တိုင်းပြည်ကနေထွက်ပြေးပြီး နိုင်ငံရေးလုပ်ဘို့ဖြစ်စေခဲ့တာက 'စင်ပြိုင်အစိုးရဖွဲ့ရေး' မှာပါလို့ဖြစ်ပါတယ်။ လူအရင်းအနှီးတွေ အများကြီးပေးပြီး ၁၈-၁၂-၁၉၉ဝ နေ့မှာ ဖွဲ့ဖြစ်အောင်ဖွဲ့ကြတယ်။ 'စင်ပြိုင်' ဆိုတာထက် 'အဝေးရောက်' လို့ပြောတာက ပိုမှန်တယ်။ 'မာနယ်ပလော' ကျပြီးနောက်မှာ 'ပြည်ပရောက်' ဖြစ်လာပါတယ်။ ပြည်ပဆိုတာလဲ လူတွေက ထိုင်း၊ အိန္ဒိယနဲ့ အမေရိကန်ပြည်ထောင်စု၊ သုံးနိုင်ငံမှာနေကြရတယ်။ ကျွန်တော်ကတော့ တောက်လျှောက် အိန္ဒိယမှာ ၂၄ နှစ်မကကြာခဲ့တယ်။ ကိုယ့်အစိုးရကို ၂၄-၉-၂ဝ၁၂ နေ့မှာ ကိုယ့်အဆုံးအဖြတ်နဲ့သာ ဖျက်သိမ်းခဲ့ပါတယ်။ ပြီးခဲ့တဲ့တပါတ်တိတိကျမှ ကျွန်တော် အမေရိကန်ပြည်ထောင်စုမှာ အခြေချနေထိုင်ဘို့ရာ ရောက်လာပါတယ်။
အစိုးရအဖွဲ့ကို ဖျက်သိမ်းလိုက်ချိန်မှာတော့ တရားဝင်ပြောရရင် အဖွဲ့ဝင်ဦးရေ ၃-၄ ယောက်သာရှိပါတော့တယ်။ တဦးကတော့ အခုထိ ထိုင်းနယ်စပ်မှာ ဆက်နေသေးတယ်။ ဝန်ကြီးချုပ်တာဝန်ယူခဲ့သူက 'မေရီလင်း' မှာနေပြီး၊ ကျွန်တော်ကတော့ သားသမီးများ အခြေချနေထိုင်ရာ 'အင်ဒီယာနာပုလစ်' မြို့မှာနေပါတယ်။
အသည်းရောင်ရောဂါသမားတွေ ဘီပိုး၊ စီပိုးဝင်နေပေမဲ့ ရောဂါမပေါ်သေးဘဲနေသေးတယ်။ ကြာမှသာ 'နာတာရှည် အသည်းရောင်' အဆင့်ရောက်ပါတယ်။ နာတာရှည်တွေကနေ 'အသည်းခြောက်တာ' နဲ့ 'အသည်းကင်ဆာ' ဆက်ဖြစ်နိုင်တယ်။ နိုင်ငံရေးပိုးဝင်ထားပြီးတဲ့ ကျွန်တော်တို့ကတော့ နာတာရှည်ထက်ကျော်လွန်နေပါပြီ။ 'နိုင်ငံရေးခြောက်ရောဂါ' လို့ပြောနိုင်တယ်။ 'နိုင်ငံရေးကင်ဆာ' တော့မဟုတ်လောက်ပါ။ ထွက်မလာခင် ဒေလီမှာ နိုင်ငံရေးအလုပ်တွေ ခမ်းခြောက်၊ နိုင်ငံရေးလုပ်ဘော် တယောက်စနှစ်ယောက်စ၊ နိုင်ငံရေးစကား ပြောစရာနေရာဆိုတာလဲ 'ဖေ့စ်ဘွတ်' မှာသာရှိပါတယ်။ ခြောက်ကပ်ကပ် နိုင်ငံရေးလုပ်ရတဲ့ဘဝလို့ ပြောချင်တာပါ။
အခုတခါ မြန်မာပြည်နိုင်ငံရေး စိတ်အေးသူဆိုတာ အရေအတွက် များမယ်မထင်ပါ။ စိတ်ပူကြသူတွေထဲမှာတော့ ကျွန်တော်တို့ နောက်ဆုံးလက်ကျန်တွေက ထိပ်မှာရှိပါတယ်။ မနေ့ကစပြီး စကားပြောကြတယ်၊ ဘာဆက်လုပ်ကြမလဲ။ အရင်အနှစ်နှစ်ဆယ်လောက် ထောက်ကူတဲ့အဖွဲ့တွေက ရန်ကုန်မှသွားမလုပ်ရင် တပြားမှမပေးချင်ကြပါ။ ကျွန်တော်တို့မြင်တာက အထဲမှာလဲ လုပ်နိုင်သူတွေနဲ့ လုပ်နေသူတွေ အများကြီးရှိတယ်။ အပြင်ကနေ အထဲလူတွေ လုပ်မဖြစ်တာမျိုးအတွက် ဆက်လုပ်ချင်သေးတယ်။ ပြန်လာပါလို့ဖိတ်ခေါ်ကြသူတွေအားလုံးကို ကျေးဇူတင်ပေမဲ့ ကျွန်တော်တို့က ကနေ့အချိန်မှာ ရန်ကုန်ဆိုတာ 'ရန်တွေကုန်ပြီ' လို့ မသတ်မှတ်လို့ မလာချင်ကြသေးပါ။ မိသားစုကိုပါ ထည့်မစဉ်စားဘူးလို့လဲ ဇွတ်အတင်း မငြင်းဆိုပါ။
အမှန်တဝက်နဲ့ပြောရရင် ကျွန်တော်တို့ အစိုးရအဖွဲ့ကိုဖျက်လိုက်ပေမဲ့ ဆက်လုပ်နေတာတွေရှိပါတယ်။ အကုန်ပြောမသင့်လို့ အမှန်တဝက်လို့ ရေးလိုက်တာပါ။ လူကတော့ တကယ့်ကို နှစ်ယောက်တပိုင်းသာရှိခဲ့တော့တာ အပြည့်မှန်တယ်။
ကျွန်တော်တို့ရဲ့ ၂၄ နှစ်တာ အတွေ့အကြုံကို အကျဉ်းချုပ် တင်ပြချက်ဖြစ်ပါတယ်။ သင်္ခန်းစာ ယူကြပါလေ။
ဒေါက်တာတင့်ဆွေ
၂၇-၉-၂၀၁၄
Comments
Post a Comment