စပါးယောင်ဆောင်သော မြက်ရိုင်း

(ဆေးအတု၊ ဝါးအတု၊ စစ်သားအတု၊ ချစ်သားအတုများသို့)

ပေါက်ခါစတွင်၊ ဤနှစ်ပင်သည်

အသွင်မခြား၊ ဖွံ့ဖွံ့ထွားလျက်

စပါးပင်နှင့် တူလှသည်။ ။

နှစ်ပင်စလုံး၊ မြရွက်ဖုံးကာ

ညှာတံစိမ်းစိမ်း၊ လေတွင်ယိမ်းလျက်

အရွက်နုနု၊ ပေါ်စ ပြုရင်း

အလုအယက်၊ မြေမှထွက်သည်

မြေပျက်ပင်လော မျက်ပင်လော။ ။

မြက်ပင်ရိုင်းကား

စပါးဟန်ဆောင်၊ ချွန်းချွန်းထောင်၍

နေရောင် ပလွှား၊ ဝင့်ဝင့်ကြွားလည်း

ရက်များမကြာ၊ နွမ်းဖျော့ဝါလျက်

အညှာလည်းညိူး၊ အဆစ် ကျိုးခဲ့

အရိုး ကိုင်းကိုင်း၊ ညွတ်ညွတ်ဆိုင်းကာ

ပင်ရိုင်းမြေမှာ၊ ဝပ်တွားလာမှ

မြက်ဇာတိရုပ် ပေါ်တော့သည်။ ။

ထိုအခါတွင်၊ စပါးပင်ကား

မြေပြင်ထဲမှ၊ အားမာန် ထ၍

မြင့်ကြွ ပင်စည်၊ ရွှေရည်ဆွတ်လူး

စပါး ဖူးနှံ၊ မိုးသို့ပျံလျက်

လူ့တွက်ကျေးဇူး၊ စားဦး ရိက္ခာ

သီးမှည့်လာခဲ့။ ။

မြေမှာဝပ်တွား၊ မြက်ရိုင်းများမူ

ကြွက်ဖား အစာ၊ ဝပ်ကျင်း ရှာသည်

အိပ်ရာခန်းဗွေ၊ ဖြစ်ခဲ့လေငြား

စပါးကိုပြိုင်၊ မနိုင်လေဘု

နေရာလုလည်း

အတုအယောင် သာပင်တည်း။ ။ (ဒေါင်းနွယ်ဆွေ)

ရှေးစာကဗျာများ

ဒေါက်တာတင့်ဆွေ