကျောင်းသားဘဝ၊ မုံရွာမှာ ဖြူးကြော်တပွဲ တမတ် (၂၅ ပြား) ပေးရတယ်။
အချဉ်ရည်နဲ့ ရေနွေးကြမ်း။ ကောင်းတယ်။
'စတိုင်' လို့ရေးတာကို နေရာတကာမျိုးချစ်လုပ်နေသူတွေက ကန့်ကွက်ကြလိမ့်ဦးမယ်။ 'ဒေါက်တာ' လို့ ခေါ်တာလည်း မျက်နှာဖြူဆန်လို့တဲ့။ အဲလိုရေးတဲ့သူတွေကို ဒီမနက်မှာ 'ဘလော့' ရတာ မနည်းဘူး။
'စတိုင်' ဆိုရင် ပိုဆိုးမယ်။ သတိထားကြပါလေ။ သူတို့က 'ဖုန်း' ကနေရေးကြတာ။ 'လိုင်း' ရတုန်း ရေးကြတာတဲ့။
တမြန်နေ့ညက Good night လို့တင်တော့ မြန်မာလိုရေးပါတဲ့။ မသိသူ မရှိလောက်လို့ ထင်ပါတယ်။ ဖုန်းပေါက်စလေးကနေ မြန်မာလိုရိုက်ရတာ တခါတခါ ခက်တယ်။ ကျွန်တော့ဖုန်းမှာ ဇော်ဂျီဖေါင့်ကို အခြေခံထားတယ်။
အကြော်ရောင်းသူတွေ၊ အကြော်စားသူတွေ နေကောင်းကြပါစေ။
မနေ့ကဘဲ ဒေါ်မြမြအေးကပြောတယ်။ တပေါင်းလဆန်း (၃) ရက်နေ့က ပုန်းမကြည်နေ့နီးပြီတဲ့။
ရိုးရာမမေ့သူတွေ ကျန်းမာချမ်းသာကြပါစေ။
ပုံအတွက် ကျေးဇူး။
ဒေါက်တာတင့်ဆွေ
Comments
Post a Comment