"ဒီပုတ်ထဲကပဲ ဒီပဲ"

ဆရာ ဒီပုတ်ထဲကပဲ ဒီပဲ ဆိုတဲ့ စကားရဲ့ အဓိပ္ပါယ်ကို သိပါရစေ။

"လူတစု သို့မဟုတ် အဖွဲ့အစည်းတခုအတွင်းရှိ လူအားလုံးမှာ အကျင့်စရိုက် သို့မဟုတ် အရည်အသွေး အတူတူပင် ဖြစ်ကြသည်" ဟု ဆိုလိုခြင်း ဖြစ်ပါသည်။ 

အထူးသဖြင့် မကောင်းသောအကျင့် သို့မဟုတ် အပြစ်အနာအဆာ တခုခု ရှိနေသူများကို ရည်ညွှန်းရာတွင် သုံးနှုန်းလေ့ရှိပါသည်။

ပုတ်ဆိုသည်မှာ ဝါးဖြင့် ရက်လုပ်ထားသော နှီးတောင်း (သို့မဟုတ်) ပစ္စည်းထည့်စရာ အိုး၊ ခွက်၊ တောင်းတမျိုး ဖြစ်ပါသည်။

ပဲ - ဆိုသည်မှာ စားသုံးသီးနှံ "ပဲ" ကို ဆိုလိုခြင်း ဖြစ်ပါသည်။

ပုတ်တခုတည်းအတွင်း ထည့်ထားသော ပဲစေ့များမှာ အမျိုးအစားတူ၊ အရည်အသွေးတူများသာ ဖြစ်သကဲ့သို့ပင်၊ လူတစုအတွင်း၌လည်း စရိုက်ဆိုးသူ တဦးရှိလျှင် ကျန်သူများမှာလည်း ထိုသူနှင့် မထူးမခြားနား အတူတူပင်ဖြစ်ကြောင်း နှိုင်းယှဉ် ပြောဆိုခြင်း ဖြစ်ပါသည်။

၁။ အကျင့်စရိုက် တူညီမှုကို ပြလိုသောအခါ - "ဟိုလူကလည်း ဒီလိုပဲ၊ ဒီလူကလည်း ဒီလိုပဲ၊ အားလုံးဟာ ဒီပုတ်ထဲကပဲ ဒီပဲတွေပါပဲ" ဟု အပြစ်တင် ပြောဆိုရာတွင် သုံးပါသည်။

၂။ အရည်အချင်း မကွာခြားမှုကို ပြလိုသောအခါ - အဖွဲ့တခုလုံးတွင် ထူးခြားကောင်းမွန်သူ မရှိဘဲ အားလုံးမှာ ညံ့ဖျင်းသူ သို့မဟုတ် ဖောက်ပြန်သူများသာ ဖြစ်နေခြင်းကို ရည်ညွှန်းလိုလျှင် သုံးပါသည်။

အင်္ဂလိပ်စကားပုံနှင့် နှိုင်းယှဉ်ချက်

"Birds of a feather flock together" (အမွေးအတောင် တူသူချင်း စုဝေးတတ်ကြသည်)

သို့မဟုတ် 

"They are all of a piece" (အားလုံး တသားတည်း၊ တမျိုးတည်း ဖြစ်သည်) တို့ ဖြစ်ပါသည်။

ဒေါက်တာတင့်ဆွေ