နှစ် – ကြိ / နှစ် / ၁။ ရေစသည်တွင် နစ်စေသည်၊ မြုပ်စေသည်။ "မြစ်မီးရှူးကို ရေ၌နှစ်နှစ်သကဲ့သို့။" ကံကုဏ်။ ၂၃၁။ ၂။ [ဥပစာ] ဒုက္ခပေးသည်၊ နှိပ်စက်သည်။ "မိမိကိုယ်ကို နှစ်ရာကျလေ၏။" စာဏကျ၊ ပ။ ၁၂၂။ ၃။ [ဥပစာ] စွန့်စားအားထုတ်သည်။ "ကြောက်လွဲ ရဲမင်းဖြစ်၊ နှစ်လိုက်တော့မယ်ဟု ဆုံးဖြတ်လိုက်ခါ။" မေမည်း။ ဂဝ။ ၄။ အဆုံးရှုံး အနစ်နာခံသည်။ "နောင်ခါလာ နောင်ခါဈေး၊ ဆွေးဆွေးမြမြ တရာ နှမြော စုံမက်တတ်သည်။"
နှစ်ကူး – ကြိ / နှစ်ကူး / နှစ်ဟောင်းမှနှစ်သစ်သို့ ပြောင်းသည်။
နှစ်ကိုယ်ကြား – ကြိဝိ / နှစ်ကိုဂျား / လူနှစ်ယောက်တည်းကြားရရုံ။ "လျှို့ဝှက်အပ်သောစကားတို့ ကို နှစ်ကိုယ်ကြား ပြောဆိုလျက်။" ဟိတော။ ၁၈၆။
နှစ်ကိုယ်ခွဲ – န / နှစ်ကိုဂွဲ / လူတယောက်တည်းက နှစ်မျိုးနှစ်သွင် ရုပ်ဆောင်ခြင်း။
နှစ်ကိုယ်တစိတ် – ကြိဝိ / နှစ်ကိုဒရိတ် / စိတ်သဘောချင်း တူညီစွာ။ "ခမ်းပတ်မင်းကြီးနှင့် ရေနံချောင်းမင်းကြီးတို့မှာ ရွှေပြည်ဝန်ကြီးနှင့် နှစ်ကိုယ်တစိတ်ဖြစ်ကြ၍။" ရာဇဝင်၊ နိဒါန်း။
နှစ်ကုန်းတကော့ – နဝိ / နှစ်ကုန်းဒဂေါ့ / ခန္ဓာကိုယ် မဖြောင့်မတန်း ကုန်းကော့သော။
နှစ်ကျိပ်ရှစ်ဆူ – န / နှစ်ဂျိပ်ရှစ်ဆူ / မဟာကပ်ပေါင်း လေးအသင်္ချေနှင့် ကမ္ဘာသိန်းအတွင်း ပွင့်တော်မူသော တဏှင်္ကရာမြတ်စွာဘုရားမှ ဂေါတမမြတ်စွာဘုရားအထိ ၂၈ ဆူသော ဘုရားများ။
နှစ်ကြီးသမား – ကြိ / နှစ်ကြီးသမား / တရားဥပဒေအရ ဆယ်နှစ်အထက် ထောင်ဒဏ်အပြစ်ပေးခြင်းခံရသူ။
နှစ်ကြေး – န / နှစ်ကြေး / နှစ်အလိုက် ပေးဆောင်ရသော အခွန်ငွေ စသည်။
နှစ်ကွင်း – န / နှစ်ကွင်း / သစ်ပင်ကြီးအချို့၏ ပင်စည်အတွင်းသားတွင် အသက်တနှစ်ပြည့်တိုင်းပြည့်တိုင်း ဗဟိုမူ စက်ဝိုင်းသဏ္ဌာန် ပေါ်လာတတ်သော အပိုင်း။
နှစ်ချို့ – နဝိ / နှစ်ချို့ / တနှစ်ကာလ အပိုင်းအခြားကို ကျော်လွန်တည်ရှိသော။ "ချင်းတို့နယ်တွင် အရသာအရှိဆုံး ဖြစ်သော နှစ်ချို့ ခေါင်ရေများနှင့် အသားဟင်းများကို ယူဆောင်ကာ ကျွေးမွေးလေ၏။" ထိး၊ စ။ ၉၇။
