မိမိပြောဆို၊ ရေးသား၊ ဝတ်ဆင်၊ သီဆို၊ ချက်ပြုတ်လုပ်ကိုင်နေသည်ကို တခြားတစုံတဦးကနေ အကြံပေးခြင်း၊ ထောက်ပြခြင်း၊ ပြုပြင်ပေးခြင်း ခံရတဲ့အခါ တချို့က ပြင်းပြင်းထန်ထန်၊ ခါးခါးသီသီး၊ ဒေါသတကြီး တုံ့ပြန်မှု ပြုကြလေ့ရှိကြတယ်။
သူ့ကိုယ်သူကာကွယ်လိုတဲ့ တုံ့ပြန်မှု မြန်ဆန်စွာ ဖြစ်ပေါ်လာခြင်းဟာ သူ့ပုံရိပ်မတည်ငြိမ်မှုအသွင်ဆောင်တယ်။
ကိုယ့်အဖြစ်မှားကို ပြန်လည်ဆန်းစစ်ခြင်း မပြုကြ။ ဖြစ်လာတဲ့ အဆင်မပြေမှုကနေ ရှောင်ခွာလိုခြင်းကြောင့် အဲလိုတုံ့ပြန်တာဖြစ်တယ်။
ဒါပေမဲ့ အခြေအနေအားလုံးမှာ ထပ်တူကောက်ချက် ဆွဲလို့မရပါ။
ပြုပြင်ပြောကြားတဲ့ ပုံစံ၊ ပြောပြသူနဲ့ လက်ခံသူတို့ရဲ့ ဆက်ဆံရေး၊ ပတ်ဝန်းကျင် စတဲ့ အချက်တွေကိုလည်း သတိပြုရပါမယ်။
ခါးခါးသီးသီး လက်မခံသူဟာ ပင်ကိုယ်သဘောအရလည်း ပြုပြင်ရခက်ခဲသူ ဖြစ်နိုင်တယ်။
ပညာ၊ သုတ၊ စဉ်းစားဉာဏ်မမီသူလည်း ဖြစ်နိုင်တယ်။
အပြောအဆိုခံရချိန်အခိုက်အတန့်မှာ စိတ်မကြည်မလင် ဖြစ်ကောင်းဖြစ်နေနိုင်တယ်။ ဥပမာ မိသားစု၊ အပေါင်းအသင်းနဲ့ အဆင်မပြေမှုတခုခုရှိခြင်း၊ အရက်၊ မူးယစ်ဆေးသုံးစွဲထားခိုက်ဖြစ်ခြင်း။
ကိုယ်ပုံရိပ် မတည်ငြိမ်မှု - ကိုယ့်အပေါ် ယုံကြည်သည့် ပုံရိပ်၊ သဘောတရား၊ စွမ်းရည်တို့ကို ဝန်းရံထားသော အတ္တမာနကနေ အဆိုပါပုံရိပ်အား ချိုးဖောက်ဝင်ရောက်သော ပြင်ချက်များကြောင့် ခြောက်လှန့်ခံစားရသည်။
မှားသွားမည်ဟု ကြောက်ရွံ့ခြင်း - အတ္တမာနသည် မှန်နေလျှင်၊ ချီးကျူးခံချင်၏။ ဆန့်ကျင်မှုရှိတဲ့အခါ မှားသွားသည်ဟု အသိအမှတ်ပြုရန်ကို ဆန့်ကျင်တတ်သည်။
ပြင်ဆင်ချက်ကို တိုးတက်ရေးအတွက်အခွင့်အရေး မဟုတ်ဘဲ ကိုယ့်လာပစ်မှတ်ထားသည်ဟု သဘောပေါက်လိုက်သော် လွယ်ကူလေ့မရှိ။
ကိုယ့်ကိုယ်ကို ကာကွယ်ရန် အမြန်တုံ့ပြန်ပြီး ကြမ်းတမ်းမှု၊ သွေးပူခြင်း သို့မဟုတ် ဂုဏ်ယူကြီးမားမှုကြောင့် စဉ်းစားခြင်းသဘောထားထက် အလျင်အမြန် ကာကွယ်လိုမှုက ရှေ့တန်းရောက်တတ်သည်။
လက်တွေ့သဘောအရ
ဆိုရှယ်မီဒီယာ ပလက်ဖေါင်းတွေမှာ ကိုယ့်ကိုထောက်ပြသူကို ဘယ်သူဘယ်ဝါ မစဉ်းစား၊ မစူးစမ်း၊ ထောက်ပြချက်တွေကလည်း လူသိရှင်ကြား ဖြစ်လို့ အဆင်မပြေမှုတွေ ဖြစ်သင့်တာထက် ပိုများ၊ ပိုမှားနေကြတယ်။ မလိုလားအပ်တဲ့ မိတ်ဆွေဖြစ်ခြင်းကို ပျက်ယွင်းစေပါတော့တယ်။ အကျိုးထက် အဆိုးရစေတယ်။ ယဉ်ကျေးမှု နည်းစေတယ်။ သတိပြုကြပါကုန်။
ဒေါက်တာတင့်ဆွေ
Comments
Post a Comment