၆-၃-၁၉၆၂ နေ့မှာ ရန်ကုန်တက္ကသိုလ် ကျောင်းသားသမဂ္ဂ အဆောက်အဦကြီးကို ဒိုင်းနမိုင်းနဲ့ ခွဲဖြိုလိုက်တယ်။ ဇူလိုင်လ ၇ ရက်နဲ့ ၈ ရက်တွေမှာ ရန်ကုန်တက္ကသိုလ်ကျောင်းသားတွေက ဆန့်ကျင်ဆန္ဒပြကြတယ်။
‘မြန်မာ့ဆိုရှယ်လစ်စနစ်’ ကျင်သုံးမယ်လို့ ကြေညာတယ်။ ‘ပြည်သူပိုင်သိမ်းခြင်းဥပဒေ’ ပြဋ္ဌာန်းပြီး ၁-၆-၁၉၆၂ နေ့မှာ ရှိရှိသမျှ စီးပွါးရေးလုပ်ငန်းတွေကို သိမ်းယူလိုက်တယ်။ အသိမ်းခံရတဲ့ ပုဂ္ဂလိကလုပ်ငန်း စုစုပေါင်း ၁၅၀၀၀ ရှိတယ်။ ခေါင်းစဉ်ကတော့ ပြည်သူပိုင်သိမ်းခြင်း။ တကယ်အပိုင်စီးသူတွေက စစ်တပ်ကလူတွေ။
၁၅-၅-၁၉၆၄ (၁၇-၅-၁၉၆၄) နေ့မှာ ၅ဝ တန်နဲ့ ၁ဝဝ တန်တွေ၊ ၃ဝ-၁၁-၁၉၈၅ နေ့မှာ ၂၅၊ ၅ဝ နဲ့ ၁ဝဝ တန်တွေနဲ့ ၅-၉-၁၉၈၇ နေ့မှာ၂၅၊ ၃၅၊ ၇၅ ကျပ်တန်သစ်တွေကို တရားမဝင်ကြေညာတယ်။ တကယ် အပိုင်စီးသူတွေက စစ်တပ်ကလူတွေ။
၂-၃ - ၆၄ ကနေ ၆ - ၃- ၆၄ အထိ၊ ခပေါင်းကျေးရွာမှာ တတိယအကြိမ် တောင်သူလယ်သမား နှီးနှောဖလှယ်ပွဲကနေ မတ်လ (၂) ရက်နေ့ကို တောင်သူလယ်သမားနေ့အဖြစ် ပြောင်းလဲသတ်မယ်လို့ လုပ်တယ်။ စစ်တပ်ကအာဏာသိမ်းတဲ့နေ့ မတ်လ ၂ ရက်ကို တောင်သူလယ်သမားနေ့လို့ ပြောင်းလိုက်တာ။ ဖဆပလ ခေတ်ကတည်းက နှစ်စဉ် ဇန္နဝါရီလ ၁ ရက်နေ့ကိုသာ တောင်သူလယ်သမားနေ့အဖြစ် ကျင်းပနေခဲ့တာ ဖြစ်တယ်။ တောင်သူလယ်သမားတွေကို ‘ဦးကြီး’ လို့ ခေါ်လာတယ်။ ၈-၈-၁၉၈၈ နေ့အထိ အခံရဆုံးလူ့အလွှာ များစွာထဲမှာ တောင်သူလယ်သမားတွေလည်း ပါတယ်။
‘တော်လှန်ရေး’၊ ‘ပြည်သူ’၊ ‘ဦးကြီး’၊ စာလုံးတွေကို မစားရဝခမန်း နိုင်ငံရေးလုပ်ခြင်းသာ ဖြစ်တယ်။ ကနေ့အထိလည်း ဝေါဟာရနိုင်ငံရေး ရေစုံလှိုင်းမှာ လိုက်ပါနေသူတွေက များတယ်။
‘မြန်မာ’ လို့ ပြောင်းတော့ လူတိုင်းပါးစပ်ဖျားက ‘မြန်မာ’ ‘မြန်မာ’ ‘မြန်မာ’။ ‘ဗမာ’ လို့ပြောသူ တို့ရန်သူတဲ့။
အာဏာသိမ်းကတည်းက ‘ဒီမိုကရေစီ’ စာလုံးကွယ်သလောက်ရှိရာကနေ ၁၉၉၀ ခုနှစ်မှာ ‘ပါတီစုံဒီမိုကရေစီ အထွေထွေရွေးကောက်ပွဲ’ လုပ်တယ်။
၁၉၆၂ ကတည်းက ‘ဖက်ဒရယ်’ ဝေါဟာရကို ရာဇဝတ်မှုလိုလို လုပ်ထားရာကနေ အင်နယ်လ်ဒီအစိုးရ လက်ထက်မှာ စစ်တပ်ကိုယ်တိုင်က ‘ဖက်ဒရယ်စကား’ ပြောလာပြန်တယ်။
‘ပြည်တွင်းငြိမ်းချမ်းရေး’ ခေါင်းစဉ်ကို ဗိုလ်နေဝင်းက စတယ်။ တောတွင်းကနေ တိုက်နေတဲ့အဖွဲ့တွေကို ရန်ကုန်ခေါ်တယ်။ အနည်းအကျင်းသာ ပြေလည်မှုရတယ်။ ပြေလည်သူတွေ ကောင်းစားသလိုလို။
အခုတခါ ‘ပီအာ’။ ကောင်းစားနေသူတွေနဲ့ ကောင်းစားချင်သူတွေက ဝင်ကြမယ်။ “နိုင်ငံရေးလုပ်တာ ရွေးကောက်ပွဲ ဝင်ရမှာပေါ့” တဲ့။ ကေဂျီ-ဝမ်း-တူး အမြင်နဲ့ ပြောနေကြတာ။
“နိုင်ငံရေးစကားလုံးကို စားစရာအဖြစ် မြိန်ရေရှက်ရေ သုံးဆောင်နေသူတွေ” မနည်းလှပါ။
တကယ်အပိုင်စီးမဲ့သူတွေက စစ်တပ်ကလူတွေနဲ့ ကေဂျီ-ဝမ်း-တူးတန်းက အပေါင်းပါတွေသာ။
ဒေါက်တာတင့်ဆွေ
Comments
Post a Comment