ပြန်စာ
(၁)
အဲလိုထင်တာ၊ သင်တာ၊ ပြောတာ မမှန်ပါ။
ခုနှစ် = အစဉ်အတိုင်းရေတွက်မှတ်သားခဲ့သော နှစ်အရေအတွက်။ ခု။
ခုနှစ် – န / ခုနှစ် / ၁။ တစုံတခုသော နှစ်ကာလကို ဖော်ပြသော စကား။ ၂။ သက္ကရာဇ်။
၁၉၄၈ ခုနှစ်မှတ်တမ်း
၁၃၅၀ ခုနှစ် မှတ်တမ်း
၁၃၆၀ ခုနှစ် မှတ်တမ်း
(၂)
၇ ကို ခုနစ်လို့ ရေးရတယ်။
ခရစ်သက္ကရာဇ် ၂၀၁၆ ခုနှစ်လို့ ရေးရတယ်။
မြန်မာသက္ကရာဇ် ၁၃၈၈ ခုနှစ်လို့ရေးရတယ်။
(၃)
ခု – န / ခု / ၁။ ခု၊ ဆယ်၊ ရာ စသော ဆယ်ဆင့်ကိန်းစဉ်တွင် ပထမကိန်း။ ၂။ သက္ကရာဇ်။ နှစ်။ “သက္ကရာဇ် ၂၆၆ ခုတွင်။” စွယ်၊ ပ။ ၅၀။
ခု – စည်း / ခု / တရားသဘော၊ ဝတ္ထုပစ္စည်း စသည်တို့ကို ရေတွက်ရာတွင် သုံးရသောစကား။ “ဉာဏ်အားဆယ်ခု၊ စတုဝေသ၊ ကိုးဖြာကျေးဇူး။” ကိုး* ၂။
ခု – ကြိ / ခု / ၁။ ပင့်မ ထားသည်။ ထောက်ခံ ထားသည်။ ၂။ အစားထိုးသည်။ ထောက်ကူ ဖြည့်စွက်သည်။ “ဆန်မလောက်၍ ပြောင်း ခု ရသည်။” ၃။ အနှောင့်အယှက် ဖြစ်သည်။ “ဘက်ပြိုင်အန်တု၊ မာန်မခုပဲ။” ကိန္နရီ* ၁၂၃။
ခုခံ – ကြိ / ခုခံ / ၁။ သူတပါး၏ အလိုသို့ မလိုက်ပဲ ပြန်လှန် ပြောဆိုသည်။ ပြုမူလုပ်ကိုင်သည်။ “ရန်သူတို့ကို အမြဲခုခံပါမည်။” လုမ္ဗ၊ ၂၁။ ၂။ အောက်က ပင့်မထားသည်။ “သတို့သမီးသည်....သပိတ် ခုခံ ရာအလို့ငှာ မိမိဝတ်ရုံသော အဝတ်ထည်ကို လှူ၏။” ပဏ္ဍိ၊ ၁၁၃။
ခုတင် – န / ဂဒင် / အခြေလေးချောင်း စသည်တပ်ထားသော အိပ်စင်။ ညောင်စောင်း။ “ထိုသည့်ရှေ့က၊ ထားလေတသွယ်၊ ခုတင်ငယ်ကား၊ နံလျားတောင်စွန့်၊ အမြင့်နှစ်မိုက်။” ကုသ* ၇၅။
ခုတင် – ကြိဝိ / ခုတင် / မကြာသေးမီ။
ခုတင်ခု – ကြိဝိ / ခုတင်ဂု / ခဏခဏ။ မကြာမကြာ။
ခုတုံး – န / ခုဒုန်း / ၁။ အောက်က ခုရ ခံရသော တုံး။ ၂။ နွားများ လက်ထောက်ပြီး မြက်လှမ်းစားနိုင်ရန် မြက်စင်နားတွင် ထားသော ခုမြင့်။ ၃။ [ဥပစာ] သူတပါးအကျိုးအတွက် အသုံးချခံရသူ။
ခုန – န / ခုန / မကြာသေးမီက အခိုက်အတန့်။
ခုနစ် – န / ခွန်နစ် / ခြောက်နှင့် ရှစ်အကြားရှိ အရေအတွက်။ ၇။
