"ရှင်နဲ့ နှစ်ယောက်ထဲကျမှ ရေးပြချင်ပါတယ်"
မြို့မငြိမ်းရေးပြီး လေဘာတီ မမြရင် ဆိုခဲ့တဲ့ နှစ်ယောက်ထဲ ဆိုတဲ့သီချင်းကို ဒေါ်မာမာအေး ဆိုထားတာ အားလုံးကြားဖူးကြမှာပါ။
အဲဒီသီချင်း ပထမပိုဒ် မှာ
"အာကာလွှာပုံပြုလို့ မေယု ကလောင်သဖွယ် သမုဒ်မင်ရေခြယ် ချစ်တာတွေ တွင်တွင်ပြော မောနိုင်ဘူးတဲ့မောင်ရယ် သူ့ခေတ်နဲ့တော့သူတွင်ကျယ် သူတို့ကိုလည်း ပြိုင်ဖို့ မလိုဘူးထင်တယ် နှလုံးသွေးအစစ်နဲ့ ချစ်တာတွေကိုမောင်ရယ် ရှင်နဲ့ နှစ်ယောက်ထဲကျမှ ရေးပြချင်ပါတယ်"
အဲဒီနေရာမှာ တချို့က "ရှင်နဲ့ နှစ်ယောက်ထဲကျမှ ပြောပြချင်ပါတယ်" လို့ အမှတ်တမဲ့ ဆိုတတ်ကြတယ်။
အာကာပြင်ကို စာလွှာ၊ မြင့်မိုတောင်ကို စုတ်တန်၊ သမုဒ္ဒရာကို မင် သဘောနဲ့ ချစ်တာတွေကို အားရပါးရ ရေးပြချင်တယ်လို့ ပြောတာမို့ "ရေးပြချင်ပါတယ်" ဆိုမှ မှန်ပါတယ်။ "ပြောပြချင်ပါတယ်" မဟုတ်ပါဘူး။ (လှဘူး)
ဒေါက်တာလှဘူး ကျေးဇူး။ ဘောက်ခါးကိုလည်း ဖွင့်ဆိုချက်တခု ဖတ်ရဘူးတယ်။
မြောက်အမေရိကတိုက်တခုလုံးသို့ အန္တရာယ်ကြီးသော မုန်တိုင်းကြီး အာတိတ်ဒေသက လာတယ်။ အာတိတ်ဒေသဆိုတာ မြောက်ဝင်ရိုးစွန်းနားမှာ။ မြန်မာပြည်မှာ မဟုတ်ပါ။ မြန်မာပြည်ထဲမှာ နှစ်ယောက်တည်းနေချင်တယ်သီချင်း ဆိုကောင်းဆိုနေကြပါမည်။
နှစ်ယောက်သား ဘောက်ခါးစို့လားမောင်ရယ် အဓိပ္ပါယ်လေးသိပါရစေခင်ဗျ
- ဖေါက်ကား ရောင်းဝယ်ဖေါက်ကား
- အညာဒေသမှာဘောက်ခါးသီးဆိုတာရှိတယ်တဲ့ အဲဒီအသီးကတစ်ခိုင်(တခိုင်)မှာနှစ်လုံးပါပြီး ပူးကပ်သီးနေကြတယ်လို့။ စာပေဟောပြောပွဲတစ်ခု(တခု)မှာ နားထောင်ဖူးပါတယ်
- ပေါရာဏစကား။ စကားလက်ဆုံ ပြောမကုန်။ လူထု ဒေါ်အမာရေးတဲ့ ပြည်သူချစ်သော အနုပညာသည် စာအုထဲ ပါပါတယ်။
- ဘောက်ခါး ဘားခေါက် အိမ်မှာသောက်။ ငယ်တုံးကဖွင့်ဆို
- ဖေါက်ကားစို့လားကအသံပြောင်းသွားတာလား
- ဘောက်ခါး အမှန်ပါ
