Szechuan Pepper မက်ခါသီး

မနှစ်က ဒီလိုနေ့မှာ။ ကျွန်တော်က သူများစိတ်ဝင်စားအောင် အနုပညာစာလုံး သုံးလေ့မရှိပါ။ အခုစာမှာတော့ အနုပညာထည့်မှသာ တော်မယ်ထင်တယ်။ ငရုတ်သီးထောင်းတယ်။ ဒါရိုက်တာက စီစဉ်ညွှန်ကြားတဲ့အတိုင်း တသွေမတိမ်းလိုက်နာရတယ်။ ကြက်သွန်ဖြူ ပါးပါးလှီးထားပြီးသား။ ငရုတ်သီးစိမ်းကို မိုက်ကရိုဝေ့ဖ်ထဲက ထုတ်။ ပုစွန်ခြောက်ကလည်း ရေစိမ်ထားတယ်။ ဆားဗူး။ ထိုင်းငပိဗူး။ ကိုင်စရာအကုန် ဇွန်းတခုစီနဲ့ နည်းနည်းချင်းစီ ထည့်ရတယ်။

နှာခေါင်းနဲ့ ငရုတ်ဆုံ မတည့်စေရ။ ထောင်းပြီးလို့ ကျန်တောတွေလည်း သူ့ဗူးခွက်လေးတွေကိုယ်စီ ရေသွားမချိုးမီ အမည်တပ်ပေးထားခဲ့တယ်။ နောက်ဆုံးကျမှ မက်ခါသီးမှုန့်ပါ ရောလိုက်တယ်။ ကယားပြည်နယ်က လာတာ။ မနှစ်က အလည်ပြန်လာတော့ ရန်ကုန် လေဆိပ်ထဲရောက်မှ မက်ခါသီးအကြောင်းပြောမိလို့ လိုက်ပို့သူတွေထဲက ပုလဲက ယောသားနဲ့ လွိုင်ကော်မှာနေခဲ့တဲ့ သူ့ဇနီးတို့က အပြေးအလွှားသွားရှာဝယ်ပြီး ပေးလိုက်ကြတာ။ ကျေးဇူး။ အဲဒါနဲ့ အနုပညာထောင်း စားရတယ်။ ကနေ့ မထောင်းရပါ။

မက်ခါသီး မသိဘူး ဆရာ

ကယားပြည်နယ်ရှိ တိုင်းရင်းသားများ၏ ရှေးအခါကပင် အစဉ်အဆက် ဟင်းခတ်အမွေးအကြိုင်အဖြစ် အသုံးပြုလာခဲ့သည့် မက်ခါသီး (သို့မဟုတ်) Szechuan Pepper or Sichuan Pepper ကို ကယားရိုးရာအစားအစာများဖြစ်သော ရိုးရာဆန်ပြုတ်ချက်ရာတွင်လည်းကောင်း၊ ဟင်းချက်ရာတွင်လည်းကောင်း၊ ကယားဝက်အူချောင်း၊ ကယားတာလပေါ့ဟင်းနှင့် အထောင်းအမျိုးမျိုးတို့တွင်လည်း ထည့်သွင်းချက်ပြုတ်၍ စားသုံးကြသည့် အသီးဖြစ်ပါသည်။ မက်ခါသီး၏ အရသာမှာ ငရုတ်ကောင်းနှင့် ဆင်တူ၍ လျှာကို ထုံစေသည့်ပူရှိန်းရှိန်းအရသာရှိပါသည်။ ဒေသအချို့တွင် ပေါက်ရောက်မှုရှိသော်လည်း ကယားဒေသထွက် မက်ခါသီးက အရသာပိုမိုကောင်းမွန်သောကြောင့် ကယားမက်ခါသီးကိုသာ လူသိများခြင်းဖြစ်သည်။

ကယားမှ ဒေသထွက် မက်ခါသီးအကြောင်း တစေ့တစောင်း https://www.doca.gov.mm/my/node/2222

တစေ့တစောင်းရေးတာ မှန်။ ကွန်ဂရက်ကျူလေးရှင်း။

တချို့က တစ်စေ့တစ်စောင်း တဲ့။

တချို့က တစ်စေ့တစောင်း တဲ့။

တချို့က တစေ့တစ်စောင်း တဲ့။

တခုမှ စားမဖြစ်။ သို့သော် လူကြိုက်များ၏။

ဒေါက်တာတင့်ဆွေ