နှစ်ချက်သင်္ချာ – န / နှစ်ချက်သင်္ချာ / နည်းစနစ်မျိုးလုံးနှင့်ပင် သင့်လျော်သော အရာ။
နှစ်ချင်း – ကြိဝိ / နှစ်ချင်း / တနှစ်ကာလ အပိုင်းအခြားအတွင်း။ တနှစ်တည်းနှင့်။ "နိုင်ငံခြားမျိုးစေ့များမှ နှစ်ချင်းဆေး အမြောက်အမြားမရနိုင်။" ဆေးရွက်။ ၁၅၆။
နှစ်ချင်းဖွဲ့ – ကြိ / နှစ်ချင်းဖွဲ့ / တနှစ်တည်းနှင့် ပြီးမြောက်သည်။
နှစ်ချင်းပေါက် – ကြိ / နှစ်ချင်းပေါက် / နှစ်ချင်းဖွဲ့ – ကြိ၊ နှင့် အတူတူ။ "နှစ်ချင်းပေါက် တက္ကသိုလ်ဝင်နိုင်စေမယ်ဆိုပြီး။" တင်းစာ။
နှစ်ချင်းသီး – ကြိ / နှစ်ချင်းသီး / စိုက်သည့်နှစ်တွင်ပင် အသီး သီးသည်။
နှစ်ချောင်းငင် – ကြိ / နှစ်ချောင်းငင် / ဥဿရစ် ထွက်လာအောင် အက္ခရာအောက်တွင် မျဉ်းမတ်နှစ်ချောင်းရေးသည်။
နှစ်ချောင်းပုဒ် – န / နှစ်ချောင်းပုတ် / မြန်မာစာတွင် မျဉ်းမတ်အတိုနှစ်ချောင်းကို ယှဉ်ကပ်ရေးရသော ပုဒ်မ။ ပုဒ်ကြီး။
နှစ်ချုပ် – န / နှစ်ချုပ် / တနှစ်ကာလ အပိုင်းအခြားအတွင်း
နှစ်ချုပ်စာရင်း – န / နှစ်ချုပ်စရင်း / တနှစ်လုံးအတွက် လုပ်ဆောင်ချက်များကိုချုပ်၍ ပြုစုထားသောစာရင်း။ "မြူနီစီပယ်များ၏ နှစ်ချုပ်စာရင်းတွင် ဖော်ပြထားလေသည်။" ဒေအုပ်။ ၁၆၉။
နှစ်ချုပ်ရှင်းတမ်း – န / နှစ်ချုပ်ယွင်းတန်း / တနှစ်လုံးအတွက် လုပ်ဆောင်ချက်များကိုချုပ်၍ ပြုစုထားသော ရှင်းတမ်း။ "ကျွန်ုပ်တို့သည် အလုပ်ဌာနတွင် အကြမ်းရေး၍လည်ခဲ့သော နှစ်ချုပ်ရှင်းတမ်းကို အိမ်သို့ယူလာခဲ့လေသည်။" မြဝတီ၊ ၁၊ ၃။ ၄၆။
နှစ်ချုပ်အစီရင်ခံစာ – န / နှစ်ချုပ်အစီရင်ခံစာ / တနှစ်လုံးအတွက် လုပ်ဆောင်ချက်များကိုချုပ်၍ ပြုစုထားသော အစီရင်ခံစာ။ "တိုင်းပြည်ဌာနအသီးသီးတို့၏ နှစ်ချုပ်အစီရင်ခံစာများ စသည်တို့မူ။" သင်နည်း။ ၃၀၇။
နှစ်ခြိုက် – ကြိ / နှစ်ခြိုက် / သဘောကျနှစ်သက်သည်။ "ဒဂုန်ဆရာတင်၏ လူပျိုပါဘဲနှင့် အပျိုပါဘဲ ပြဇာတ်များကို ပရိသတ်များ အလွန်နှစ်ခြိုက်ကြလေသည်။" ယဉ်ကျေး၊ ပ။ ၅၆။ "တရားတော်လာ ဘိမ္မာကို နားနာနှစ်ခြိုက် နှလုံးပိုက်၍။" သံဝေ* ၆။
