ဘယ်အရာ ဘယ်ပညာမဆို ဆရာကောင်းလိုတယ်

မြန်မာစာအကြောင်းလေးတွေ တင်ပြတဲ့အခါ မှတ်ချက်တွေ လာပါတယ်။ ကိုယ်ပိုင်တင်ကြတာတွေလည်း ဖတ်ရတယ်။ ကျေးဇူး။

ဒါပေမဲ့ …

ကျွန်တော်တင်ပြထားတဲ့ ဘယ်တုန်းက၊ ဘယ်ထဲမှာ၊ ဘယ်လိုရေးပါကြောင်းကို ဆန့်ကျင်ရေးသား ပြောဆိုတာမျိုးတွေကို မှန်တယ်လို့ မထင်ပါ။ 

ဘာ့ကြောင့်ပါလဲ …

ကိုယ်ပိုင်နည်းနာတွေနဲ့ တွေးဆ ဆင်ခြင်မှုပြုကြပါတယ်။ 

• တချို့က ဟိုစာလုံးမှာ စသတ်ပါလို့ ဒီစာလုံးမှာလည်း စသတ်ရမယ်တဲ့။

• တချို့က ဟိုစာလုံးမှာ စသတ်မပါလို့ ဒီစာလုံးမှာလည်း စသတ်မပါသင့်တဲ့။

• သိပ္ပံနဲ့ သင်္ချာ ဖေါ်မြူလာနည်း။ ပုံသေနည်း။

• တချို့က ဒီလိုဖြစ်နိုင်ရင် ဟိုလိုလည်း ဖြစ်ရမယ်တဲ့။

• ယုတ္တိဗေဒ ခေါ်လောဂျစ် ခေါ် တက္ကဗေဒနည်း။

• စဉ်စားဆင်ခြင်မှုပြုတာတော့ ကောင်းပါတယ်။

ဒါပေမဲ့ …

မြန်မာစာဟာ ဘာသာစကားတခုဖြစ်ပါတယ်။ နှစ်တထောင်ကျော်လာပြီ။ တဖြေးဖြေး ပြောင်းလဲ တိုးတက် စည်ပင်လာပါတယ်။ အထောက်အထားတွေကိုလည်း တင်ပြထားတယ်။

ကျွန်တော့မှာ ကိုယ်ပိုင် စာလုံးပေါင်းသတ်ပုံရယ်လို့ တလုံးတလေမျှ မရှိပါကြောင်းကိုလည်း လေးငါးခါ တင်ပြထားတယ်။ ကျွန်တော့ သူငယ်တန်းဆရာမ (ကွယ်လွန်) နဲ့ ဆယ်တန်းမြန်မာစာဆရာ (ကွယ်လွန်) တို့က သင်ပေးတဲ့အတိုင်းသာ လိုက်နာရေးသားပါတယ်။ လိုအပ်လာရင် ၁၉၆၄-၆၅ ဆယ်တန်းကျောင်းသုံး ဝဏ္ဏဗောဓနသတ်အင်းနဲ့ မြန်မာအဘိဓာန် အကျဉ်းချုပ် (၁၉၇၈-၇၉-၈၀) တွေကို အားကိုးပါတယ်။ ဘာသာပြန်စာလုံးတွေဆိုရင် ယုဒသန် အင်္ဂလိတ် မြမ္မာအဘိဓာန် လှန်ပါတယ်။ ခေတ်ပေါ် နည်းပညာ၊ ဆေးပညာစာလုံးတွေကိုတော့ ကိုယ်တိုင် ဘာသာပြန်ရေးသားရပါတယ်။ 

အဘိဓာန်နဲ့ သတ်ပုံကျမ်းတွေကို ခပ်လွယ်လွယ် ခပ်ပေါ့ပေါ့ ပြုစုလို့မရပါ။ အခုခေတ်မှာ app ရေးတတ်ရင် သတ်ပုံကျမ်းပြုစုသူဖြစ်သတဲ့။ 

