Anniversary နှစ်ပတ်လည်တနေ့

(ဆုတောင်းပေးချင်သူတွေကို အားနာလျက်နဲ့ စာကို ပြန်တင်ပါတယ်။ ဆုတောင်းစကားရေးချိန်အစား ကိုယ့်မိသားစုအကျိုးအတွက်သာ ဆောင်ရွက်ကြစေချင်ပါတယ်။)

ကျွန်တော်တို့အိမ်ထောင်ပြုတာ ၁၆-၇-၂၀၂၃ နေ့မှာ ၅၃ နှစ်ပတ်လည်ပါမယ်။
• ‘ဆေး-မန်း’ ကနေ ‘ဝ/သ-မန်း’ ကို မင်္ဂလာလမ်းကနေသွားခဲ့တာ အကြိမ်ပေါင်းများစွာ။ သမိုင်းကျောင်းသူဟာ ဆေးကျောင်းသားနဲ့ယူအပြီးမှာ ရေးရတော့တာ နိုင်ငံရေးသမိုင်းပါ။ သူရေးတာတွေကို စာရွက်ပေါ်မှာ တွေ့ရမယ်တော့ မဟုတ်ပါ။
• အစိုးရခန့်ဆရာဝန် ဆယ့်ငါးနှစ်လုပ်အပြီးမှာတော့ ဆေးရုံကို လာလာ မလာလာ၊ ဆေးခန်းကို လာလာ မလာလာ၊ လူမှန်သမျှဟာ ကျွန်တော့လူနာတွေဖြစ်လို့ လာပါတော့တယ်။
• ကျွန်တော်တို့မင်္ဂလာနှစ်လည် နှစ်ဆယ်ကျော်ကတည်းက လူနာတွေအားလုံးအတွက် ရင်လေးနေရတာ ခုအထိပါ။
• တိုင်းပြည်ရဲ့ နာတာရှည်တွေ၊ ကျွမ်းနေတာတွေ၊ ခွဲစိတ်ထုတ်ပေးရမှာတွေ၊ အစားထိုးကုရမှာတွေ၊ သက်သာသလိုရှိခဲ့တာဟာ ဆေးမြီးတိုနဲ့ကုရလို့ပါ။ ရောဂါဟောင်းကိုတော့ အမြစ်ပြတ် သတ်နိုင်ကြမှသာ၊ ပြန်မပေါ်မှာ။
• ‘ဇီဝက’ နောက်မှာ သမားတော်ပေါင်းများစွာ ပေါ်ပေါက်လာ၊ ‘ဟစ်ပိုကရေးတီး’ နောက်မှာ ဆရာဝန်ပေါင်းများစွာ ပေါ်ပေါက်လာ၊ သမားတော်သစ်၊ ဆရာဝန်သစ်တွေက ဆက်လက် သည်ပိုးကြပါ။ တိုင်းပြည်ကြီး နေကောင်းပါစေသတည်း။ ။
ဆုတောင်းပေးချင်သူတွေ ဆုတောင်းစကားရေးချိန်အစား ကိုယ့်မိသားစုအကျိုးအတွက်သာ ဆောင်ရွက်ကြစေချင်ပါတယ်။
ဓါတ်ပုံ ၁၉၇၈၊ မြို့သာတိုက်နယ်ဆရာဝန် တာဝန်ထမ်းစဉ်က၊ သားသမီးငါးယောက်နဲ့အတူ။