– ကြိဝိ / နှစ်ခြိုက် / အားပါးတရ။ အားရပါးရ။ "လက်ကောက်လက်ကျပ်၊ လက်စွပ်ပုံခတ်၊ လက်တော်ဝတ်လည်း ဆွတ်ဆွတ်နှစ်ခြိုက်ပူဇော်လိုက်သည်။" တန်ရ* ၃၅။
နှစ်ခြင်းမင်္ဂလာ – န / နှစ်ချင်းမင်ဂလာ / လူကို ရေတွင်နှစ်ခြင်းဖြင့် ခရစ်ယာန်ဘာသာတွင်းသို့ သွတ်သွင်းသည့် မင်္ဂလာ။
နှစ်ခွ – န / နှစ်ခွ / အယူဝါဒ၊ စကား၊ စိတ် စသည်တို့ နှစ်မျိုးဖြစ်နေခြင်း။ "မြတ်စွာဘုရား၏စကားတော် နှစ်ခွကဲ့သို့ဖြစ်သည်ဟု ထင်မှတ်၍။" ကာနု။ ၈၉။
နှစ်စဉ်ကြေး – န / နှစ်စင်ဂျေး / နှစ်ကြေး – န၊ နှင့် အတူတူ။
နှစ်ဆန်းတရက် – န / နှစ်ဆန်းတယက် / နှစ်သစ်၏ ပထမဆုံးရက်။
နှစ်ဆွေ့ဆွေ့တပွေ့ – န / နှစ်ဆွေ့ဆွန့်ဒဗွေ့ / စပါးပင် တပွေ့ရအောင် နှစ်ဆွေ့ဆွေ့၍ ရိတ်သောနည်း။
နှစ်တိုး – န / နှစ်တိုး / တနှစ်အတွက် တိုး၍ရသော လစာငွေ အစိတ်အပိုင်း။ "နှစ်တိုးပေးခြင်းနှင့် ရာထူးတိုးပေးခြင်းသည် ဤနေရာတွင် ကွာခြားသည်။" သစ်ညွှန်း၊ ပ။ ၄။
နှစ်တန်းအစား – န / နှစ်တန်းဗား / အမြင့်ညီတိုင်နှစ်တိုင်စီအပေါ်၌ အလျားလိုက် မျဉ်းပြိုင်တပ်ဆင်ထားသော အားကစားလေ့ကျင့်ရာတွင် အသုံးပြုရသည့် တန်းစင်စုံ။
နှစ်ထောင်းအားရ – ကြိဝိ / နှစ်ထောင်းအားယ / ဝမ်းသာအားရ။ ဝမ်းပန်းတသာ။ "ရွာအတွင်းရှိ ကလေးအပေါင်းတို့မှာလည်း နှစ်ထောင်းအားရ ဝမ်းမြောက်လျက် ရှိနေကြကုန်၏။" သုံးပွင့်။ ၄၃။
နှစ်ထပ်ကိန်း – န / နှစ်ထပ်ကိန်း / [သင်္ချာ] ဂဏန်းတခုကို ယင်းဂဏန်းနှင့်ပင် နှစ်ကြိမ်မြှောက်၍ရသော ကိန်း။
နှစ်ထပ်ကွမ်း – ကြိ / နှစ်ထပ်ဂွမ်း / ၁။ ကက်ကစားရာတွင် ကက်ဖြစ်စေ၊ ယင်းဖြစ်စေ၊ ထပ်ဖြစ်စေ နှစ်မျိုး ကွမ်းသည်။ ၂။ [ဥပစာ] နှစ်ကြိမ်ထပ်၍ ဖြစ်သည်။ "မိန်းကလေးက ကိုယ့်ကိုယ်ကို သတ်သေတယ်ဆိုတော့ နှစ်ထပ်ကွမ်း ရှုံးမနေဘူးလား။" ဗြူ၊ ၇။
နှစ်ထပ်တိုး – န / နှစ်ထတ်တိုး / အရင်းငွေပေါ်တွင်လည်းကောင်း၊ အတိုးငွေပေါ်တွင် လည်းကောင်း တွက်ယူသော ငွေတိုး။ "ဖဲရှုံးသောသူထံမှ မြေကို မြေရှင်များက နှစ်ထပ်တိုးဖြင့် အပိုင်ခံသည်။" ခေတ်ဟောင်း၊ ၂၈။
နှစ်ထပ်သက်န်း – န / နှစ်ထတ်သင်္ကန်း / ဒုကုဋ် – န၊ နှင့် အတူတူ။
