၁၉၉၁ ခုနှစ်ထုတ် မြန်မာအဘိဓာန်အသစ်ထဲမှာ တဝမ်းပူ ၇၀% လောက်ကို မလိုအပ်ဘဲ စသတ်ထားတာ တွေ့တော့ အံသြကြရတယ်။
တဝမ်းပူတွေကို စသတ်နဲ့ရေးရမယ်လို့ အထက်မိန့်ကို ၁၉၈၆ ခုနှစ်လောက်ကစပြီး ထုတ်ထားတယ်လို့ တလောက နိုင်ငံတော်သတင်းစာပါ ဆောင်းပါးတပုဒ် အရ သိလာရတယ်။ သြော်။
၁၉၈၈ ခုနှစ်နောက်စပြီး မူရင်းစာအုပ်တွေမှာ တ နဲ့ ပုံနှိပ်ထားတာကို တစ် နဲ့ ပြန်ရိုက်မှသာ ထုတ်ဝေခွင့်ရတယ်။
ကျောင်းသုံးစာအုပ်တွေထဲမှာလည်း ဂန္ထဝင်ကဗျာတွေထဲက တဝမ်းပူမှန်သမျှကို စသတ်ပြီး သင်ကြားတော့တယ်။
ဆရာဆရာမတွေအကုန် တစ်ကြရတယ်။ မဟုတ်ရင် အလုပ်ပြုတ်မယ်။ ကျောင်းသူကျောင်းသားတွေအကုန် တစ်ကြရတယ်။ မဟုတ်ရင် စာမေးပွဲကျမယ်။
လူတိုင်းက စာရေးတိုင်း အဘိဓာန်ကို မလှန်အားကြပါ။ အတုမြင် အတတ်သင်ကြရတယ်။
ဆယ်စုနှစ် ၁ ခုလောက်ကြာတော့ တဝမ်းပူ ၇၅% လောက်ကို စသတ်လာကြတယ်။
ဆယ်စုနှစ် ၂ ခုလောက်ကြာတော့ တဝမ်းပူ ၈၀% လောက်ကို စသတ်လာကြတယ်။
ဆယ်စုနှစ် ၃ ခုလောက်ကြာတော့ တဝမ်းပူ ၈၅% လောက်ကို စသတ်လာကြတယ်။
ဆရာဆရာမတွေသာမက စာရေးဆရာတွေ၊ ကဗျာဆရာတွေ၊ အယ်ဒီတာတွေအကုန် တဝမ်းပူကို အလွတ်မပေးဘဲ စသတ်တဲ့အကျင့်က ခိုင်မြဲလာတယ်။ နိုင်ငံတော်အာဏာစက်အောက်မှာ ဘယ်သူမှ လွန်ဆန်လို့မရ။ မြန်မာစာပါရဂူဘွဲကလည်း တဝမ်းပူကို စသတ်မှ ရတယ်။
တဝမ်းပူကို စသတ်တဲ့ အမှားတခုတည်းသာ မကပါ။ မူကွဲစာလုံးတွေလည်း တည်ရှိခွင့် မရတော့ပါ။
လူတိုင်းကတော့ မညံ့ပါ။
တဖြည်းဖြည်းနဲ့ မှန်အောင်ရေးတတ်သူတွေနဲ့ မှန်အောင်ရေးရဲသူဦးရေ တစတစ တိုးတိုးလာပါတယ်။ လွန်ခဲ့တဲ့ တနှစ်အတွင်း တဝမ်းပူတွေ တလုံးပြီးတလုံး လွတ်လပ်လာကြတယ်။ အရင်ကဆိုရင် ဖေ့စ်ဘွတ်မှာ စာလုံးပေါင်းသတ်ပုံ မှန်တာကို သက်သေခံအဖြစ်တင်ပြဘို့ အတော်ကိုလိုက်ရှာရတယ်။ အခုတော့ တလနှစ်လအတွင်းမှာ တကူးတက လိုက်ရှာစရာ မလိုသလောက် မှန်ကန်လာတယ်။
စာအုပ်သစ်တွေကတော မှန်အောင်ရေးတာ တအုပ်စ နှစ်အုပ်စသာ ရှိသေးတယ်။ လာပါလိမ့်မယ်။
အခုတော့ ခက်သေးတယ်။ မြန်မာစာအထက်မှာ အာဏာစက်ရှိလို့။
ပညာကို ပညာနဲ့ ဆန်းစစ်၊ လေ့လာ၊ သင်ကြား၊ ငြင်းခုန်ခွင့်တွေ ပြန်လည်ထွန်းကားလာချိန်မှာ တဝမ်းပူလည်း ကျိန်စာသင့်ရာက လွတ်မြောက်လာမယ်။
အခုစာရေးချိန်မှာ တချို့က မျိုချရခက်တဲ့ စိန်တလုံးသရက်သီးကိုသာ ကြိုက်နေကြသေးတယ်။ မူလလက်ဟောင်း ဗိုလ်တထောင်ဘုရားကို မလေးစားသူတချို့ ရှိနေသေးတယ်။
Cursed: Season 1 – Review | Netflix Fantasy Series | Heaven of Horror
ဒေါက်တာတင့်ဆွေ
Comments
Post a Comment