ထွာဆိုင်

ထွာ

ထွာ¹ – ကြိ / ထွာ / လက်ကိုဖြန့်၍ လက်မထိပ် လက်ခလယ်ထိပ်တို့ဖြင့် တိုင်းတာသည်။ “ဘယ်လောက် ရှည်သလဲ သိရအောင် ထွာစမ်းပါ။”

– န / ထွာ / လက်မထိပ်နှင့် လက်ခလယ်ထိပ် အတွင်းရှိ အတိုင်းအရှည်။ တတောင်၏ ထက်ဝက်။ တဆယ့်နှစ်လက်သစ်။ ကိုးလက်မအထွာ။ “တောင်၊ တာ၊ ထွာ၊ မိုက်၊ လက်သစ်စသော အတိုင်းအရှည်များကိုလည်း အညီအမျှ တချက်တည်း စီစဉ် ပညတ်တော်မူ၏။” ရာဇိ။ ၁၄၅။

– စည်း / ထွာ / အထွာအရေအတွက်ကိုပြသောစကားလုံး။ (ရေးသောအခါ ဂဏန်းကို ဝဆွဲရေးချ ရေးရသည်။) “သုံးထွာလုံးပတ်၊ ကိုးတောင်မြတ်ထက်။” မင်းရှင်။ ၁၈။

ထွာ² – ကြိ / ထွာ / ဓားဦးကို မရွှေ့စေဘဲ ဓားရိုးကို ပင့်ချည်ချချည်လုပ်ကာ လှီးဖြတ်သည်။ (အချို့ဒေသတွင် ‘တွာ’ ဟူ၍လည်း သုံးနှုန်းကြသည်။) “ဆေးကို ဓားမောက်ဖြင့် ထွာသည်။” ယု။

ထွာဆိုင် – န / ထွာဆိုင် / လက်ဝါးနှစ်ဘက် လက်မထိပ်ချင်း လက်ခလယ်ထိပ်ချင်း ထိ၍ တိုင်းတာရသော အဝန်း။

ထွာညှိုးဆိုင် – န / ထွာညှိုးဆိုင် / လက်ဝါးနှစ်ဘက် လက်မထိပ်ချင်း လက်ညှိုးထိပ်နှင့် လက်ခလယ်ထိပ်တို့ကို ထိ၍ တိုင်းတာရသော အဝန်း။

ထွာဆိုင်​​လေး​သေးငယ်​ လူဗိုလ်​ပုံလည်​ ထိုခါးကို ​လေတိုးရင်​ ကျိုးမှာအလွန်​စိုးတယ်

ထွာဆိုင်လေးသေးငယ် ဆိုတာ ဘာကိုဆိုလိုတာပါလဲ ဆရာ။

ခါးကို လက်နှစ်ဖက်နဲ့ ပတ်ပြီးတိုင်းတာတဲ့အခါ လုံးပတ်တခုဟာ လက်မ၊ လက်ခလယ်နှစ်ချောင်းထိပ်ချင်း ထိသလောက်သာရှိတာမျိုးကို ခေါ်ပါတယ်။

သစ်ပင်လုံးပတ်ကိုလည်း အဲလိုတိုင်းလေ့ရှိတယ်။

အလျားတိုင်းရင် တထွာဆိုတာ ၉ လက်မ။ တတောင် = ၂ ထွာ = ၁၈ လက်မ။

ထွာဆိုင် = ဆန့်ကားထားသော လက်မထိပ်ချင်း၊ လက်ခလယ်ထိပ်ချင်း စသည်ထိ၍ တိုင်းရသော အဝန်းအတိုင်းအတာ။

ရိုးလှပွင့်ခိုင်၊ သန္တာတိုင်မူ၊ ထွာဆိုင်ထုံးထင့်၊ ကိုးတောင်မြင့်တက်။ ဒုတိယနဝင်းဆိုတက်ဖြိုးလျှံဝေချီရတု။

ဒေါက်တာတင့်ဆွေ