'အဘ'ဆိုတာ အဘမတော်သူကို ခေါ်ပါသတဲ့

ကွန်မင့်တခု = ၁၉၉၀ ပြည့်နှစ်မတိုင်မီက အဲဒီ 'အဘ'အသုံးအနှုန်း မတွင်ကျယ်သေးဘူးဆရာ။

ဟုတ်တယ်။

'အဘ'ဆိုတာ ယဉ်ကျေးတဲ့ ဆွေးမျိုးစပ်အသုံးစကား ဖြစ်ပါတယ်။ လူတိုင်းလူတိုင်းမှာ အမျိုးတွေရှိကြပြီး သင့်မှန်တဲ့အခေါ်အသုံးကိုရွေးပြီး ခေါ်ဝေါ်ကြရပါတယ်။

အမေ၊ အမေ၊ ဖေဖေ၊ မေမေ၊

ဦးလေး၊ ဦးကြီး၊ အုန်းကြီး၊ အုန်းလေး၊

အဒေါ်၊ ဒေါ်ကြီး၊ ဒေါ်လေး၊ ကြီးတော်၊ ဒွေးလေး၊

အန်ကယ်၊ အန်တီ၊

အဘိုး၊ အဖိုး၊ အဘွား၊ အဖွား၊

'အဘ'၊ ဘကြီး၊ ဘလေး၊

'အဘ' အသုံးကို 'အဘ'မဟုတ်သူတိုင်းကို ခေါ်ခိုင်းတဲ့ ဓလေ့ဆိုးကို ဒုတိယအကြိမ် စစ်တပ်ကအာဏာသိမ်းတော့ သွတ်သွင်း၊ သင်ကြား၊ အတင်းအခေါ်ခိုင်းလာတယ်။ ဥပဒေကဲသို့ အာဏာတည်သောအမိန့်။

အစမှာတော့ စစ်တပ်ထဲက အရာရှိတိုင်းကို 'အဘ' လို့ခေါ်ကြရတယ်။

နောက်တဆင့် အရပ်သားတွေပါ စစ်တပ်အရာရှိတွေကို 'အဘ'လို့ခေါ်ကြရတယ်။

'အဘ'လို့ မခေါ်လည်းရပေမဲ့ အဟုတ်ကြီးထင်သူက တဝက်လောက်ရှိမယ်။

'အဘ' ခေါ်ရင် လိုချင်တာရတတ်လို့လည်း ခေါ်ကြတာရှိတယ်။

ကြာတော့ အကျင့်ဆိုး နှုတ်ကျိုးလာကြတယ်။ 

အရပ်သားအချင်းချင်း ကိုယ်ထက်အသက်ဝါကြီးသူကိုပါ 'အဘ' ဘွဲ့ပေးကြတယ်။

'အဘ'ခေတ်ကျဆုံးပါစေလို့ မကြာခဏ တင်ပြပါတယ်။ တချို့က အခုထိ မပျောက်သေးပါ။

အမျိုးမတော်ပေမဲ့ အသက်အရွယ် ရာထူးဂုဏ်မြင့်တဲ့ အမျိုးသားကိုခေါ်ဆိုကြောင်း ဝေါဟာရဖွင့်ဆိုချက်တခုမှာ ပါတယ်။

'အဘ' = ဖခင်အရွယ်ဖြစ်သော ယောက်ျားကို ရိုသေလေးစားမှုဖြင့်ခေါ်သောစကား။

အောင်မြေမှန်သော၊ ပုဂံမြို့နေ၊ 'အဘ'ဆရာ။ ပုည။ ၃၉။

'အဘ'ဘိုးမင်းခေါင်လို့လည်း ရေးနေကြတယ်။ 'အဘ'လည်း မတော်ပါ။

ခရစ်ယာန်ကျမ်းစာမှာလည်း ပါတယ်။

အဗ္ဗ 'အဘ'

သမ္မာကျမ်းစာတစ်နှစ်တာ

နေ ၁၂-၁၃

တ ၄း၂၃-၃၇

ဘုရားသခင်သည် ဘုံဗိမာန်တော်၌ စံပယ်လျက် မိဘမရှိသော သူတို့၏အဘဖြစ်၍ မုဆိုးမတို့ ဘက်မှာ တရားစီရင်တော်မူ၏။ (ဆာ ၆၈း၅)

'အဘ' ဇာတ်သွတ်သွင်းပေးသူတွေထဲက တယောက်ဖြစ်သူဟာ ထောင်ကျပြီး လွတ်လောတော့ အင်တာဗျူးမှာ သူ့ကိုယ်သူ 'အဘ' တဲ့။

ကိုယ့်ဖခင်ကို အဖေ၊ ဖေဖေလို့ တနေ့တခါ မခေါ်ဖြစ်ပေမဲ့ တွေ့တဲ့လူတိုင်းကို 'အဘ' 'အဘ'နဲ့ခေါ်ကြသူတွေ ရှိတယ်။

'အဘခေတ်' ကျဆုံးပါစေ။

အဘရောဂါ https://dr-tint-swe.blogspot.com/2021/06/blog-post_77.html

မြန်မာ့ဆွေမျိုးစပ် ဝေါဟာရများ https://burmese-spelling.blogspot.com/2023/03/blog-post_214.html

ဒေါက်တာတင့်ဆွေ