မြန်မာနိုင်ငံ သတင်းစာများ

မြန်မာ့စွယ်စုံကျမ်း အတွဲ ၁၀

ရတနာပုံနေပြည်တော်သတင်းစာ

တလ ၄ ကြိမ် ထုတ်ဝေပါသည်။

တနှစ်တွက်

မြန်မာနိုင်ငံ သတင်းစာများ။ ။မြန်မာပြည်တွင် ပဌမဆုံး ထုတ်ဝေခဲ့သည့် “မော်လမြိုင်ခရော်နီကယ်” သတင်းစာကို စတင် ပုံနှိပ်သည့် ခုနှစ်မှာ ၁၈၃၆ ခုနှစ်ဖြစ်၍ ထိုစဉ်က အနောက်နိုင်ငံများ၌ သတင်းစာလုပ်ငန်းမှာ သိသိသာသာ ကြီး တိုးတက်လျက် ရှိနေပေပြီ။

၁၈၂၄ ခုနှစ်တွင် ပဌမ အင်္ဂလိပ်-မြန်မာ စစ်ပွဲ ပြီးဆုံးခဲ့ပြီးနောက် အင်္ဂလိပ်အား မြန်မာက တနင်္သာရီနှင့် ရခိုင်တိုင်းတို့ကို ပေးလိုက်ရသည်။ ထိုနယ်များတွင် အင်္ဂလိပ်တို့သည် လွတ်လပ်စွာ စီမံအုပ်ချုပ်ခွင့်၊ စီးပွားကုန်သွယ်ခွင့်၊ သာသနာပြုခွင့်နှင့် ပုံနှိပ်ထုတ်ဝေနိုင်ခွင့်တို့ကိုပါ တပါတည်း ရရှိလေသည်။

မော်လမြိုင်မြို့တွင် ပဌမဆုံး ထုတ်ဝေနိုင်ခဲ့သည့် “မော်လမြိုင် ခရော်နီကယ်” သတင်းစာကို တနင်္သာရီတိုင်း မင်းကြီး ဗလန်ဒယ် ဆိုသူက အင်္ဂလိပ်ဘာသာဖြင့် ၁၈၃၆ ခုနှစ် မတ်လ ၃ ရက်နေ့၌ ထုတ်ဝေခဲ့၏။ ပဌမဆုံးအယ်ဒီတာမှာ အစိုးရ အခမဲ့ကျောင်း၌ ကျောင်းအုပ် လုပ်နေသော အမေရိကန် သာသနာပြု ဆရာကြီး မင်းနက် ဖြစ်သည်။ နောင်တွင် ကျောင်းကိစ္စများထက် သာသနာပြု ကိစ္စများတွင် ပို၍ စိတ်ဝင်စားကာ ဆောင်ရွက်နေသည်ကို အစိုးရက တွေ့ရှိသဖြင့် ကျောင်းအုပ် ရာထူးမှ ဖြုတ်ချလိုက်လေသည်။ ထို့ကြောင့် ကျောင်းကို ပိတ်ထားရပြီးလျှင် သတင်းစာကိုလည်း ခေတ္တမျှ ရပ်ဆိုင်း ထားရလေသည်။

၁၈၃၇ ခုနှစ် မတ်လ ၂၀ ရက်နေ့တွင် ကာလကတ္တားမြို့မှ သာသနာပြု ဆရာကြီး ဂျီ၊ ဂျီ၊ ဟပ်ဖ ရောက်ရှိလာသဖြင့် သတင်းစာကို ၁၈၃၇ ခုနှစ် ဧပြီလ ၁၅ ရက်နေ့၌ ပြန်လည် ထုတ်ဝေလေသည်။ ထိုစဉ်က သတင်းစာကို လပေး ယူသူများမှာ ၁၀ ယောက်မျှသာ ရှိသည်။ သို့သော် ကြော်ငြာများနှင့် အပြင် ပုံနှိပ် လုပ်ငန်းများမှ ရရှိသည့် ငွေများဖြင့် သတင်းစာ ထုတ်နိုင်အောင် ရရှိလေသည်။ “မော်လမြိုင် ခရော်နီကယ်” သတင်းစာသည် ဗြိတိသျှ အစိုးရထုတ် သတင်းစာ တစောင် ဖြစ်၍ အစိုးရ အမှုထမ်းများနှင့် အစိုးရဌာနမှ သတင်းများကို ထည့်သွင်း ဖော်ပြလေ့ရှိသည်။

အထောက်အထားများအရ သိရှိရသလောက် ပဌမဆုံး တိုင်းရင်းဘာသာဖြင့် ထုတ်ဝေသော သတင်းစာမှာ “ဆုတ္တုဂဇ” (ဝါ) “မောနှင်းစတား” ဖြစ်၍ ၁၈၄၁ ခုနှစ်၌ ထုတ်ဝေခဲ့သည်။ ယင်း သတင်းစာကို ကရင်ဘာသာဖြင့် ခရစ်ယန်နှစ်ခြင်းသာသနာပြုအဖွဲ့က ထုတ်ဝေ၍ ထို...

ဒေါက်တာတင့်ဆွေ