ပျိုလေး

သီချင်းသံ ချိုအေးလို့

ပျိုလေးတို့ ရွာဆီမှာ

မြူးကြ ဘာသာ။

      သည်ချိန်ခါ

      ရွာသူတဲ့ ပျော်ဆဲ။

ကန်ဆီမှာ သံစုံမြွက်တယ်

ရေရွက်တဲ့ ပွဲ။   ။

ကန်ပေါင်မှာ သူရပ်တော့

မိုးနတ်သူ ပုံပမာ

ပျိုလေး သူဇာ။

      သူ့ ရူပါ

      မျက်နှာက ကြည်အေး။

ဒီရွာသူ အပျိုချောငယ်

တောသူ့ ပဂေး။ ။

ကြာပွင့်ကြီး သင်းကြူကြူ။

       ကိုလူပျို ပြွေသံဆန်းတယ်

       မှန်းဆတဲ့ သူ။

ကြာပွင့်ကို ချူ၊ ချူမယ်တဲ့လား။

ပျိုလေးကို ကြူ၊ ကြူမယ်တဲ့လား။

       သီချင်းသံ လေပြေသင်းမှာ

       ညှင်းပေါ့တအား။   ။

ခူးမယ်တဲ့ ဆွတ်မယ်။

       ကန်လယ်မှာ ကြာနီပန်းငယ်

       လန်းတင့်လှတယ်။

ကြာပွင့်ကို ရွယ်၊ လွယ်ပါလိမ့်လေး။

ပျိုလေးကို ရွယ်၊ လွယ်ယောင်နှင့် ဝေး။

       ကိုလူပျို ကန်ပေါင်ရိုးက

       ညှိုးစိတ်နှင့် ဆွေး။   ။

မိုးချုပ်လို့ ချိန်တန်။

       မလေးပျို ရေကိုရွက်တယ်

       ရွာဘက်ကို ပြန်။

ကန်ရိုးမှာ ကျန်

ပြွေသံက ကြူသေး။

       ပျိုလေးရယ် ဘယ်အခင်းကြောင့်

       ငြင်းရက်တယ်လေး။   ။

(နုယဉ် - အချိုးတွဲကဗျာ)

ရှေးစာကဗျာများ

ဒေါက်တာတင့်ဆွေ