ဥက္ကဋ္ဌကြီးခင်ဗျား

(က)

နိုင်ငံတော်သမ္မတကြီး ဦးနေဝင်း၏ ညွှန်ကြားချက်များ

၂။ မြန်မာစာလုံးပေါင်းသတ်ပုံနှင့် စပ်လျဉ်း၍လည်း ၁၉၆၄ ခု၊ မေလ၊ ၁၄ ရက်နေ့တွင်

“မြန်မာစာပေပြုစုရေးနှင့် ဘာသာပြန်ကော်မရှင်” အဖွဲ့ဝင်များကို အစိုးရဂေဟာသို့ ဖိတ်ခေါ်၍ တော်လှန်ရေးကောင်စီဥက္ကဋ္ဌကြီး (ယခု နိုင်ငံတော်သမ္မတကြီး ဦးနေဝင်း) က “စကားပြောသံကလဲ ပြောင်းတယ်။ တခု၊ နှစ်ခု၊ သုံးဂု လို့ ပြောင်းတယ်။ ပြောင်းတဲ့အတိုင်းရေးယင် မကောင်းဘူးလား။ စာပျက်နေတဲ့ဥစ္စာကို ထပ်ပြောပါရစေအုံး။ သတ်ပုံကလဲ ကိုးရိုးကားရား၊ အကြောင်းအရာကလဲ ကိုးရိုးကားရားဖြစ်နေတယ်။ ရေးတဲ့အတိုင်း ဖတ်ယင် မဖြစ်ဘူးလား။ ရေးတော့အမှန် ဖတ်တော့ အသံဆိုတော့ ဒုက္ခသိပ်ရောက်တယ်။” ဟူ၍ မိန့်ကြားခဲ့ပါသည်။

(ခ)

မြန်မာစာလုံးပေါင်းသတ်ပုံကျမ်း

နိဒါန်း

၁။ တော်လှန်ရေးကောင်စီဥက္ကဋ္ဌကြီး (ယခု နိုင်ငံတော်သမ္မတကြီးဦးနေဝင်း) သည် မြန်မာစာပေ မြန်မာယဉ်ကျေးမှု အစဉ်အလာတို့ကို ထာဝစဉ်ရှင်သန်တည်တံ့စေရန်အတွက် ကောင်းမြတ်သောစေတနာဆန္ဒဖြင့် ၁၉၆၃ - ခု၊ ဒီဇင်ဘာလ ၂ ရက်နေ့တွင် မြန်မာနိုင်ငံ မြန်မာစာပေ ပြုစုရေးနှင့် ဘာသာပြန်ကော်မရှင်ကိုဖွဲ့စည်း တည်ထောင်ပေးခဲ့ပါသည်။ ထိုကော်မရှင်သည် အစိုးရရုံးသုံး စံ မြန်မာရေးထုံးကျမ်းတစောင် ပေါ်ထွက်လာရေး လုပ်ငန်းတရပ်ကိုလည်း ဆောင်ရွက်ရမည်ဟု ဥက္ကဋ္ဌကြီးက ထပ်မံညွှန်ကြား သတ်မှတ်ပါသည်။ ၁၉၆၄ ခု ဖေဖော်ဝါရီလ ၂၅ ရက်နေ့တွင် အဘိဓာန်နှင့် ရေးထုံးကော်မတီကို ဖွဲ့စည်းပေးပါသည်။ ထိုနောက် ၁၉၇၁ ခုနှစ်တွင် မြန်မာစာပေ ပြုစုရေးနှင့် ဘာသာပြန် ကော်မရှင်ကို မြန်မာစာကော်မရှင် အမည်ဖြင့် ပြန်လည် ပြောင်းလဲ ဖွဲ့စည်းခဲ့ပါသည်။ ၁၉၇၄ ခုနှစ်တွင် ယခင် အဘိဓာန်နှင့် ရေးထုံးကော်မတီက ပြုစုခဲ့သော မြန်မာရေးထုံးကျမ်းကို လုပ်ငန်းသဘာဝအရ ပြန်လည်စိစစ်ရန် မြန်မာစာကော်မရှင်၊ မြန်မာရေးထုံးကျမ်း ပြန်လည် စိစစ်ပြုပြင်ရေးအဖွဲ့ကို ဖွဲ့စည်းပေးခဲ့ပါသည်။

