ဆရာမင်းသုဝဏ်ရဲ့ နှင်းဆီပွင့်ကဗျာကို လွဲအောင်ရေးထားတာတွေ အမျိုးမျိုး တွေ့တယ်။
(၁)
လယ်တောက ပြန်
ပန်ချင်တယ် ခရေဖူးဆိုလို့
မောင် ခူးကာပေး။
မနက်တုန်းဆီက
ကြော့ဆုံး မောင်မြင်တော့
သူ့ဆံပင် နှင်းဆီပွင့်တွေနှင့်
ဂုဏ်တင့်တယ်လေး။ (မင်းသုဝဏ်၊ ၃၁-၁၂-၁၉၃၂)
လင်းရောင်ခြည် ပထမတန်းဘတ်စာ။ ၁၁
သင်ခန်းစာ-၃၀။
(၂)
နှင်းဆီပွင့်
လယ်တောကအပြန်
ပန်ချင်တယ် ခရေဖူးဆိုလို့
မောင်ခူးကာပေး။
မနက်တုန်းဆီက
ကြော့ဆုံးကို မောင်မြင်တော့
သူ့ဆံပင် နှင်းဆီပွင့်တွေနှင့်
ဂုဏ်တင့်တယ်လေး။
မင်းသုဝဏ်
(၃၁-၁၂-၃၂)
ငွေတာရီမဂ္ဂဇင်း ၁၉၆၁ နိုဝင်ဘာလ
အမှား (၁)
လယ်တောက အပြန် (အ) ပါတာနဲ့ (အ) မပါတာ မူကွဲနှစ်မျိုးတွေ့ပါတယ်။
ပန်ချင်တယ် ကြာညိုဖူးဆိုလို့ (ခရေဖူးဆိုလို့)
မောင်ခူးကာပေး။
မနက်တုန်းဆီက၊
ကြော့ဆုံးကို မောင်မြင်တော့
သူ့ဆံပင် နှင်းဆီပန်းနဲ့ ဂုဏ်တင့်တယ်လေး (ချစ်လို့သာခွဲရ ရန်ကုန်ဘဆွေ)
မူရင်းမှာ ကြော့ဆုံး(ကို) မပါ။
အမှား (၂)
လယ်တောက အပြန် (အ မပါရ)
ပန်ချင်တယ် ခရေဖူးဆိုလို့
မောင် ခူးကာပေး။
မနက်တုန်းဆီက
ကျော့ဆုံးကို မောင်မြင်တော့ (ကြော့ဆုံးကို မောင်မြင်တော့)
သူ့ဆံပင် နှင်းဆီပွင့်တွေနဲ့ (နှင်းဆီပွင့်တွေနှင့်)
ဂုဏ်တင့်တယ်လေး။
မူရင်းမှာ ကြော့ဆုံး(ကို) မပါ။
အမှား (၃)
လယ်တောကအပြန်
ပန်ချင်တယ် ခရေဖူးဆိုလို့
မောင်ခူးကာပေး။
မနက်တုန်းဆီက
ကြော့ထုံးကိုမြင်ပြန်တော့ (ကြော့ဆုံးကို မောင်မြင်တော့)
သူ့ဆံမှာ နှင်းဆီပွင့်တွေနှင့် (သူ့ဆံပင် နှင်းဆီပွင့်တွေနှင့်)
ဂုဏ်တင့်တယ်လေး။ ။
မူရင်းမှာ ကြော့ဆုံး(ကို) မပါ။
အမှား (၄)
လယ်တောကပြန်
ပန်ချင်တယ် ခရေဖူးဆိုလို့
မောင် ခူးကာပေး။
မနက်တုန်းဆီက
ကြော့ဆုံးကို မောင်မြင်တော့
သူ့ဆံပင် နှင်းဆီပွင့်တွေနဲ့ (နှင်းဆီပွင့်တွေနှင့်)
ဂုဏ်တင့်တယ်လေး။
မူရင်းမှာ ကြော့ဆုံး(ကို) မပါ။
အမှား (၅)
နောက်တခုက ပုံနဲ့။ အောက်ဆုံးမှာ မင်းသူ့ဝံ တဲ့။
အမှား (၆)
လယ်တောက ပြန်
ပန်ချင်တယ် ခရေဖူးဆိုလို့
မောင် ခူးကာပေး။
မနက်တုန်းဆီက
ကြော့ဆုံးကို မောင်မြင်တော့
သူ့ဆံမှာ နှင်းဆီပွင့်တွေနှင့် (သူ့ဆံပင်)
ဂုဏ်တင့်တယ်လေး။
မူရင်းမှာ ကြော့ဆုံး(ကို) မပါ။
(၇) အမှား
AI ကို ပုံပို့ပြီး စာသားတောင်းတော့
"ကြွေခဲ့ဆုံး မောင် မြင်တော့" လို့ ရေးပေးတဲ့အတွက် ပြန်ပြောရပါတယ်။ တခါပြောလည်း မှားနေပြန်လို့ ဒုတိယတခါကျမှာ AI က "ကြော့ဆုံး မောင်မြင်တော့" အမှန်ကို လက်ခံသွားတယ်။
မူလစာရေးသူတွေ ကွယ်လွန်တော့ မူရင်းစာတွေကို သတ်ပုံတွေပြင်တင်ကြ၊ ပြင်ထုတ်နေကြတယ်။ မြန်မာစာပေ စည်းကမ်းမလှတော့ပါ။ ဂုဏ်မတင့်တော့ပါ။
မြန်မာအဝတ်အစားနဲ့ ပုံကလည်း အဆင်ပြေတာ ရှာကိုမရ။ ပုံနဲ့တွဲတဲ့ကဗျာကလည်း မှန်တာကရှား။ ခေတ်ကလည်း ပုံပြစားနေကြတာ။ စာအရေးအသားမှန် မှန်ကို ဂရုမစိုက်ကြ။
မှားရေးတဲ့သူတွေက မြန်မာစာချစ်သူ၊ ရသကြိုက်သူ၊ ကဗျာမြတ်နိုးသူတွေလို့ ကင်ပွန်းတပ်ကြတယ်။
သတိထားမိသလောက် ကွယ်လွန်သူတွေရဲ့ မိသားစုတွေကလည်း ရှင်းလင်းတာ၊ ပြင်ပေးတာ မတွေ့မိပါ။
ဇော်ဂျီ၊ မင်းသုဝဏ်၊ မြို့မငြိမ်း၊ မင်းယုဝေ၊ နုယဉ်၊ တက္ကသိုလ်ဘုန်းနိုင်၊ မြသန်းတင့်၊ တင်မိုး စသည် အများကြီး။
ဒီလိုပုံနဲ့ မိုးကြီးချုပ်ခဲ့ပြီ။
ဒေါက်တာတင့်ဆွေ
Comments
Post a Comment