အဓိပ္ပါယ် ကိုတော့ အဓိပ္ပာယ် လို့မပြင်တော့ပါ။ မူကွဲအဖြစ် သုံးနိုင်ပါတယ်။
အညမည
ဆရာ့ Post ကိုဖတ်ရင်းကနေ (အညမည) စကားလုံးကိုတွေ့ရပါတယ်။ သိချင်တာကြာလှပါပြီ။ ဆောင်းပါးတွေ ကဗျာတွေ နိုင်ငံရေးစာတွေကို တခါတလေဖတ်ပေမယ့် မတွေ့ဖူးပါ။ သတိမထားတာလည်းဖြစ်နိုင်ပါတယ်။ နိုင်ငံရေးသမားအချို့ဟာ ရံဖန်ရံဖန်မှာ အညမည ဆိုပြီးသုံးတာကြားနေရတယ်။ ဆိုရှယ်လစ်လမ်းစဉ်လား စစ်တပ်လမ်းစဉ်လား၊ ကောင်းဆိုးတွဲနေတဲ့ လမ်းစဉ်လား၊ အတွေးခေါ်နည်းပညာတစ်ရပ်လား ဆိုတာမသိပါ။ စကားလုံးအရင်းအမြစ်လည်းမသိပါ။ ကျေးဇူးတင်ပါတယ်ဆရာ။
(အညမည) ကို (အင်ည-မင်ည) လို့ အသံထွက်ရပါတယ်။ ကျွန်တော်လည်း (မဆလ) ခေတ်က တပ်တွင်းပညာပေး မန္တလေးနန်းတွင်းကို သွားတက်ခဲ့ရလို့သိတာ။ အဲတာက နောက်ဆုံးအသုတ်ပါ။ ကျွန်တော်လည်းတက်ပြီး (မဆလ) ကြီး ပြုတ်ကျပါရောလား။
၁၉၆၂ မတ်လ (၂) ရက်နေ့မှာ ဗိုလ်နေဝင်းက အာဏာသိမ်းတယ်။ အစမှာ ဘယ်စနစ်နဲ့အုပ်ချုပ်မယ်ဆိုတာ အစီအစဉ်ရှိခဲ့ပုံမရပါ။ တအောင့်လောက်နေတော့ ဆိုရှစ်လစ်စနစ်ကို ရွေးလိုက်တယ်။ ဘယ်လိုဆိုရှယ်လစ်လဲ စဉ်းစားရာကနေ ဘယ်တိုင်းပြည်မှာမှမရှိတဲ့ မြန်မာ့ဆိုရှစ်လစ်လမ်းစဉ်လုပ်တယ်။ နိုင်ငံရေးအိုင်ဒီယော်လော်ဂျီတခုတော့ စာရွက်ပေါ်တင်ရမှာဖြစ်လို့ ဦးချစ်လှိုင်ကို အရေးခိုင်းတယ်။ ဦးချစ်လှိုင်ဟာ အလံနီဖြစ်ပြီး မာ့က်စ်ဝါဒစာအုပ်တွေကို ဘာသာပြန်ခဲ့သူဖြစ်တယ်။
သခင်သန်းထွန်းရဲ့ အလံဖြူကွန်မြူနစ်ရော သခင်စိုးရဲ့ အလံနီကွန်မြူနစ်ရောဟာ လက်နက်နဲ့တိုက်ကြပေမယ့် တိုင်းပြည်အာဏာကို ရအောင်မယူနိုင်ခဲ့ကြပါ။ နိုင်ငံရေးစာတွေမှာတော့ သူတို့ချည်းသာရှိတယ်။ အလံနီတွေဟာ အလင်းဝင်ပြီးနောက်မှာ စစ်အစိုးရတိုင်းနဲ့ အဆင်ပြေအောင်ပေါင်းတယ်။ အရင်ဆုံး ဦးနေဝင်းကို ချဉ်းကပ်တယ်။ နောက် နဝတ နဲ့ နအဖ ကိုပါ ကပ်တယ်။ တကယ်တော့ စစ်အစိုးရတွေကနေ သူတို့ကို အသုံးချပါတယ်။ သတင်းစာတွေကနေ ကလောင်နာမည်အမျိုးမျိုးနဲ့ ဒီမိုကရေစီရေးကို ရစရာမရှိအောင် ပုတ်ခတ်၊ စွပ်စွဲရေးသားတဲ့ ဆောင်းပါးတွေကို အလံနီထွက်တွေကနေ ရေးပေးကြတယ်။ စစ်ထောက်လှမ်းရေးက ပိုက်ဆံပေးတယ်။
ဗိုလ်နေဝင်းလက်ထက်မှာ ဦးချစ်လှိုင်ရေးခဲ့တဲ့ လူနှင့် ပတ်ဝန်းကျင်တို့၏ အညမညသဘောတရားလို့ပေါ်လာတယ်။ ၁၉၆ဝ ကျော်ကနေ ၁၉၈၈ အထိ အဲတာကိုမဖတ်ရင်၊ အဲဒီသင်တန်းမတက်ရင် အလုပ်မရ၊ ရာထူးမတိုး၊ နိုင်ငံခြားလည်း မထွက်ရပါ။ အခုတော့ မေးတဲ့သူပြောသလို အဲတာကို ဘာမှန်းမသိကြတော့ပါ။
ကျွန်တော် မနေ့ကပဲရေးခဲ့သေးတယ်။ ဆိုဆုံးမစကားတွေ၊ စကားပုံတွေကို လိုသလိုဆွဲသုံးနေကြတယ်။ ဘုရားဟောတဲ့ မဇ္ဈိမပဋိပဒါကို လင်မယားစကားများတာကို ဖျန်ဖြေရာမှာ သုံးနေကြတယ်လို့ ရေးခဲ့ပါတယ်။ (အညမည) ကိုလည်း အဲလို သုံးနေကြပါတယ်။
စစ်အစိုးရခေတ်ကစပြီး တိုင်းပြည်စီးပွားရေးမူဝါဒကို ဈေးကွက်စီးပွားရေးစနစ်ပြောင်းလိုက်တော့ အညမည = အချင်းချင်း၊ အပြန်အလှန်လို့ အဓိပ္ပါယ်ဖွင့်ပြန်တယ်။ တိုင်းပြည်လွတ်လပ်ရေးနှင့် စီးပွားရေးလွတ်လပ်မှုတို့မှာ အညမည ဆက်စပ်လျက်ရှိပေသည်လို့ ရေးလာကြတယ်။ (မဆလ) ခေတ်မှာကတော့ လူနှင့် ပတ်ဝန်းကျင်တဲ့။
ပါဠိ-မြန်မာ အဘိဓာန်မှာ အညမညပ္ပစ္စယ = အချင်းချင်း ကျေးဇူးပြုတတ်သောတရားလို့ ပါရှိပါတယ်။
ဘုရားဟောခဲ့တာက ပဋ္ဌာန်း (၂၄) ပစ္စည်းထဲမှာပါ။ ဆိုရှယ်လစ်ခေတ်မှာ အစိုးရနဲ့ ကပ်ဖါးတွေရဲ့ ပြည်သူပိုင်ပစ္စည်းများ အညမည။ ဈေးကွက်စီးပွါးရေးမှာ စစ်အစိုးရနဲ့ ခရိုနီများရဲ့ ပုဂ္ဂလိကပိုင်ပစ္စည်းများ အညမည။ ပြီးခဲ့တဲ့အစိုးရကစပြီး မြန်မာပြည်ပိုင်ပစ္စည်းများ တိုင်းတပါးသားနဲ့ အညမည။
ဒေါက်တာတင့်ဆွေ
၁-၈-၂၀၁၆
Comments
Post a Comment