နှစ်နှစ်ကာကာ – ကြိဝိ / နှစ်နှစ်ကာဂါ / ၁။ နှစ်နှစ်သက်သက်။ ၂။ နက်နက်နဲနဲ။ စွဲစွဲလမ်းလမ်း။ လေးလေးနက်နက်။ "ဟုတ်ရာမှန်ရာကို နှစ်နှစ်ကာကာ တွေးတောခြင်းမပြု။" ကိုယ်။ ၂၂။
နှစ်ပရိစ္ဆေဒ – န / နှစ်ပရိတ်စေဒ / နှစ်ကာလ အပိုင်းအခြား။ "ဒါပေမယ့်လို့ နှစ်ပရိစ္ဆေဒက ကြာတော့ ဝမ်းဂါတ်းပါးဖြစ်နေပါတယ်။" မြန်ချစ်။ ၂၆။
နှစ်ပါးစုံ – န / နှစ်ဗားစုံ / ၁။ လင်မယားစုံ။ "အပျိုလူပျိုချင်း မိဘနှစ်ပါးထိမ်းမြား၍ နှစ်ပါးစုံဖြစ်ပွားသော သားသမီးအရင်းသည် သြရသမည်၏။" သုတာ။ ၁၉၀။ ၂။ နှစ်ဘက်၊ နှစ်မျိုးစုံ။ "ထိုကောင်းကင် မကောင်းသော နှစ်ပါးစုံ ရောရှက်သော မိဿကကံကြောင့်။" ဓမ္မရာသီ။ ၁၃။
နှစ်ပါးသွား – န / နှစ်ဗားသွား / မြန်မာ့ဇာတ်သဘင်တွင် မင်းသမီးနှင့်မင်းသား ချစ်ခန်းကြိုက်ခန်းအမူအရာဖြင့် သီဆိုကခုန်ခြင်း။ သစ္စာထား။ မြိုင်ထ။ "ဇာတ်အတွက် ပြည်တယ်မိရုံသဘက နှစ်ပါးသွားပင် ထွက်ခဲ့နိုင်ပြီ ဖြစ်ခြင်းကြောင့်။" ကေသာ။ ၁၉၄။
နှစ်ပတ်လည် – နဝိ / နှစ်ပတ်လည် / နှစ်တပတ်လည်သော။ "နှစ်ပတ်လည်နိုင်ငံပေါင်းစုံ စိုက်ပျိုးရေးဆိုင်ရာ စာတမ်းမူ။" မြန်သွေး။ ၁၆၁။
နှစ်ပတ်လျှို – န / နှစ်ပတ်လျှို / ၁။ မိန်းမဆံထုံး ထုံးနည်းတမျိုး။ "နှစ်ပတ်လျှိုမူရာမူ ရှေးနည်းတူ တပတ်ရစ်ထားသော ကွင်းသဏ္ဌာန်ကိုထပ်၍... ဆံကို ထုတ်လိုက်ခြင်း ဖြစ်၏။" စွယ်ကျမ်း၊ ၄။ ၂၇၇။ ၂။ မိန်းမချည် ခေါင်းချည် ကြိုးချည်နည်း။ "နှစ်ပတ်လျှိုမိန်းမချည်။" လူထုသိပ္ပံ၊ ၄။ ၁၀၈။
နှစ်ဘက်ချွန် – န / နှစ်ဖက်ချွန် / ၁။ လက်ဖြင့်လွှဲ၍ ရန်သူကို ပစ်ခတ်ရန် အစွန်းနှစ်ဘက်ကိုချွန်ထားသော သစ်သားချောင်း။ တုတ်ချွန်။ "လေး၊ မြား၊ နှစ်ဘက်ချွန်၊ တုတ်၊ ဓားတို့ ကို။" ငရဲ။ ၆၄။ ၂။ [ဥပစာ] (နှစ်ဘက်ချွန်ကဲ့သို့) နှစ်ဘက်လုံးကို မထောက်မညှာပြုမူလေ့ရှိသူ။ "အနုမြူဗုံးခေတ်တွင် နှစ်ဘက်ချွန်ဝါဒ တွင်ကျယ်နိုင်မယ်။" ငရဲ။ ၂၄၄။
နှစ်မည်ဆင် – န / နှစ်မည်ဆင် / ၁။ အသွေးအရောင်နှစ်မျိုး ဖက်တွဲပြုလုပ်ထားသော အဝတ်အထည်။ ၂။ [ဥပစာ] နှစ်မျိုး။ နှစ်ပုံ။ နှစ်ခွ။
ဒေါက်တာတင့်ဆွေ
Comments
Post a Comment