၁၉၆၄ ခုနှစ် သြဂုတ်လ ၂၇ ရက်နေ့တွင် ကျောင်းသုံးစာအုပ်ကော်မတီ အစည်းအဝေးကို တော်လှန်ရေးကောင်စီဥက္ကဋ္ဌရုံး၌ ကျင်းပစဉ် ဥက္ကဋ္ဌကြီး (ယခု နိုင်ငံတော်သမ္မတကြီး ဦးနေဝင်း) က အသံကိုရေးတဲ့အခါ အမှန်ရေး။ ့ စည်းကမ်းဆိုတာ အတိအကျရှိရမယ်။ ့ စကားတလုံးနှင့် ခုနစ်နှစ် ငြင်းနေလို့ ဘယ်ဖြစ်မလဲ။ နောက်ဆုံးတော့ တခုခုကို ပညတ်ရမှာပဲ။ မူကို ဦးစွာချပါ။ နောက် မူအတိုင်းလုပ်။ ဒါလောက်ပျက်နေတာကို ပြင်ရမှာပဲ။ ဒါပေမယ့် အချိန်ကိုလည်း ထည့်စဉ်းစားပါ။ မြန်မြန်ထက်ထက် လုပ်နိုင်ယင် ကောင်းမယ် ဟူ၍ မိန့်ကြားခဲ့ပါသည်။

မှတ်သားရန်များ

လဲ၊ အုံး၊ ယင် အသုံးတွေကို နောက်ပိုင်းမှာ စိစစ်ပြင်ဆင်လာခဲ့ပါတယ်။

သမ္မတ နဲ့ သမတ မူကွဲအဖြစ် ဆက်ရှိတယ်။

လုပ်ငန်းတရပ်ကိုလည်း၊ စကားတလုံးနှင့်၊ တခုခုကိုတွေမှာ တစ်တွေနဲ့ မရေးပါ။ 

(ဂ)

ဥက္ကဋ္ဌကြီးခင်ဗျား

‘တခု’ လို့ ရေးပြီး၊ ‘တခု’ လို့ အသံထွက်ပါတယ်။

‘နှစ်ခု’ လို့ ရေးပြီး၊ ‘နှခု’ လို့ အသံထွက်ပါတယ်။

‘သုံးခု’ လို့ ရေးပြီး၊ ‘သုန်းဂု’ လို့ အသံထွက်ပါတယ်။

‘တစ်ခု’ လို့ ရေးရင်လည်း၊ ‘တစ်ခု’ လို့သာ အသံထွက်ပါတယ်။ ‘တခု’ သံ ထွက်ခိုင်းလို့ မရပါ။

ဥက္ကဋ္ဌကြီးပြောကြားချက်ဟာ “ရေးတော့တခြား၊ ဖတ်တော့တလွဲ” ဖြစ်နေပါတယ်။

၁၉၇၈ ခုနှစ် ဇန်နဝါရီလထုတ် မြန်မာစာ စာလုံးပေါင်းသတ်ပုံကျမ်း နိဒါန်း https://burmese-spelling.blogspot.com/2022/11/blog-post_445.html

မြန်မာစာ စာလုံးပေါင်းသတ်ပုံ ပြောင်ခဲ့ခြင်း ဖြစ်စဉ်သမိုင်း သုတေသန https://burmese-spelling.blogspot.com/2024/12/blog-post_737.html

မြန်မာစာလုံးပေါင်းသတ်ပုံကျမ်းများ သမိုင်း https://burmese-spelling.blogspot.com/.../blog-post_24.html

ဒေါက်တာတင့်ဆွေ