ဆေးပညာစာများ စာအုပ်

(တိုင်းပြည်ထွက်ပြေး နိုင်ငံရေးလုပ်သူတယောက် ဟိုရောက်ဒီရောက်)

ကွန်မင့်တခု = ကျွန်တော်ဆယ်ကျော်သက်တုန်းက နေမကောင်းရင် ဒေါက်တာတင့်ဆွေရေးတဲ့ English ဆေးနံမည်နှင့် ရောဂါကုသသက်သာနိုင်တဲ့ဆေးနည်းစာအုပ်ဖတ်ပြီး ကြီးပြင်းခဲ့ရပါတယ်။ အဲဒီစာအုပ်က ဆရာရေးထားသားတာ ဟုတ်လားခင်ဗျ

မဟုတ်လောက်လို့ ထင်ပါတယ်။ 

ကျွန်တော်က ဆေးပညာစာများစာအုပ် မြန်မာလို ၃ အုပ်သာ ထုတ်ဘူးပါတယ်။

ကွန်မင့် = စာအုပ်နာမည်တွေ သိပါရစေဆရာ

ကျွန်တော် ဆေးပညာစာများ စာအုပ် ၃ အုပ် ထုတ်ထားပါတယ်။ စာအုပ် ၃ အုပ်လုံးကို ကျွန်တော့မူ သတ်ပုံနဲ့သာ ရိုက်နှိပ်ပေးကြပါတယ်။ ပုဂံတိုက်နဲ့ စိတ်ကူးချိုချို ကျေးဇူး။ စာအုပ်တွေ လက်ကျန် ရှိ မရှိ မသိပါ။

နဝတ-နအဖ စစ်အစိုးလက်ထက်တုန်းက စာအုပ်ထုတ်ဖို့ အကြိမ်ကြိမ်ကြိုးစားခဲ့သေးတယ်။ ကျွန်တော့်နာမည်နဲ့ဆို ထုတ်ဝေခွင့် ရမှာမဟုတ်လို့ တခါမှမတခါဘူးတဲ့ ကလောင်နာမည်တခု ရွေးပေးသေးတာ။ မအောင်မြင်လိုက်ပါ။

၂၀၁၆-၂၀၁၇ ခုနှစ်အတွင်းမှာတော့ ဆေးပညာစာ ထုတ်နိုင်တာ ၃ အုပ်တိတိရှိပြီ။ ကျွန်တော့စာအုပ် ၃ အုပ်ကို ကျွန်တော့သတ်ပုံမူအတိုင်း ပုဂံတိုက်နဲ့ စိတ်ကူးချိုချိုတို့က ထုတ်ပေးပါတယ်။ ကျေးဇူး။

၁။ ဒေါက်တာတင့်ဆွေ ဆေးပညာစာများ (ကိုယ်ဝန်ဆောင်များအတွက်) - ၂၀၁၆ ခုနှစ်၊ ပထမအကြိမ်။

၂။ ဒေါက်တာတင့်ဆွေ ဆေးပညာစာများ (အသည်းရောဂါစာများ) - ၂၀၁၇ ခုနှစ် မတ်၊ ပထမအကြိမ်။

၃။ ဒေါက်တာတင့်ဆွေ ဆေးပညာစာများ (အမျိုးသမီးရောဂါစာများ ၁ + ၂) - ၂၀၁၇ အေပြီလ၊ ပထမအကြိမ်။

ရေးထားပြီးသား စာတွေကတော့ များတယ်။ နောက်တအုပ်ကို ကလေးဆေးပညာများ စာအုပ်ထုတ်မလို့ အဆင်သင့် လုပ်ထားတယ်။ ကံဆိုးချင်တော့ တိုင်းပြည်အခြေအနေ မကောင်းတော့ ထုတ်မရတော့ပါ။

ဆေးပညာစာမဟုတ်တာလည်း စာအုပ်ထုတ်ချင်တယ်။ စာတွေက ရေးထားပြီးသား။ တလောက ပြည်တွင်းက စာအုပ်တိုက်တခုကို ပေါ်လစီသတ်ပုံတွေအတိုင်း မပြင်ဘဲ ထုတ်လို့ရပါသလား လှမ်းမေးပါတယ်။ စာအုပ်တိုက်က ယဉ်ကျေးစွာနဲ့ စာပြန်ပါတယ်။ ၂၀၂၃ ကစပြီး အခက်အခဲတွေ ရှိသွားလို့ပါတဲ့။

နိုင်ငံရေးဖြတ်သန်းမှု အကြောင်းစာအုပ်အတွက် တိုက်တွန်းမှုတွေကတော့ များတယ်။ အခုထိ ရှေ့မဆက်နိုင်။

ယူအက်စ်အေမှာတော့ စာအုပ်ထုတ်လို့ မခက်ခဲလှပါ။ ဒါပေမဲ့ ဖတ်မဲ့သူ မရှိ။ ကျွန်တော်က ပြည်တွင်းမှာနေသူတွေအတွက်သာ ရည်စူးတာ။

မြန်မာစာအတွက် အွန်လိုင်းဆွေးနွေးခန်း လုပ်မလားလို့ ပရော်ဖက်နယ် မီဒီယာသမားတယောက်နဲ့ စီစဉ်သေးတယ်။ မလုပ်ဖြစ်ပါ။ သတင်းမီဒီယာနဲ့ မြန်မာစာအကြောင်း မတူပါ။ မေးတဲ့သူကလည်း မြန်မာစာကို နှိုက်နှိုက်ချွတ်ချွတ်သိမှ ပိုကောင်းတယ်။ 

တယောက်တည်း ဟောပြောတာလုပ်မလား။ ပျင်းစရာကြီး။ စိတ်ကူး မတည့်သေးပါ။

ကျွန်တော့်မှာ မာနလေး တမိုက်သာသာရှိတယ်။ စာရေးဟန်နဲ့ အသုံး၊ စာလုံးပေါင်းမှာ မူထားတယ်။

ဒေါက်တာတင့်ဆွေ