အကောင်းဆုံးနမူနာကို တင်ပြပါမယ်။

မြန်မာအဘိဓာန် အကျဉ်းချုပ် (၁၉၇၈) ကျမ်းဦးစကားပါ မှတ်သားဘွယ်ရာများ

• ခေတ်မီအဘိဓာန် 

• မြန်မာစာအဖွဲ့ ၃၂ ဦး

• မြန်မာအဘိဓာန်အဖွဲ့ ၂၁ ဦး

• မြန်မာအဘိဓာန် တည်ပုဒ်ရေးချယ်ရေးအဖွဲ့ ၈ ဦး

• မြန်မာအဘိဓာန် ဝန်ဆောင်အဖွဲ့ အဖွဲ့ဝင်များ ၁၁ ဦး

• မြန်မာစာအဖွဲ့ စာပေဝန်ထမ်း 

- စာတည်း ၃ ဦး

- လက်ထောက် စာတည်း ၃ ဦး

- စာပြု ၉ ဦး

- လက်ထောက် စာပြု ၃ ဦး

• ထင်ရှားသည့် ပုဂ္ဂိုလ်များ (ဒဂုန် ဦးလှဘေ၊ ဦးလှမောင်၊ ဦးဝန်၊ ဦးမောင်မောင်ကြီး၊ ဦးလှရွှေ၊ ဦးတင်လှ (လှသမိန်)၊ ဒေါ်တင်တင်ဦး၊ ဦးကျော်ထွန်း၊ ဒေါ်ကြည်ကြည်၊ ဦးအောင်သိမ်း၊ ဒေါ်အုန်းခင်) စသည်။

• စာလုံးပေါင်းသတ်ပုံ၊ 

• အနက်ဖော်ခြင်း၊ 

• တည်ပုဒ်များ၏အသံထွက်၊ 

• သရုပ်ဖော်ပုံကြမ်း၊

• ဝေါဟာရ ရင်းမြစ်၊ တွေကိုပါ ထည့်သွင်းထားပါတယ်။

ဒါ့ပြင် …

• မြန်မာအက္ခရာသမိုင်းအကျဉ်း၊

• နှစ်လုံးဆင့်အက္ခရာများ၊

• မြန်မာစကားသံ ပြောင်းလဲပုံ၊

• အသံထွက်နည်း လမ်းညွှန်၊

စတာတွေလည်း ပါတယ်။

နမူနာတခု - စာလုံးပေါင်းသတ်ပုံ (ပုံနဲ့တကွ တင်ပြထားပါတယ်။)

အချုပ်

ယနေ့အထိ ရှိရှိသမျှ ခေတ်ဟောင်း ခေတ်သစ် မြန်မာအဘိဓာန်နဲ့ သတ်ပုံကျမ်းတွေထဲမှာ မြန်မာအဘိဓာန် အကျဉ်းချုပ် (၁၉၇၈-၇၉-၈၀) ထုတ် ၅ တွဲဟာ အပြည်စုံဆုံး၊ အားထားထိုက်ဆုံးဖြစ်ပါတယ်။ ဒီ ၅ တွဲ pdf ဖိုင် လိုချင်သူတိုင်းဆီကို Messenger သို့မဟုတ် Email ကနေမှာရင် ပို့ပေးနေတာ လူ ၁၀၀ ကျော်ပြီ။

တယောက်တည်းကနေ သိပ္ပံနဲ့ သင်္ချာ ဖေါ်မြူလာနည်း၊ ပုံသေနည်း၊ တက္ကဗေဒနည်းတွေနဲ့ တွေးထင် ယူဆနေတာတွေ မမှန်နိုင်လောက်ပါ။ 

ဘယ်အရာ ဘယ်ပညာရပ်မဆို ဆရာကောင်းလိုတယ်။ ဖေ့စ်ဘွတ် အကောင့် ရှိသူတိုင်းကို ဆရာမတင်ပါနဲ့။

၁၉၈၆ ခုနှစ် မတိုင်ကထုတ်တဲ့ စာအုပ်တွေ မူရင်းအတိုင်းရှိပါတယ်။ လိုအပ်တိုင်း အကိုးအကားအဖြစ် တင်ပြပါတယ်။

ကျွန်တော်တင်ပြနေတာတွေဟာ ကျွန်တော့ကိုယ်ပိုင် စာလုံးပေါင်းသတ်ပုံတွေ မဟုတ်ပါခင်များ။ ဆရာကောင်းတပည့် ခံယူပါတယ်။

ဒေါက်တာတင့်ဆွေ