ဆဲ့ နှင့် ဆယ့်

ကွန်မင့်ရေးသူတွေက အဆင့်အတန်း အမျိုးမျိုး။ ပညာရည် အမျိုးမျိုး။ ယဉ်ကျေးမှုအဆင့် အမျိုးမျိုး။ တချို့က အတော်ယဉ်ကျေးကြတယ်။ တချို့ကတော့ …

ကွန်မင့်တခု = ဗျည်းသုံးဆဲ့သုံးလုံး ဆယ့် လား ဆဲ့လား မြန်မာစာတွေကို အမှန်ဖြစ်အောင်ပြုပြင်ပေးချင်တဲ့သူတစ်ယောက်ဆိုရင် ကိုယ်ကိုယ်တိုင်က မြန်မာစာတတ်ဖို့လိုပါတယ်

ကွန်မင့်တခု = သုံးဆယ့်လား သုံးဆဲ့လား

ကွန်မင့်တခု = ဆဲ့ နဲ့ ဆယ့် ဘယ်ဟာအမှန်လဲ ဆရာ

(ပြည့်စုံအောင် စာရှည်ရှည်ရေးပါမည်။ မဖတ်လိုက ကျော်သွားကြစေလိုပါသည်။ တချို့က ခံတွင်းပျက်လည်း လျက်ဆားတတို့၊ ကင်ဆာလည်း လျက်ဆားတတို့သာ ရလိုကြသည်။)

တရာငါးဆဲ့ သုံးနှစ် အလွန်ရှိသော် အနှစ်နှစ်ထောင်သော သာသနာတော်သည် သမ္ပတ္တေ ရောက်လတ်သော်၊ ဧကသတ္တတျာဓိကနဝသတ သက္ကရာဇေ၊ ခုနစ်ဆယ့်တနှစ် အလွန်ရှိသော ကိုးရာသော သက္ကရာဇ်သည် ပရိပုဏ္ဏေ ပြည့်လတ်သော် -

မှတ်ရန်

ဆဲ့ နဲ့ ဆယ့် နှစ်မျိုးလုံးပါနေတယ်။

တရာလို့ ရေးတယ်။

တနှစ်လို့ ရေးတယ်။

နှစ်ထောင်လို့ ရေးတယ်။

ခုနစ်လို့ ရေးတယ်။

ရှင်မဟာသီလဝံသနဲ့ ရှင်မဟာရဋ္ဌသာရတို့ ရေးသားတဲ့ တန်တားဦးတည် မော်ကွန်း နှစ်စောင် စာအုပ်ထဲက ဖြစ်ပါတယ်။ ၁၉၆၅ ခုနှစ်မှာ ဟံသာဝတီတိုက်က ထုတ်တယ်။

ကွန်မင့်တခု = ဆဲ့ငါးခေါက်သာ သတ်ပုံ အမှန်အဖြစ် လေ့လာမိပါတယ်.

ဆယ့်ငါးလို့လည်း ရေးကြတာ ရှိပါတယ်။ ဆဲ့ ရော ဆယ့် ပါ ရေးခဲ့ကြတယ်။

(၁)

အထိန်းသံပေါက်လင်္ကာ

တနင်္လာကျား၊ တဆယ့်ငါး၊ နေငြားရှေ့ရပ်က။

ဇီဝကြွက်မျိုး၊ တဆယ့်ကိုး၊ စိုးလေအနောက်က။

ဂြိုဟ်သက်ပေါင်းလစ်၊ တရာ့ရှစ်၊ စင်စစ်မှတ်ကြကုန်။

(၂)

ခု ဆယ် ရာ ထောင် အခြေခံ

မြန်မာ ဂဏန်းသင်္ချာ၌ (ကာရန်မငဲ့က) တစ်မှ တဆယ်အထိ အသံတခုသာ ရသည်။

၁ (ဂဏန်း) = တစ် (အရေး) = တစ် (အသံထွက်)

