စိတ်ကူးစိတ်သန်း ပေါက်လွှတ်ပဲစား

စိတ်ကူးစိတ်သန်း ပေါက်လွှတ်ပဲစား

မေးခွန်းတခု = ဆရာ ခင်ဗျား စိတ်ကူးစိတ်သန်း မှန်ပါသလား စိတ်ကူးစိတ်သန့် မှန်ပါသလား နှစ်ခုစလုံးမှန်ပါသလား ကျွန်တော် စိတ်ကူးစိတ်သန်း ကို မှန်တယ်လို့ ပိုယုံကြည်သော်လည်း  ပိုသေချာစေလို၍ မေးမြန်းရခြင်းဖြစ်ပါတယ်။

ပြန်စာ

(၁)

စိတ်ကူးစိတ်သန်း = အတွေးအတော။ အကြံအစည်။

ဤတာဝန်ခံ အမတ်တို့၏ စိတ်ကူးစိတ်သန်းနှင့်။ သရာဇ။ ၂၆၁။

စိတ်ကူး = တွေးတောသည်။ ကြံစည်သည်။

ကိုယ့်ဘာသာ စိတ်ကူးလို့၊ ရွှေဖူးကို လက်တင်။ ဝိရီ၊ ပ။ ၃၂၄။

စိတ်သန့် (နာမ်) = သန့်ရှင်းသောစိတ်။

စိတ်သန့် (ကြိယာ) အပြစ်ရှိသည်ဟု မထင်မှတ်။

မြန်မာလို အသုံးစကားတွေမှာ စုံတွဲစကားစုတွေ ရှိတယ်။ ရှေ့နှစ်လုံးနဲ့ နောက်နှစ်လုံး ခွဲခြားတဲ့အခါ အဆက်အစပ်မရှိပါ။

စိတ်ကူးစိတ်သန်း

စိတ်ကူးနဲ့ စိတ်သန်း ဆက်စပ်ယူလို့ မရပါ။

စိတ်သန်း မရှိ။ စိတ်သမ်းလို့သာရှိတယ်။

ရမ်းသမ်းလို့ ရှိတယ်။ ရမ်းသန်း မရှိပါ။

စိတ်သန်းလည်း မရှိပါ။ ရမ်းသမ်းပြောသည်လို့သာ ရှိတယ်။

(၂)

ပေါက်လွှတ်ပဲစား = အထိန်းအကွပ်မဲ့။ စည်းမရှိကမ်းမရှိ။

ကလေးတွေကိုကိုယ်လုံးတီးဖြင့် ပေါက်လွှတ်ပဲစားလွှတ်ထားကြ၏။ တောင်များ၏တောင်ဘက်။ ၂၆၀။

လှေကလေးများတွင် လှေကြီးများကဲ့သို့ ပဲ့ပေးသော ပဲ့တက်မပါဘဲ၊ လှော်တက်ဖြင့်သာ ပဲ့၍ပေးသဖြင့် ထိုလှေမျိုး ကို ပေါက်လွှတ်လှေဟု ခေါ်သည်။

လူများတွင်လည်း ပေါက်လွှတ်လှေကဲ့သို့ ပဲ့ကိုထိန်းချုပ်ခြင်းမရှိဘဲ၊ လွှတ်ထားရသည်ကို ပေါက်လွှတ်ပဲစားထားသည်ဟု ဆိုကြသည်။

ပေါက်လွှတ် နဲ့ ပဲစား ကို ခွဲခြားမှတ်ယူလို့ မရပါ။

(၃)

ဒရောသောပါး = ကတိုက်ကရိုက်။ အလောတကြီး။ ဒရောမျောပါး။

အိမ်ပေါ်မှ ဒရောသောပါးပြေးဆင်းလာကာ။ ကမ္မ။ ၁၇၁။

ဒရော နဲ့ သောပါး ကိုခွဲယူလို့မရပါ။

ဒေါက်တာတင့်ဆွေ