- မှားတယ်မပြောပါ။ အသံပြောင်းလာတယ်ထင်လို့
- အဲဒီခေတ်ဗန်းစကားပါတဲ့
- အဝှါပြုတာကို ပြောတာလားမသိ
ကျွန်တော့ကို မေးတာတော့ မဟုတ်ပါ။ သီချင်းကိုဆိုတဲ့ မာမာအေးရေးတာကို တင်ပြပါမယ်။
ဆရာမြို့မငြိမ်းရဲ့သီချင်းကို မြို့မက ပြန်ဖော်တဲ့အခါ နှစ်ယောက်ထဲက စပြီး မာအေး ဆိုခဲ့ပါတယ်။ ဆန့်ကျင်တယ်ဆိုရင် ကမ္ဘာ့ပြင်ထွက်လို့ နှစ်ယောက်သား ဘောက်ခါးစို့လားမောင်ရယ် အဲဒီလို ဆိုမိတဲ့အခါ ဘောက်ခါးကို လူတွေက မေးတယ်။ ကိုယ်ကလဲ မေးပါတယ်။ လက်ဖက်ရေကြမ်းဝိုင်းဆင်ပြီး အကြိတ်အနယ် ပြောကြငြင်းကြတဲ့ ဘောက်ခါးဝိုင်းက ဘုဘောက်ကျတဲ့ အဓိပ္ပါယ်ကို ယူတဲ့ မန္တလေးသုံး ဘန်းစကားလို့ ကြေားခဲ့ရပါတယ်။ (မာမာအေးရဲ့ ပြောပြစရာတွေ တပုံကြီးရှိသေးတယ် အမှတ် ၃၁၀၊ မြို့မငြိမ်း ရာပြည့်၊ ၁၄-၃-၂၀၁၀)
ဒါပေမဲ့ ခုခေတ်ဆိုရင် ပြောပြတာကမှ တော်ဦးမယ်။ ရေးပြရင် စာလုံးပေါင်းသတ်ပုံတွေ မှန်အောင်ရေးတတ်သူက အလွန်ရှားပါးသွားပြီဆရာ။
ရှင်နဲ့ နှစ်ယောက်ထဲကြမှ တဲ့။ မှားရော။ တစ်ကယ်မမက်ပါတယ် တဲ့။ ပျက်ရော။ ကမ႓ာမြေတစ်ခွင်လုံး တဲ့။ ပျက်ရော။
မြင့်မိုရ် ကိုလည်း မြင်းမိုရ် လို့ နိုင်ငံတော်မူလုပ်ထားသေးတာ။ မူကွဲသာ ဖြစ်ပါတယ်။
နှစ်ယောက်ထဲ
ရေး - မြို့မငြိမ်း
ဆို - မာမာအေး
နှစ်ယောက်ထဲဆိုရင် စကားလက်ဆုံဝင်
ပြောရုံနဲ့ပင် အရသာထူး ရူးတယ်လို့ ရူးတယ်လို့ ဆိုချင်ဆို
ကျိန်စေချင် ကျိန်ပါ့မယ်
နတ်စည်းစိမ်ဆယ်သက် တကယ်မမက်ပါတယ်
စမ်းချင်တယ်ဆိုရင် ကမ႓ာ့အပြင်ထွက်လို့
နှစ်ယောက်သား ဘောက်ခါးစို့လား မောင်ရယ်
လောကကြီးကို မေ့ပြီးပြစ်နိုင်တယ်
အရင်က ရှင်တို့ ကျွန်မတို့
အဖေနဲ့အမေတွေ ဘိုးအေတွေ
ဘွားအေတွေ နှစ်ယောက်ထဲ တွေ့ကြဆဲအခါဝယ်
အာကာ လွှာပုံပြုလို့ မေရုကလောင်သဖွယ် သမုဒ် မင်ရည်ချယ်
ချစ်တာတွေတွင်တွင်ပြောလို့ မောနိုင်ဘူးတဲ့မောင်ရယ်