၂ … နှစ် … နှစ်

၃ … သုံး … သုံး

၄ … လေး … လေး

၅ … ငါး … ငါး

၆ … ခြောက် … ခြောက်

၇ … ခုနစ် … ခုနစ်

၈ … ရှစ် … ရှစ်

၉ … ကိုး … ကိုး

၁၀ … တဆယ် … ဆယ်

၁၁ … တဆယ်တစ် … ဆယ့်တစ်

၁၂ … တဆယ်နှစ် … ဆယ့်နှစ်

၁၃ … တဆယ်သုံး … ဆယ့်သုံး

၁၄ … တဆယ်လေး … ဆယ့်လေး

၁၅ … တဆယ်ငါး … ဆယ့်ငါး

၁၆ … တဆယ်ခြောက် … ဆယ့်ခြောက်

၁၇ … တဆယ်ခုနစ် … ဆယ့်ခုနစ်

၁၈ … တဆယ်ရှစ် … ဆယ့်ရှစ်

၁၉ … တဆယ်ကိုး … ဆယ့်ကိုး

၂၀ … နှစ်ဆယ် … နှစ်ဆယ်

၂၁ … နှစ်ဆယ်တစ် … နှစ်ဆယ့်တစ်

၂၂ … နှစ်ဆယ်နှစ် … နှစ်ဆယ့်နှစ်

၃၀ … သုံးဆယ် … သုံးဆယ်

၄၀ … လေးဆယ် … လေးဆယ်

၅၀ … ငါးဆယ် … ငါးဆယ်

၁၀၀ … တရာ … တရာ

၂၀၀ … နှစ်ရာ … နှစ်ရာ

၁၀၀၀ … တထောင် တထောင်

ဖတ်ရွတ်ပုံ ဥပမာ-

လူ၊ ခွေး … နာမ်

ယောက်၊ ကောင် … မျိုးပြပစ္စည်း

တစ်၊ နှစ် … သင်္ချာ

ခွေး တကောင်

ခွေး နှစ်ကောင်

ခွေး သုံးကောင်

ခွေး … ၄ ၅ ၆ ၇ ၈ ၉ ကောင်

ခွေး ဆယ်ကောင်။

ခွေး ဆယ့်တကောင်

ခွေး ဆယ့်နှစ်ကောင်

ခွေး ဆယ့်သုံးကောင်

ခွေး … ၁၄၊ ၁၄၊ ၁၅၊ ၁၆၊ ၁၇၊ ၁၈ ကောင်

ခွေး ဆယ့်ကိုးကောင်

ခွေး အကောင် နှစ်ဆယ်

ခွေး အကောင် သုံးဆယ်

ခွေး အကောင် တရာ

ခွေး အကောင် တထောင်

တစ်မှ တဆယ်ထိ ဆယ်လုံးကား အသံတခုသာ ထွက်သည်။

တဆယ်မှ တဆယ့်ကိုး အထိ တ-အသံကို ဖျောက်၍ ရွတ်ရသည်။

၎င်းတွင် မျိုးပြပစ္စည်း တွဲလိုက သင်္ချာပုဒ်၏ အနောက်က ထားရသည်။

နှစ်ဆယ်က စ၍ ဆယ်ပြည့် ရာပြည့် ထောင်ပြည့် စသည်တို့ကား အသံနှစ်ခု ထွက်သည်။

မျိုးပြပစ္စည်းကို သင်္ချာပုဒ်၏ အရှေ့က ထားရပါသည်။

ခြားသီး သလ္လာ၊ ရှေ့ဧရာနှင့်

သီဒါမူးလယ်၊ မြန်တိုင်းကျယ်ကို

ဆန်းကြယ်ညာဏ်ရှု၊ လက်နက်ပြု၍

ငါးခု စွန်းဆောင်၊ ဆယ်ရာထောင်ဝယ်

မြန်ဘောင်ဦးစွန်း၊ ကျုံးမြို့နန်းနှင့်

နတ်ကွန်း ပဟိုရ်၊ ရွှေချက်သိုက

ရေညိုမြဟန်၊ နန္ဒာကန်ကို

လျှင်ထန်မရှည်၊ ဘိုးတော်တည်သည်

အောင်စည်တည့် ရိုက်ကြွေး သိကြားတွေး။ ။ (ပလိပ်စားဧချင်း)

(၃)