ဒေါက်တာတင့်ဆွေ
၁၅-၇-၂၀၁၄
၁၅-၇-၂၀၂၃

Comments

ဒါပေမဲ့

ဒါပေမဲ့ ဒါပေမယ့် ဘယ်ဟာကအမှန်လဲဆရာ - စာဖတ်ကြဖို့ လိုတယ်။ ဒါပေမဲ့ ဘယ်လိုစာအုပ်တွေကို ဘယ်လိုဖတ်ကြမလဲ။ (စာဖတ်တဲ့ အလေ့အထ - လူထုဦးလှ) - တမာရွက် နုချိန်မှာ ဆီးချဉ်သီးကလည်း ပေါ်တယ်။ တမာရွက်က ခါးတော့ အခါးကို အချဉ် ကလေးနဲ့ သတ်ပေးမှ အခါး သက်သာတယ် ဟုတ်လား။ အဲဒါ တခြား အချဉ်နဲ့သတ်ရင် ရတော့ ရတယ်။ ဒါပေမဲ့ ဇီးဆီးသီး ချဉ်ကလေးက ဆီးနံ့လေး မွှေးတယ်လေ။ (အညာနဲ့တမာ လူထုဒေါ်အမာ) - သူက မကစားတာ အနှစ် နှစ်ဆယ် ကျော်ပြီတဲ့၊ ပန်းချီဆရာတဲ့၊ မြနန္ဒာ နာမည်ကြီးလွန်းလို့၊ မြင်ဖူးကြည့်ဖူးချင်လို့ ဖဲဝိုင်းကို လိုက်လာတာဆိုပဲ။ အဖြစ်သည်းလိုက်တာ။ ယောက်ျားများ သည်လိုပဲ။ ဒါပေမဲ့ မြနန္ဒာမှာ သူတကာထက် ဘာများ သာတာရှိလို့လဲကွယ်။ (မောင် ကိုကို နှင့် မြနန္ဒာ၊ ကြည်အေး)) - ဆရာအောင်သင်းရေးတဲ့ မူရင်းစာမှာ ဒါပင်မဲ့ ဟုတ် မဟုတ် မသိပါ။ ဒါပေမဲ့လို့သာ ရေးလေ့ရှိပါတယ်။ ဒါပေမယ့်လို့လည်း ရေးတာရှိပါတယ်။ ခိုင်နှင့် ကျွန်တော် ဘဝမှာမူ နှစ်လွှာပေါင်းမှ တရွက်ဖြစ်ရသည့် စွယ်တော်ရွက်ပမာသာ ဖြစ်ခဲ့ရသည်။ တလွှာကြွေခဲ့လေပြီမင့် တရွက်မမည်လေတော့သော အထီးကျန် ဤဘဝဝယ် (တက္ကသိုလ်ဘုန်းနိုင်) ဒါပေမဲ့ မဲ့ မယ့် https://burmese-spelling.blogspot.com/2024/09/blog-post_6...

အနုပညာအမည် ကလောင်အမည် နှမြော

အနုပညာအမည် ကလောင်အမည် နှမြော မေးခွန်းတခု = အန်တီ မွေးစားစကားလုံးက ဒီလိုရေးလို့ရပါသလားဗျဆရာ ပြန်စာ ( ၁) အန်တီ အင်္ဂလိပ်စာလုံးကနေ ရယူထားတယ်။ အတော်အသားကျနေပြီ Auntie အန်တီ (ဗြိတိသျှ) Aunt အန့် (အမေရိကန်) Aunty မမှန်ပါ။ အဲလိုယူသုံးတဲ့စကားလုံးတွေ အများကြီးရှိတယ်။ ဥပမာ ကား၊ ဒေါက်တာ စသည်။ ' မတ်' လ ကို 'မတ်ချ်' လ လို့ မပြင်သင့်ပါ။ ( ၂) နှမြော = ကပ်စေးနှဲသည်။ တွန့်တိုသည်။ ငမိုက်လူကား၊ အလှူကောင်းမှု၊ မပြုခင်လှည့်၊ စိုးရိမ်ပြည့်လျက်၊ ကိုယ်၏သဘော၊ လွန်နှမြောသည်။ (၃ ) ဒေါ်ခင်သန်းနု အနုပညာအမည်၊ ကလောင်အမည်တွေမှာ မ၊ မောင်၊ ကို၊ ဦး၊ ဒေါက်တာ စတာတွေ အပိုမထည့်ရ၊ မူရင်းအမည်ပါ မ၊ မောင်၊ ကို၊ ဦး စတာတွေကို လိုသလို မပြင်ရပါ။ ဒေါက်တာတင့်ဆွေ

ဓါး

သူကြီးတဦး ကြိုးဆွဲချ တရွာတည်း အလောင်းတလောင်း တဝိုင်းတည်း ဘမ်းဆီး အခုခေတ်မှာ အဲဒီစာလုံးတွေကို မှန်အောင်ရေးတတ်သူ ရှားပါသည်။ ဓား သာမဟုတ်ပါ ဓါးလည်းမှန်ပါသည်။ ဒါးလည်းမှန်ပါသည်။ အရင်က ထားလို့လည်း ရေးခဲ့သည်။ သူကြီးတဦး ကွယ်လွန်ရရှာပြီ။ ကြိုးဆွဲချကို ဆွဲကြိုးလို့ မှားရေးနေကြသည်။ ဘမ်းဆီး ကို ဖမ်းဆီးလို့သာ ရေးလာကြတာ မှန်ပါတယ်။ ပုံအတွက် ကျေးဇူး။ ဒေါက်တာတင့်ဆွေ

တို့စာ တို့စကား တို့တိုင်းပြည်

Search This Blog