ဟာ

ဟာ

၁။ 'က' နဲ့ 'ဟာ' ဘာကွာသလဲ သိပါရစေဆရာ။ ဥပမာ - (၁) ကျွန်တော်က မင်းသားဖြစ်တယ်။ (၂) ကျွန်တော်ဟာ မင်းသားဖြစ်တယ်။

နှစ်မျိုးလုံး သုံးနိုင်တယ်။ ကျွန်တော်သည်၊ ကျွန်တော်ကတော့၊ ကျွန်ုပ်သည်ကား စသဖြင့် နေရာနဲ့ အခန့်အရ အပြော၊ အရေး ရွေးသုံးနိုင်ပါတယ်။

မြန်မာအဘိဓာန် အကျဉ်းချုပ် (၁၉၈၀)

ဟာ (နာမဝိသေသန)

စကားပြောရာတွင် ကတ္တားပုဒ်ကိုညွှန်းသော စကားလုံး။ “ရောင်ကြီးနဲ့လူဟာ မောင်မောင်ကြီးဆိုတာလားဟု မေး၏။”

ဟာ (စည်း)

၁။ စကားပြောရာတွင် ကြိယာကို ပို၍ ခိုင်မာစေရန် အလေးအနက် ထပ်ဆင့်ဖြည့်ဆက် ပြောသော စကားလုံး။ “ဘယ်ခေမလဲ၊ ဇာတ်လိုက်ပဲဟာ။” “အဟံ ငါငြင်းနိုင်ဘဲဟာမို့၊ သင်းပိုင်လဲရွှဲလို့စိုပြီ၊ လဲဘို့လိုသည်။”

၂။ ရင်းနှီးသူ၊ မိမိထက် နိမ့်ကျငယ်ရွယ်သူအား ပြောဆိုရာတွင် ပြစ်တင်လိုရိပ်နှင့် သုံးသော စကားလုံး။ “နင်ကလဲဟာ မလုပ်ပါနဲ့ဆိုနေတာ။”

ဟာ (နာမ်)

အရာဝတ္ထုတစုံတရာကို ညွှန်းလိုရာ၌သုံးသော စကားလုံး။ (သည်ဟာ၊ ထိုဟာ၊ ဟိုဟာ စသည် အသုံးရှိသည်။)

ဟာ (အာမေဋိတ်)

အံအားသင့်သောအခါ ငြင်းဆိုသည့် အခါတို့တွင် မြည်တမ်းသော စကားလုံး။ “ဟာ အထိန်တော်ကြီး နေရာရှာလို့။” “ဆွဲကွာ၊ ကြိတ်ဆွဲ၊ ဟာ မဖြစ်ပါဘူး။”

ဟာ  = အံ့အားသင့်သည့်အခါ၊ ငြင်းဆိုသည့်အခါတို့တွင်မြည်တမ်းသောစကားလုံး။

ဟာ အထိန်းတော်ကြီး နေရာရှာလို့။ ဝံသသစ်၊ ဒု။ ၁၄၈။

က

က ကိုပိုနားလည်အောင် ဝိဘတ်များအကြောင်းပါ ပူးတွဲတင်ပြပါမယ်။

ဝိဘတ်များ https://burmese-spelling.blogspot.com/2022/08/blog-post_13.html

၂။ တင်ထားတာတခု = လူကောင်းတွေဟာ နှစ်ခါမရဘူး.

ဒီအသုံးထဲက 'ဟာ' သည် 'ကတ္တားပုဒ်' (ပြုသူ၊ ဖြစ်သူ) မဟုတ်။ 'ကံပုဒ်' (အပြုခံ၊ အပြောခံ) ဖြစ်ပါတယ်။ အဲဒါကြောင့်

'လူကောင်းတွေကို' သို့မဟုတ် 'လူကောင်းတွေဆိုတာ' လို့ ရေးသားသင့်တယ်လို့ ထင်ပါတယ်။ 

နောက်တနည်း လူကောင်းတွဆိုတာ နှစ်ခါမရဘူး။

ကျွန်တော်က မြန်မာစာဆရာတော့ မဟုတ်ပါ။ မှားရင် ပြင်ပါမယ်။

ဒေါက်တာတင့်ဆွေ