ပုံထဲကနာရီဟောင်းလေးကို မိတ်ဆွေတယောက်က ဓါတ်ခဲအသစ် လဲပေးပါတယ်။ ကျေးဇူး။ ဒီအရပ်မှာ နာရီဓါတ်ခဲ လဲရတာက နယူးဒေလီမှာဝယ်ရတဲ့ နာရီဈေးလောက်ကြီးတယ်။ ဒီနာရီက ဝယ်ရတာတော့ မဟုတ်ပါ။ လက်ဆောင်ရတာ။
ကျွန်တော် အိန္ဒိယမှာ ၂၄ နှစ်ကြာ နေခဲ့ပါတယ်။ အဲဒီခေတ်မှာ မြန်မာ့ဒီမိုကရေစီရေးလို့ ခေါ်တယ်။ ကျွန်တော့တာဝန်က NCGUB စင်ပြိုင်အစိုးရ။ အိမ်ရှင်အိန္ဒိယနဲ့ တောင်အာရှနိုင်ငံတွေရဲ့ ထောက်ခံမှုရအောင် ကြိုးစားရတာဖြစ်ပါတယ်။ နိုင်ငံရေးပါတီအစုံနဲ့ ထိတွေ့ရတယ်။ (ကွန်ဂရက်) ပါတီဆီလဲ သွားတယ်။ (ဘီဂျေပီ) နဲ့လဲ ရင်းနှီးတယ်။ (ဂျနာတာဒါးလ်)၊ (ဆမာ့ချ်ဝါဒီ) စတဲ့ ဆိုရှယ်လစ်ပါတီခွဲတွေနဲ့လဲ ပူးတွဲလုပ်ခဲ့ပါတယ်။
ကွန်မြူနစ်ပါတီတွေဆီလဲ ရောက်တယ်။ သူတို့ဆီမှာ ကွန်မြူနစ်ပါတီတွေက များတယ်။ အထင်ရှားဆုံးက ၄ ခု။
၁။ Communist Party of India
၂။ Communist Party of India (Marxist)
၃။ Communist Party of India (Marxist–Leninist)
၄။ All India Forward Bloc
အောလ်အန္ဒိယ ဖေါဝပ် ဘလော့ခ်ပါတီက ပါတီညီလာခံတိုင်းကို ဖိတ်လို့တက်ခဲ့ပါတယ်။ နိုင်ငံတကာကိုယ်စားလှယ်ဆိုပြီး မြန်မာပြည်က အင်နယ်လ်ဒီအမတ်ဖြစ်တဲ့ ကျွန်တော့ကို ဖိတ်တာ။
နောင်အခါ ကာကွယ်ရေးဝန်ကြီး ဖြစ်လာသူ (ယခုကွယ်လွန်) ဂျော့ဖာနန်းဒက်စ် ရဲ့ ဘုံဘေမှာကျင်းပတဲ့ ဂျာနာတာဒါးလ်ပါတီ ညီလာခံကို အစောဆုံး တက်ခဲ့ရပါတယ်။
ပုံထဲက နာရီလေးမှာ ရာဇဝင်ရှိတယ်။ အိန္ဒိယကနေ မထွက်ခွါခင် နှစ်နှစ်လောက်ကတက်ရတဲ့ အောလ်အန္ဒိယ ဖေါဝပ် ဘလော့ခ် ပါတီညီလာခံကို ဖိတ်ကြားတဲ့ နိုင်ငံတကာကိုယ်စားလှယ်တွေကို အမှတ်အတရအဖြစ် ပေးပါတယ်။ နာရီအရောင်နဲ့ ကြိုးအရောင်ကိုကြိုက်လို့ နယူးဒေလီမှာနေစဉ်ကတော့ အမြဲလိုလို ပတ်ပါတယ်။ ဓါတ်ခဲ လဲလဲပေးရတယ်။
ယူအက်စ်အေမှာတော့ လက်ရှည်နဲ့ အနွေးထည်သာဝတ်ရတာများလို့ နာရီပတ်ချိန် အတော်နည်းပါတယ်။
အခု ဓါတ်ခဲသစ်လဲပြီးပြီ။ နာရီက ၁၀ နှစ်ကျော်လို့ အိုနေပြီဖြစ်တော့ မမှန်ချင်တော့ပါ။
ဒါပေမဲ့ အိန္ဒိယနိုင်ငံက ကျေးဇူးတင်ထိုက်တာတွေကတော့ ဟောင်းသွားခြင်း မရှိပါ။
အိန္ဒိယနိုင်ငံကနေ တတိယနိုင်ငံကို မထွက်နိုင်ကြတဲ့ မြန်မာပြည်ဖွားတွေ နေကောင်းကြစေသတည်း။
အိန္ဒိယနိုင်ငံကနေ တတိယနိုင်ငံတွေကို ထွက်သွားနိုင်ကြတဲ့ မြန်မာပြည်ဖွားတွေ နေကောင်းကြစေသတည်း။
Thanks to India (1) အိန္ဒိယမှာ ကျေးဇူးတင်စရာ (၁) https://burmese-spelling.blogspot.com/2023/08/thanks-to-india-1.html
Thanks to India (2) အိန္ဒိယမှာ ကျေးဇူးတင်စရာ (၂) https://dr-tint-swe.blogspot.com/2021/08/thanks-to-india-2.htmlThanks to India (3) အိန္ဒိယမှာ ကျေးဇူးတင်စရာ (၃) https://dr-tint-swe.blogspot.com/2021/08/thanks-to-india-3.html
Thanks to India (4) အိန္ဒိယမှာ ကျေးဇူးတင်စရာ (၄) https://dr-tint-swe.blogspot.com/2022/08/thanks-to-india-4.html
ဒေါက်တာတင့်ဆွေ
Comments
Post a Comment