သူ့ခေတ်နဲ့တော့သူ တွင်ကျယ်မယ် သူတို့ကိုလဲ ပြိုင်ဖို့ မလိုဘူးထင်တယ်
နှလုံးသွေးအစစ်နဲ့ ချစ်တာတွေကိုမောင်ရယ်
မောင်နဲ့ နှစ်ယောက်ထဲကျမှ ရေးပြချင်ပါတယ်
မောင်ရယ် နှစ်ယောက်ထဲဆိုရင် မောင်ရယ်
ဧဝရတ်တောင်ထိပ် နေချင်ရင်အတူသွားသွား
ရေရှားတဲ့ သဲကန္တာရ ဆာဟာရ မရှောင်တယ်
နေမမြင် ရေပြင်ခဲတဲ့ မြောက်ဝန်ရိုးစွန်းကိုပဲ ခေါ်ခေါ်ပျော်ပါတယ်
သဲသဲမဲမဲ ဇွဲနဲ့ နှစ်ယောက်ထဲနေချင်တယ်
ချိန်းတဲ့ညကျမှ ငွေလရောင်သူတွင်ကျယ်
ကမ႓ာမြေတခွင်လုံး မြူမဖုံး တိမ်မကွယ်
ထက်ကောင်းကင်ဝယ် ထိန်ထိန်သာတော့တယ်
မှောင်မိုက်မိုက် ချောင်ကြိုက်ကြတဲ့အခါမယ်
လောကွတ် ချော်တော်မူအားတယ်
ဖိုးလနတ်သား တိမ်ကြားမြုတ်စေသားလို့
ဆုတောင်းရမလား သတိထား တော်တော်ကျယ်
မောင်ရယ် နှစ်ယောက်ထဲဆိုရင် မောင်ရယ်
ဧဝရတ်တောင်ထိပ် နေချင်ရင်အတူသွားသွား
ရေရှားတဲ့ သဲကန္တာရ ဆာဟာရမရှောင်တယ်
နေမမြင် ရေပြင်ခဲတဲ့ မြောက်ဝန်ရိုးစွန်းကိုပဲ ခေါ်ခေါ်ပျော်ပါတယ်
သဲသဲမဲမဲ ဇွဲနဲ့ နှစ်ယောက်ထဲနေချင်တယ်
စိမ်းရွက်ညို ကြိုအကြားက ပြောက်ပြောက် ကျားကျား ရောင်ခြည်ဝင်တယ်
မြေပြင် ငွေမင်လူးသည့်နှယ် လရောင်တွင် မကြောင်ဝံ့လို့
သစ်ပင်အောက်မှာမှောင်ခိုကာရယ်
နှစ်ယောင်သား တွေ့ကြရာဝယ်
မောင်ရယ် အကျီစားသန်ရန်ဖြစ်ရလိမ့်မယ်
ဒါ နှုတ်ဆက်တာလား မျက်နှာထား မယုံစဖွယ်
အံတကြိတ်ကြိတ် ထိတ်များ ထိတ်ပါမိတော့တယ်
မောင်ရယ် နှစ်ယောက်ထဲဆိုရင် မောင်ရယ်
ဧဝရတ်တောင်ထိပ် နေချင်ရင်အတူသွားသွား
ရေရှားတဲ့ သဲကန္တာရ ဆာဟာရမရှောင်တယ်
နေမမြင် ရေပြင်ခဲတဲ့ မြောက်ဝန်ရိုးစွန်းကိုပဲ ခေါ်ခေါ်ပျော်ပါတယ်
သဲသဲမဲမဲ ဇွဲနဲ့ နှစ်ယောက်တည်းနေချင်တယ်။ ။
https://www.facebook.com/watch/?v=223554558853339
အခုလင့်မှာလည်း ထဲ ကို တည်း လုပ်ထားတယ်။ မမှန်ပါ။
ဒေါက်တာတင့်ဆွေ
Comments
Post a Comment