ပရမတ္ထသံခိပ်ကျမ်း

စာမျက်နှာ ၁၀

တဆဲ့ကိုးဖြာ

စာမျက်နှာ ၂၇

တဆဲ့ကိုး

တဆယ် အာဒိ

ခုခေတ်မှာ တဆယ်၊ တရာ၊ တထောင်၊ တသောင်း၊ တသိန်းကို စသတ်နေကြပြီ။ မကြာမီမှာ တနင်္ဂနွေ၊ တနင်္လာ ထဲက တဝမ်းပူတွေကို စသတ်ကြတာ့မည်။ ပုံအတွက် ကျေးဇူး။ ပညာနဲ့ မထိန်းသော၊ အထက်အမိန့်နဲ့သာ ထိန်းသော မြန်မာစာ။

ဂဏန်းသင်္ချာ အမြန်တွက်နည်း

ကမာ္ဘပေါ်တွင် တခုတည်းသောကျောင်း ဖြစ်ဘွယ်ရှိသည်။

သင်ကြားလေ့လာပြီးသည်နှင့် တပြိုင်နက် -

ထူးချွန်သူတဦး

တနှစ်ကြာမျှ

တဆယ့်တစ်

သည့်အမှုတခု

တကယ့်လက်တွေ့

စံနစ်တခု

ဆယ်နှစ်အရွယ် ကလေးတယောက်အား

အခြားတဘက်စွန်း၌မူ

ယခုတဖန်

တဖြည်းဖြည်းနှင့်

တမင်သက်သက်

ထပ်တန်းအရာရှိကြီးတဦးက

ထွက်ပြေးလွတ်မြောက်ရန် တဖန်စီစဉ်ပြန်လေသည်

စာရွက်စာတမ်းတစုံတရာမျှသော်၎င်း

နောက်တကြိမ်ထပ်မံ၍

မြန်မာစာသတ်ပုံမှန်စဉ်က သင်္ချာလည်း မှန်ခဲ့သည်။ ယခုသော် ၁၀၀ သည် တရာမဟုတ်စေရတဲ့။ တပြိုင်နက်ဟူသည် စမသတ်သဖြင့် ဖြူ၏တဲ့။

(၄)

သဒ္ဒါငယ်တဆဲ့ခြောက်စောင်၊ ပါဋ္ဌ်

အရှင်မဟာကစ္စည်းထေရ်မြတ်

မြန်မာသံတော်ဆင့်မီးစက်ပုံနှိပ်တိုက်

ကာရန်ကြီး တဆဲ့ခြောက်ပါး https://www.facebook.com/photo/?fbid=573419794814906&set=pcb.573420171481535

(၅)

အောင်ဆန်းဇာနည်

ဖေဖော်ဝါရီ ဆဲ့သုံးမှာ ဗိုလ်ချုပ်မွေးနေ့ပါ

တထောင့်ကိုးရာ တဆဲ့ငါး ရှေ့နေ ဦးဖာသား

ဇာတိနတ်မောက် မကွေးခရိုင်

သိကြများခုတိုင်၊

ကြံ့ကြံ့ခိုင်တဲ့ ဇာနည်ဘွား

မိခင်ဒေါ်စုသား။

တထောင့်ကိုးရာ လေးဆဲ့ခွန်

ပြောင်းကြွ တမလွန်၊

မျက်ရည်သွန်လို့ ဘဝင်ညှိုး

ဇူလိုင် တဆဲ့ကိုး။

ပြည်ထောင်စုရဲ့ ကျေးဇူးရှင်

ဗိုလ်ချုပ် ဒို့ဖခင်၊

ကောင်းစေချင်တဲ့ မှာစကား

ငါတို့ မမေ့သား။

ပြည်ထောင်လွတ်ရေး ကြိုးပမ်းအောင်

ပြည်ချစ် ဒို့ခေါင်းဆောင်၊

ဆိုရှယ်လစ်ဘောင် လမ်းစဉ်များ

ဗိုလ်ချုပ် ချမှတ်သွား။ (ဆိုရှယ်လစ်စာလုံး ဖြေရှင်းချက် တင်ပြထားပြီး။)

ဒေါက်တာတင့်ဆွေ