နှစ်ပေါင်းများစွာသုံးနေတဲ့ ဖေ့စ်ဘွတ်ကို လွန်ခဲ့တဲ့ တလကစပြီး ရက်ပေါင်း ၁၈၀ ပိတ်သည်။
မနေတတ်လို့ အဟောင်းတခု ပြန်သုံးသည်။ ခဏနေတော့ အဲဒါကိုပါ ၂၉ ရက် ပိတ်ပင်ခြင်းခံရသည်။
ဇွဲမလျှော့ပါ။ ၄ နှစ်မသုံးဘဲထားတာကို ရအောင်ပြုပြင်သုံးပြန်သည်။ ၃-၄ ရက်နေတော့ တကြိမ်မှာ ၂၄ နာရီ ပိတ်ပြန်သည်။ ၁၅ ကြိမ်ရှိပါပြီ။ သုံးရချိန်က ၂-၃ နာရီသာကြာသည်။ လိုက်ခ်လုပ်မရ၊ ကွန်မင့်ရေးမရ၊ ဖရင်းအသစ် ထည့်မရ။ မရတာလေးတခုခုကို သွားထိမိရင် ပြစ်ဒဏ်နာရီတိုးပြန်ပါသည်။
ကနေ့ နေ့လယ် ၁၁ နာရီကျော်ကစပြီး ၂၉ ရက်ပြစ်ဒဏ်ကနေ လွတ်မြောက်လာပြီ။
ဖေ့စ်ဘွတ်ကို အရင်ကလို သုံးချင်သလိုသုံးရတဲ့ ပြန်လည်ရရှိလာတဲ့ အတွေ့အကြုံကို မနေတတ်သလို ဖြစ်နေသည်။
၂၉ ရက်ကျင့်သားရထားတော့ အဆန်းဖြစ်သည်။
အခုပြန်ရတာတဲ့ အသုံးပြုခွင့်က ဘယ်တော့ ဘယ်နှစ်နာရီမှာ ပြန်ပိတ်မယ်လည်း မသိနိုင်။ အစိုးမရခြင်း တရားရပါသည်။
လောကဓံအစစ်
ပုလဲမှာနေစဉ်ကဆိုရင် အိမ်မှာလည်း လူအပြည့်၊ ဆေးခန်းမှာလည်း လူနာတွေနဲ့ လူနာစောင့်တွေ အပြည့်။ အိမ်ရှေ့မှာ လည်းဝိုင်းရှိခဲ့သည်။ အခြွေအရံတွေလည်း ပေါများခဲ့ပါသည်။
အိန္ဒိယမှာ နိုင်ငံရေးကလည်း ၂၄ နာရီ။ ယမုန်နာဆေးခန်းလေးက တပတ်မှာ ၃ ရက်။ မွေးလူနာတွေကိုလည်း ၂၄ နာရီ။ ကျင့်သားရခဲ့သည်။
နယူးဒေလီကနေ ယူအက်စ်အေကို ပြောင်းလာစဉ်က လင်မယားနှစ်ယောက်မှာ လပ်ဂေ့ချ် အိတ်ကြီး ၂ အိတ်စီသာ ယူခွင့်ရသည်။ နှစ်ယောက်တည်းနေရတဲ့ အခန်းလေးမှာနေရသည်။ စလယ်ဝင်အိုးလေး ပြန်ဖြစ်သွားသည်။ ရောက်စမှာ မနေတတ်သလိုဖြစ်ကြရပါသည်။
ဒီအရပ်မှာ နိုင်ငံရေး မရှိ။ လူနာမရှိ။ အသိုင်းအဝန်းလည်း ကျဉ်းမြောင်းသွားပြီ။ သူ့ကိုယ်မသိ၊ ကိုယ့်သူမသိ။
နှစ်နည်းနည်းကြာတော့ ကျင့်သားရလာပါသည်။
အခုတော့ နိုင်ငံရေးမှာ ကိုယ့်ထက်လူစွမ်းကောင်းတွေ အများကြီး လုပ်ကိုင်နေကြပြီ။
လာဘ်ပေါများခြင်း၊ လာဘ်နည်းခြင်း။ အခြံအရံများခြင်း၊ အခြံအရံနည်းခြင်း၊ ချီးမွမ်းခံရခြင်း၊ အကဲ့ရဲ့ခံရခြင်း၊ ချမ်းသာခြင်း၊ ဆင်းရဲခြင်း လောကဓံတရားများလည်း ကျင့်သားရနေပါပြီ။
ဆိုရှယ်မီဒီယာတွေ မပေါ်ခင်ကတော့ အိန္ဒိယမှာ အီးမေးလ်ကနေ နေမကောင်းလို့မေးတာတွေကို နိုင်ငံရေးအလုပ် အားချိန်မှာ တနေကုန်တနေခန်း ဖြေရသည်။
ဆေးပညာစာတွေ ထောင်ဂဏန်းမနည်းမနော ရေးထားပြီးပြီ။
ဒီကိုနေရာကိုတော့ မြန်မာစာဟူသော အကြောင်းအရာသစ်ကို ရေးပါသည်။ ၉ နှစ်အတွင်းမှာ ရာဂဏန်း မနည်းတော့ပါ။
ဖေ့စ်ဘွတ်က ရာသက်ပန်ပိတ်ခံရနိုင်တယ်လို့ အကြိမ်ကြိမ် ဆိုထားသည်။
ရေးတာတွေ ကျန်ရစ်ပါလိမ့်မည်။ ဆေးပညာဟူသည် သစ်လေကောင်းလေ။ မြန်မာစာကား ဟောင်းလေ မှန်လေ။
လူ့ဘဝထဲ ရောက်လာတုန်းကလည်း တယောက်တည်း။
လောကဓံတရားများ ကျင့်သားရနေပါပြီ။
ဒေါက်တာတင့်ဆွေ
Comments
Post a Comment