ဗြောသံ

၁။ ဗျောသံ နဲ့ ဗြောသံ ဘယ်ဟာအမှန်လဲဆရာ

မှားနေတယ်။ ပို့စ် တင်လိုက်မယ်။

ပို့ပေးတဲ့ပုံက မှားနေတယ်။ မျဉ်းနီ သားလိုက်တယ်။

အဲလိုဘဲ ညတုန်းက သီချင်းတပုဒ်မှာ သဒ္ဒါ နဲ့ သဒ္ဓါ မှားနေတယ်။ ပုံနှိပ်မူက မှားနေတာ။

ပုံနှိပ်မူတိုင်းကို အမှန်ယူလို့ မရတာတွေ ရှိတတ်တယ်။

စာလုံးပေါင်းသတ်ပုံကို ယူလိုရင် စံကိုက် အဘိဓာန်နဲ့ ခိုင်မာတဲ့ သတ်ပုံကျမ်းတွေကိုသာ အားကိုးရတယ်။

အဘိဓာန်ဆိုတိုင်းလည်း မှန်တာမဟုတ်။

သတ်ပုံကျမ်းဆိုတိုင်းလည်း မှန်တာမဟုတ်။

အွန်လိုင်းနဲ့ အက်ပ် တွေ မှန်တာ အလွန်ရှားတယ်။

AI နဲ့ Google မှာလည်း မှန်တာ အလွန်ရှားတယ်။

အဘိဓာန်နဲ့ သတ်ပုံကျမ်းတွေစာရင်းကို မကြာခဏ တင်ပြထားပါတယ်။ မနေ့က တခါ။

၂။ ဆရာ ဆရာမင်းသုဝဏ်ရဲ့ဗြောသံကဗျာ စကားပြေလေးလိုချင်လို့ပါ

၃။ သင်ပေးတဲ့ဆရာအပေါ  မှာလည်းမူတည်ပါလိမ့်မယ်။ ကျွန်တော် ၁၉၆၇ ခုနှစ် ကိုးတန်းတက်တော့ မြန်မာကဗျာလက်ရွေးစဉ်စာအုပ်ပထမဆုံးပြဌာန်းတဲ့နှစ်ပါ။ အဲဒီမှာဆရာမင်းသုဝဏ်ရဲ့ ဗြောသံကဗျာကိုသင်တဲ့ ဆရာမက "မြင်းကဏ်ပင်ငြင်းဆန်မိုက်လေပေါ့" ဆိုတဲ့စာကြောင်းကို အဓိပ္ပါယ်ရှင်းမပြတတ်ဖူး။ သူလဲသေချာမသိဘူး ပြောတယ်။ မြင်းကဘဲ ကန်ချင်ကျောက်ချင်သလိုဖြစ်နေတယ်လိုဆိုလိုပုံရတယ် လိုပြောတယ်။ ကျွန်တော်တိုမြန်မာစာဝါသနာပါသူတွေအတွက်တော့ အတော် စိတ်ပျက်ရတယ်။ ဆယ်တန်းမှာလဲအဲဒီစာအုပ်ဘဲပြဌာန်းတော့ မြန်မာစာဆရာ ဦးကျော်ညွန့်(တက္ကသိုလ်မောင်ကျော်ညွန့်)ကသင်တော့မှ ရှင်လောင်းစီးတဲ့မြင်းကို ဘုရားလောင်း တောထွက်စဉ်စီးတဲ့ ကဏ္ဍက မြင်းနဲ့တင်စားဖွဲဆိုတာလိုသိရတယ်။ ဆရာကအသံနေအသံထားနဲ့ဆိုပြခဲ့တာ အခု အနှစ်၅၀ ကျော်တဲ့အထိမှတ်မိနေတုန်း

"ရှေးဟောင်း ဗျောညွန့်"

ပို့စ်တခု = မြို့လယ်ကမဏ္ဍပ် အရပ်မာတဲ့ကုသိုလ် 

စာလုံးပေါင်းသတ်ပုံ မှားရေးလို့ အလွန်ခေတ်စားခဲ့တဲ့ မင်္ဂလာဗြောညွှန့်သီချင်း ပျက်ရော။

မင်္ဂလာဗြောညွှန့်

မြို့လယ်က  မဏ္ဍပ်

အရပ်မှာတဲ့  ကုသိုလ်

ကျောင်းကြီး  အိုအို။

လက်ရမ်းငယ်ပြို

ရှင်လူပျို  တဲတဲ့

ကျောင်းစိုလို့ရွှဲ။   ။

အရှေ့ကို  လျှောက်ပါလို့

အနောက်ကိုတဲ့  မျှော်လိုက်ရင်။

တံခွန်တိုင်  ရွှေကုက္ကားနှင့်

ဘုရားကိုမြင်။

မမလေးတို့  မယ့်ဦးရင်

အဝင်သာပေတောင်း

ဗောဓိရွှေကျောင်း။   ။

ရွှေယောင်ကို  မောင်ထုံးလို့

ရွှေကုံးကို ဆင်။

ညနေ မောင်ရင်ဖြစ်တယ်

လွမ်းရစ်တော့ လေး။   ။

ရွှေစာ  အမေပိုက်လို့

လိုက်ပရစေ  မောင်လှရယ်။

ကျောင်းတော်ဝိဟာ ဘယ်မလဲကွဲ့

လမ်းပြလှည့်ဦး။   ။

စာပလွေ  မောင်ထမ်းလို့

ကျောင်းလမ်းကိုဝင်။

ဘယ်စာကို သင်မတုံးကွဲ့

အမေလေး သံချိုနှောလို့

ပာခဲ့ပါဦး။   ။ (ရှေးစာကဗျာများ)

