ကူးတင်ပြပါမည်။ ကိုယ်တိုင် ကူးရေးတာ မဟုတ်ပါ။ မူရင်းတင်ထားသူ ကျေးဇူး။
(အင်းဝခေတ် ရွှေယင်မြော် ရှင်ဥက္ကံသမာလာ ဆရာတော်၏ သတ်ပုံအတိုင်း တနင်္ဂနွေမင်းလက်ထက်မှ သီပေါမင်းလက်ထက်တိုင် မြန်မာမင်းအဆက်ဆက် သတ်မှတ်ခဲ့သော အမျိုး၊ ဘာသာ သတ်ပုံမှန်)
"အကြင်လူသည်။ တံ၊ ထိုမင်းကို။ မာနေတိ၊ မြတ်နိုးတတ်သော။ ဣတိတသ္မာ၊ ထိုသို့ အရှင်ကို မြတ်နိုးတတ်သော သတ္တိကြောင့်။ သောဇနော၊ ထိုလူသည်။ မြမ္မာ၊ မြမ္မာမည်၏။ မြမ္မာ၊ မင်းကို မြတ်နိုးတတ်သည်။
ဤဝစနတ္တ၌ မ-သဒ္ဒါသည် ပရိသတ်ကို ဟော၏။ ရာ-သဒ္ဒါသည် (ယူခြင်းအနက်ကို ဟော၏ဟု ဧကက္ခရကောသလမှ လာသောကြောင့် ရှေ့ဝိကပ်၌ မသဒ္ဒုပရာဓာတ် 'မရ' ဟူသော ရုပ်ပြီးကို စီရင်သည်။ နောက်ဝိကပ်၌ မရမာဓာတ် ကြံသည်။ 'မာ' ဓာတ်) သည် မြတ်နိုးခြင်းကို ဟော၏ဟု ကျမ်းကလာသောကြောင့် 'မြမ္မာ' ဟူသော ရုပ်ပြီး စီရင်သည်။
ထိုဝစနတ္တတို့တွင် ရှေ့ဝိကပ်၌ အရကား ၁ပါး၊ ဝတ္ထု ၄ ပါး၊ အား ၅ ပါး၊ ရာဇဓမ္မ ဆယ်ပါး အစရှိသော ကျေးဇူးတို့နှင့် ပြည့်စုံသော သုနာပရန္တတိုင်း တမ္ပဒီပတိုင်း စသော အတိုင်းတိုင်း၌ နေကုန်သော လူအပေါင်းတို့ကို အုပ်စိုးခြင်းငှါ စွမ်းနိုင်သော ဘုန်းတန်ခိုးအာဏာအရှိန် ရှိတော်မူသော အစစွာသော မင်းကို ရ၏။
နောက်ဝိကပ်ကား ထိုမင်းကို ရိုသေလေးမြတ်ပြုရာသော အရှင်စိုးမင်းကို မသွေမဖည် ကြည်သဒ္ဓါ၍ မြဲစွာပြုလေ့ရှိသော အမှု ဝေယျာဝစ္စဟူသော ပုညကိရိယာ ဝတ္ထု ကျေးဇူးနှင့် ပြည်စုံသော ရှေးဦးစွာသော မြမ္မာလူမျိုးကို ရ၏၊ နောက်နောက်သော လူအပေါင်းတို့သည်လည်း ထိုအကျင့်နှင့် ပြည့်စုံသောကြောင့် လည်းကောင်း၊ ထိုသူတို့၏ အမျိုးအနွယ်ဖြစ်သောကြောင့် လည်းကောင်း မြမ္မာ မည်ကု၏။
တနည်းကား
မံသိရိံ ရာတိ ဂဏှာတီတိ မရော၊ တံ မာနေတိ မြမ္မာ။
မံသိရိံ ၊ အသရေကို။ ရာတိ ဂဏှာတီတိ၊ ယူတတ်၏။ ဣတိ၊ ထို့ကြောင့်။ မရော၊ မရ မည်၏။ တံ၊ ထိုဝ်အသရောရှိသသူသည် ။ မာနေတိ၊ မြတ်နိုးတတ်၏။ ဣတိ၊ ထို့ကြောင့်။ မြမ္မာ၊ မြမ္မာမည်၏။ အရကား ဘုန်းပညာနှင့် ပြည်စုံသော သူတော်ကောင်းကို မြတ်နိုးရိုသော ပူဇော်စည်းကပ်တတ်သောသူ၊ ဇနိယပူဇ မင်္ဂလာတရား ပဏ္ဍိတသေဝနာ မင်္ဂလာတရား သပ္ပူရိသူ ပနိဿယ စက္ကသမ္ပတ္တိ အစရှိသော ကျေးဇူးတို့နှင့် ပြည့်စုံသော မြမ္မာလူမျိုးရ၏။
ဤမှ တပါးလည်း အက္ခရာပုဒ်တို့၏ အနက်နှင့် လျော်ညီသော ဓာတ်ပစ္စည်းကို ကြံ၍ ဝိဂြိုဟ် ဝစနတ္တပြုသော် များစွာ ရသင့်သေး၏။
မြမ္မာဘာသာဟူသော စကားကို ဝစနတ္တပြုသော် မြမ္မာနံ ဘာသာ မြမ္မ ဘာသာ - ဟူ၍ ပြုရာ၏။ မြမ္မာနံ၊ မြမ္မာတို့၏ ။ ဘာသာ၊ စကားတည်း။ မြမ္မ ဘာသာ၊ မြမ္မာစကား။