ခုနစ်စဉ်ကြယ် – န / ခွန်နစဉ်ကျယ် / ဓူဝံကြယ်ကို ဗဟိုပြု၍ လှည့်ပတ်နေသော ခုနစ်လုံးအရေအတွက်ရှိသည့် ကြယ်စု။
ခုနစ်ရက်ခုနစ်လီ – န / ခွန်နယက်ခွန်နလီ / ၁။ လေးဆယ့်ကိုးရက်။ ၂။ ကြာမြင့်သော အချိန်ကာလ။
ခုနစ်ရက်သားသမီး – န / ခွန်နယက်သားသမီး / လူတိုင်း။ လူအားလုံး။
ခုနစ်သံ – န / ခွန်နသံ / အမြင့်ဆုံး တူရိယာသံ။ လည်ချောင်း၌ ဖြစ်သော အမြင့်ဆုံး အသံ။
ခုနစ်သံချီ – န / ခွန်နသံချီ / ပါဠိလို နိသာဒဟူ၍လည်းကောင်း၊ စောင်းသံစဉ် ခုနစ်ပါးတွင် ညင်းလုံး ဟူ၍လည်းကောင်း၊ ဆိုင်းသံစဉ် ခုနစ်ပါးတွင် သံရိုး ဟူ၍လည်းကောင်း ခေါ်သော အမြင့်ဆုံး အသံကို တည်၍ သီဆိုတီးမှုတ်ရသော တေးသွား။
ခုနှစ် – န / ခုနှစ် / ၁။ တစုံတခုသော နှစ်ကာလကို ဖော်ပြသော စကား။ ၂။ သက္ကရာဇ်။
ခုနှိမ် – ကြိ / ခုနိမ် / ပေးရန်ရှိသည့်အထဲမှ ရရန်ရှိသည်ကို နှုတ်ယူသည်။ “အာမခံငွေကို လစာထဲမှ ခုနှိမ်လျှင်။” သစ်ညွန့်၊ ပ။ ၁၀။
ခုလိခုလတ် – ကြိဝိ / ခုလိခုလတ် / ထိုမမီ ဤမမီ။ ထိုမရောက် ဤမရောက်။
ခုလုခုလု – ကြိဝိ / ခုလုခုလု / ၁။ (အပြား အပျဉ်အောက်တွင် တစုံတခုရှိနေသဖြင့်) မညီမညွတ်ဖြစ်လျက်။ ၂။ မပြေမလည်။ မတင်မကျ။
ခုလေးတင် – ကြိဝိ / ခုလေးတင် / မကြာသေးမီ အခိုက်အတန့်အတွင်း။
ခုလတ် – န / ခုလတ် / စွတ်လတ် – န၊ ရှု။
ခုလုပ်ခုစား – န / ခုလုတ်ခုစား / ယခုပင် အလုပ်လုပ်၍ ရသောငွေဖြင့် ယခုပင် ဝယ်ခြမ်းစားသောက်ရသောအဖြစ်။ ငွေပိုငွေလျှံမထားနိုင်သောအဖြစ်။
ခုလုံးခံလုံး – န / ခုလုန်းခံလုန်း / ခုခံပြောဆိုသော စကားလုံး။
(၄)
တချိန်ကထုတ်ခဲ့တဲ့ ၇၅ ကျပ်တန်မှာ ခုနှစ်လို့ ရေးတာ မှားနေတယ်။ နိုင်ငံတော်အမှား။
(၅)
ခုတင် နဲ့ ကုတင် မတူပါ။
အခုခေတ် ဆေးရုံကြီးတချို့ဆိုင်းဘုတ်တွေ မှားနေတယ်။
နိုင်ငံတော်အမှား။
နိုင်ငံတော်အမှား များတယ်။
(၆)
မြန်မာလိုရေးနေတဲ့စာထဲမှာ ၂၀၂၆ ကို အင်္ဂလိပ်ဂဏန်းနဲ့ရေးတာက ဆိုရှယ်မီဒီယာ အမှား။
တချို့ဖုန်း ကီးဘုတ်တွေမှာ ၁-၂-၃-၄ မပါဘူးဆိုလား။ မြန်မာပြည်ထဲဝင်တဲ့ iPhone အမှား။
ဒေါက်တာတင့်ဆွေ
Comments
Post a Comment