ဒုန်းဝေး ဒုံးဝေး

တင်ထားတဲ့စာ = ဒုံးဝေးသူတွေ မနည်းပါ

ကွန်မင့်တခု = စာပေအရေးအသားမှာ မသုံးပါဘူး စကားပြောသက်သက်ပါပဲ

ပြန်စာ

(၁)

ဝစ်ရှင်နရီ

ဒုံးဝေး =  တော်ရုံတန်ရုံနှင့်သဘောမပေါက်နိုင်ဖြစ်သည်။ နားဝေးသည်။

အထပ်ထပ်ပြောဟောပါလျက်ရွာသားတို့ကားဒုံးဝေးလှ၏။ သက်ရောက်။ ပ၊ ၄၂။

(၂)

"ဒုံးဝေးတဲ့ ကတုံးငအေး"(စ/ဆုံး) မင်းမော်ကွန်း၊ရွှေသမီး #မြန်မာဟာသကား M O V I E - ရုပ်ရှင်

(၃)

မြန်မာအဘိဓာန် အကျဉ်းချုပ်၊ အတွဲ ၂ (၁၉၇၉)၊ စာမျက်နှာ ၁၈၂။

ဒုန်းကြီး – န / ဒုန်းဂျိုး / ညှင်းလုံးသံစဉ် ညှို့ထားသော စောင်းကောက်ကြီး တဆယ့်သုံးကြိုးတွင် အပေါ်ကြိုး ရှစ်ကြိုး။

ဒုန်းချ – ကြိ / ဒုန်းချ / အလျင်အမြန်၊ မရပ်မနားပြေးသည်။

ဒုန်းစီး – ကြိ / ဒုန်းစီး / မြင်းကို ဒုန်းပြေးစေ၍ စီးသည်။

ဒုန်းစိုင်း – ကြိ / ဒုန်းစိုင်း / ၁။ မြင်းကို ဒုန်းစီးသည်။ “ဟိုမှာ လူတယောက် မြင်းဒုန်းစိုင်းလာနေတယ်။” ဂျုံ။ ၁၆၀။

၂။ အပြေးအလွှား အလျင်အမြန်သွားသည်။ “ကျောင်းဆင်းချိန်များတွင် အိမ်သို့ ဒုန်းစိုင်းပြန်လာကာ။” ဆန်း။ ၂၇။

ဒုန်းဆောင် – ကြိ / ဒုန်းဆောင် / အလျင်အမြန် မရပ်မနားပြေးသည်။

ဒုန်းတိုက် – ကြိဝိ / ဒုန်းဒိုက် / အလောတကြီး။ အပူတပြင်း။

ဒုန်းနွား – န / ဒုန်းနွား / အပြေးသန်သော နွား။

ဒုန်းမြင်း – န / ဒုန်းမျဉ်း / အပြေးသန်သောမြင်း။ ပြိုင်မြင်း။ “ပိတ်ဖွင့်၍ လွှတ်လိုက်သော ဒုန်းမြင်းကဲ့သို့။” ရွှေ၊ ဂ၊ ၉၃။ ၁၃၉။

ဒုန်းရိုက် – ကြိ / ဒုန်းယိုက် / နွား၊ မြင်း စသည်ကို ဒုန်းပြေးအောင် ရိုက်နှက်မောင်းနှင်သည်။

ဒုန်းလှည်း – န / ဒုန်းလဲ / လျင်မြန်စေရန် ပြုလုပ်ထားသော လှည်းယာဉ်တမျိုး။

ဒုန်းဝေး – ကြိ / ဒုန်းဝေး / ၁။ နားလည်မှု နည်းပါးသည်။ ၂။ ထုံသည်။ ထိုင်းသေသည်။ အသည်း။ “မင်းအတော် ဒုန်းဝေးပါကလား။” သုတ၊ ဒု။ ၅၆၉။

(၄)

စကားပြောသလိုစာရေးနည်း တွင်ကျယ်လာပါတယ်။ 

ဝတ္ထုတွေထဲမှာ ဇာတ်လိုက်တွေ စကားပြောခန်းကို စကားပြောသလိုရေးကြရတယ်။

ကာတွန်းတွေမှာလည်း စကားပြောသံအတိုင်း ရေးကြလေ့ရှိတယ်။

ဆိုရှယ်မီဒီယာမှာလည်း အတူတူ။

သီချင်းကိုလည်း စကားပြောသလို ဆိုကြရတယ်။

(၅)

သတ်ပုံကျမ်းမှာ ဒုန်း လို့ပါပေမဲ့ ဒုံး လို့ရေးတာကို အလွန်မှားတယ်လို့ မထင်ပါ။

ဒေါက်တာတင့်ဆွေ