ဤသို့ ဝစနတ္တကြောင့် မြမ္မာလူမျိုးတို့၏ ဝေါဟာရပညတ် ခေါ်ဝေါ် ပြောဆိုအပ်သော စကားမျိုးသည် မြမ္မ ဘာသာမည်၏။
_________________________
ယင်းတို့ အပင့်အရစ် အသတ်အလတ်တို့ကို ဂရုစိုက်ကြသည်မှာလည်း အခြားကြောင့် မဟုတ်။
"ရေးထုံးအစဉ် ပျက်ယွင်းလျှင် အခေါ်သညာ အမှတ်အသား ပျက်ယွင်းရာသည်။ အခေါ်သညာ အမှတ်အသား ပျက်ယွင်းလျှင်လည်း အနက်အဓိပ္ပါယ် ဝတ္ထုတရားကိုယ် ကွဲလွဲ ဖောက်ပြန်ရာသည်။ အနက်အဓိပ္ပါယ် ဝတ္ထုတရားကိုယ် ကွဲလွဲ ဖောက်ပြန်လျှင်လည်း တရားကျမ်းဂန် လမ်းမှန်မကျ တိမ်းယိမ်း သွေကွက်ရာသည်။ တရားကျမ်းဂန် လမ်းမှန်မကျ တိမ်းယိမ်း သွေကွက်လျှင်လည်း သာသနာတော် ၃ ပါး အရင်းမူလဘူတ ဖြစ်သော ပရိယတ္တိဓမ္မ ကွယ်ပ ဆုတ်ယုတ်ရာသည်။ ပရိယတ္တိဓမ္မ ကွယ်ပ ဆုတ်ယုတ်ရာလျှင်လည်း သာသနာတော်ကို မှီကုန်သော ရဟန်းရှင်လူ ပြည်သူ အပေါင်းတို့သည် အယူအကျင့် ပျက်ယွင်း၍ ဆင်းရဲကြီးစွာ ရောက်ကြ" မည်ကို စိုးရိမ်ပူပန်သောကြောင့် ဖြစ်သည်။
ဤကဲ့သို့ ခေတ်အဆက်ဆက် ဘုရင်နှင့် တကွ ရဟန်းပညာရှိ လူပညာရှိ ကျမ်းပြုပုဂ္ဂိုလ်များ လေးစားလိုက်နာခဲ့ကြသည့် သတ်ပုံသတ်ညွန်းကျမ်း အသီးသီး ရှိသည့်အနက် ဝဏ္ဏဗောဓနသတ်အင်းသည် ဝေါဟာရပြည့်စုံ၍ ခိုင်လုံသော ကျမ်းတစောင် ဖြစ်သည်ဟု ယူဆရပေသည်။ အဘယ်ကြောင့် ဆိုသော် ဝဏ္ဏဗောဓနသတ်အင်းကျမ်း ပေါ်ထွက်လာသည်မှ စ၍ နောင်ခေတ်များတွင် ပင့်ရစ်အသတ်အလတ်ဆိုင်ရာ၌ ဝဏ္ဏဗောဓနသတ်အင်းကိုသာ ပဓာနထား၍ ညွန်ကြားသတ်မှတ်ကြသည်ကို တွေ့ရသည်။
ဘိုးတော်ဘုရားလက်ထက်တွင် သတ်ပုံသတ်ညွန်းများကို ပြဌာန်းတော်မူသောအခါ၌လည်း ဝဏ္ဏဗောဓနသတ်အင်းကိုပင် ထိပ်ဆုံးက တင်၍ ပြဋ္ဌာန်းတော်မူလေသည်။
ထို့နောက် သီပေါမင်းလက်ထက် "၁၂၄၀ - ပြည့် ၊ နတ်တော် လပြည့်ကျော် ၆ ရက်နေ့ တောင်ဥယျဉ်တော် အစည်းအဝေး ရုံးတော်တွင် ကျင်းပသော ပထမဘွဲ့၊ ဒုတိယဘွဲ့ အစည်းအဝေးဝင် မှူးမတ်တို့၏ မျက်နှာစုံညီ အစည်းအဝေးကလည်း အသတ်ကာရန် ရေးသားနည်းများနှင့် စပ်လျဉ်း၍ လိုက်နာကြရန် " ရွာကြီး ဆရာတော် ဝဏ္ဏဗောဓနသတ်အင်း" ကို အမှူးထားလျက် ထောက်ခံတင်ပြကြလေသည်။ အစည်းအဝေး၏ ထောက်ခံတင်ပြချက်ကို သီပေါမင်းက နှစ်သက်တော်မူသဖြင့် ဝဏ္ဏဗောဓနသတ်အင်းကို အရအမိ ကျက်မှတ် လိုက်နာရန် ဆုံးဖြတ်သည်။
ဝဏ္ဏဗောဓနသတ်အင်း (ရှင်ဥက္ကံသမာလာ)
ကျွန်တော်တို့ ၁၀ တန်း (၁၉၆၄-၆၅) မှာ ကျောင်းသုံး မှီငြမ်းသတ်ပုံစာအုပ်။ လက်ထဲမှာလည်း ရှိတယ်။ အလွန်ကောင်းတဲ့စာအုပ်။
ရှေးစာကဗျာများ နေရာမှာ pdf ဖိုင်လင့် ရှိတယ်။
ဒေါက်တာတင့်ဆွေ
Comments
Post a Comment