"ဗြောသံ" 

(မင်းသုဝဏ်)

ပလုပ် ဗြုန်းရယ်နဲ့

တောင်ကုန်းရွာ သာစခန်းဆီက

ဒေါ်ရွှေမေ ဦးရေချမ်း ငယ်တို့

သာသနာ ဝါဝါလန်း ရန်တဲ့

ဆန်းလိုက်တဲ့ ဗြောသံစည်။ ။

အလို၊ နေခြည်မှာ ရွှေရည်ဝင်းလို့

ဆယ်စင်းလဲမက

အဝေးက မှန်း၊ ဟိုရွာလမ်း

ထီးတန်းကြီး လှပါဘိ

“တလတာ သည်အရေးကိုလှ

မဟဝါ ကြည်ကြည် ပေးပါ” တဲ့

ရတုချို စိတ်ကို သွေးလေတော့

မလေးမောင် ရွှေရောင်ငိုက်တဲ့ပြင်

မြင်းကဏ်ပင် ငြင်းဆန်မိုက်လေပေါ့

လွမ်းခိုက် မတည်။ 

မကြည်တဲ့နှလုံး၊ မပြုံးတဲ့မျက်နှာ

မြင်းပေါ်က မောင်ရင်လောင်း

ငဲ့စောင်းလို့ ကြည့်သောခါ

ကညာလုံ ကြာမုံညွတ်ဟာဖြင့်

ယမ်းယောင်ကာ ကွမ်းတောင် လွတ်တဲ့ပြင်

“မတွယ်တာ ဆယ်ခါ လွှတ်မယ်” တဲ့

ဒေါချိုချို ပြောဆိုရွတ်လေပေါ့

စိုစွတ်တဲ့ မြမျက်ရည်

လည်တယ်လို့ မဆုံး။ 

ဗြုန်းနိုင်ပေ့ ကိုရွှေစည်

တီနိုင်ပေ့ ကိုရွှေနှဲ

ရွှဲနိုင်ပေ့ ကိုရွှေမောင်

လုံမငယ် အရှက်အိုးမို့

အငြိုးနဲ့ ပြောင်ရော့ထင့်

“လှောင်ချက်ကယ်နာ

မောင်မျက်နှာ တရွာမှတ်ပေမဲ့

သာသနာ ဝါဝါဝတ်မှာမို့

မယ်လွတ်ရာ ဘယ်ဆီ ခိုရပ

တလဆို ရက်ကိုချဉ်းပါဖျ”

ဘွာခတ်ကာ ခမျာ ငြင်းလေတော့

သျှောင်ကြီးရှင် ဆံပင်တင်းပြီကွဲ့

ညှဉ်းတဲ့ တုတ်ဗြုန်း။   ။

(၂၃၊ ၃၊ ၁၉၃၄ - ဂန္ထလောက၊ ကဆုန်၊ ၁၂၉၆)

kantkawmg Date: Mar 22, 2011 

သတ်ပုံတွေကို မှားအောင်မပြင်ဘဲ တင်ပေးထားသူ ကျေးဇူး။

စကားပြေသင်ကြားပို့ချချက်ကိုတော့ တွေ့တဲ့ လင့်တခု ပို့လိုက်မယ်။ မူရင်းကဗျာပါသတ်ပုံတွေကို ပြင်ထားသလားတော့ မသိ။ ခုခေတ် မှန်နေတာကို မှားအောင်ပြင်မှသာ ရောင်းရတယ်။ လူကြိုက်များတယ်။ ရာထူးနေရာရတယ်။ ဆုရတယ်။ 

https://www.facebook.com/watch/?v=5792844154069051

BED ပထမနှစ်မာပါတဲ့ဟာဆရာ

ကျေးဇူး။ B. Ed. လို့ ရေးရ။ မှာလို့ရေးရ။ မှာ နဲ့ မာ အတော်ကို မတူပါ။ B. Ed.ဆိုတာ ပညာရေးဘွဲ့။ ဆရာဆရာမတွေက စာလုံးပေါင်းသတ်ပုံ၊ စပယ်လင် မှန်ကြမှသာ ကျောင်းသူကျောင်းသာတွေ မှန်ကြပါမယ်။

ကင်ဆာနဲ့ မာ အမျိုးတော်သလား https://burmese-spelling.blogspot.com/2022/10/blog-post_564.html

ဒေါက်တာတင့်ဆွေ