Do no harm ရောင်းပန်းလှပါစေသတည်း

စာလုံးပေါင်းသတ်ပုံတွေအကြောင်း တင်ပြနေတာ ၁၀ နှစ်ကျော်ပြီ။ စာပုဒ်ရေ တထောင်ကျော်ပြီ။

ဘယ်အရာမဆို အကောင်းအဆိုး ဒွန်တွဲနေလေ့ရှိတယ်။ သတ်ပုံမှန်အောင်ရေးမိရင် အခက်အခဲ ရှိနိုင်တာတွေကိုလည်း တင်ပြထားပါတယ်။

သတ်ပုံတွေကို ကျွန်တော်တင်ပြနေတဲ့အတိုင်း မှန်အောင်ရေးရင်

• ကျောင်းသူကျောင်းသားတွေ စာမေးပွဲ အမှတ်မရနိုင်။
• ဆရာဆရာမ အလုပ်ထိခိုက်နိုင်။
• ရုံးဝန်ထမ်း ထုချေလွှာတောင်းခံရနိုင်။
• စာအုပ်ထုတ်ချင် “တ ရီပလေ့စ် အောလ်” နဲ့ ပြင်ပေးခံရနိုင်။ မဟုတ်ရင် ဖတ်တဲ့သူ ရှိမည်မဟုတ်။

ကြော်ငြာနဲ့ ဆိုင်းဘုတ်ကို မှန်အောင်ရေးရင်

• လာစားသူ၊ လာသောက်သူလည်း ရှိမှာ မဟုတ်ပါ။
• လာဝယ်သူလည်း ရှိမှာ မဟုတ်ပါ။
• အွန်လိုင်းကနေ အမှာစာ ရမှာမဟုတ်။

မြန်မာပြည်ကဆရာဝန်တိုင်း ဘွဲ့ရပြီးတာနဲ့ ပဋိညာဉ်ဆိုကြရတယ်။ Hippocratic Oath ဟစ်ပိုကရေးတီးစ် အုသ် လို့ခေါ်တယ်။

ပဌမဆုံးကျင့်ဝတ်ကတော့ "do no harm" ဖြစ်ပါတယ်။

တိုက်ရိုက်ဘာသာပြန် "မထိခိုက်စေရ" ဆိုတာ ကျမ်းသစ္စာ လိုရင်းမဟုတ်ပါ။

ဆရာဝန်တဦးဟာ လူနာကို ကိုယ့်ကြောင့်တော့ ဒုက္ခပိုမရောက်စေရပါ။

အလားတူ ကျွန်တော်တင်ပြနေတဲ့ မြန်မာစာကြောင့် ဈေးရောင်းသူတွေ၊ ကျောင်းသားတွေ၊ ဆရာတွေ၊ ရုံးဝန်ထမ်းတွေကို ဒုက္ခပိုမရောက်စေချင်ပါ။

ကာလာမသုတ် နဲ့ Critical thinking တွေကို စာအုပ်ထဲမှာသာ ထားခဲ့ပါ။

အထက်ကခိုင်းတာကိုသာ မျက်စိမှိတ်၊ ဦးနှောက်ပိတ်ပြီး လက်အံသေသေနဲ့သာ လိုက်နာ ရေးသားကြစေလိုပါတယ်။

ခေတ်မကောင်းသေးပါ။ ခေတ်ကောင်းချိန်အတွက် ရေးထားတာဖြစ်ပါတယ်။

ရောင်းပန်းသည် မမွှေးသော်လည်း လှပါစေသတည်း။

The Most Beautiful Flower Shops in San Francisco

ဒေါက်တာတင့်ဆွေ