မုန်းထားမလို၊ ချစ်ကြည်ညို၍ လူဗိုလ်တကာ၊ ရိုသေရာသည်

တဆယ့်လေးဖြာ၊ ဆင်းတန်ဆာကား

၁။ ရာဇာဘုန်းရှိ၊ ပြည်လုံးမိကို၊
နီတိကျမ်းလျှင်၊ တန်းဆာဆင်၏။
၂။ ဂုဏ်အင်အထူး၊
ကျေးဇူးရှိသူ၊ ထိုထိုလူကို၊
မပြူ ဒေါသ၊ မာန် မထဘဲ
နှိမ့်ချခြင်းလျှင်၊ တန်းဆာဆင်၏။
၃။ ရုပ်သွင်ပျိုထွား၊ မိန်းမအားမူ
တည်ငြားစောင့်ရှောက်၊ ယွင်းမဖောက်ဘဲ
ရှက်ကြောက်ခြင်းလျှင်၊ တန်းဆာဆင်၏။
၄။ လင်နှင့်မယား၊ သူတို့အားမူ
မုန်းထား မလို၊ ချစ်ကြည်ညို၍
လူဗိုလ်တကာ၊ ရိုသေရာသည်၊
သစ္စာခိုင်ကြည်၊ တည်ကြည်ခြင်းလျှင်
တန်းဆာဆင်၏။
၅။ ဝန်းကျင်သာကျယ်၊ အိမ်မှာဝယ်ကား
သူငယ်သာလျှင်၊ တန်းဆာဆင်၏။
၆။ ကျယ်မြင်နှံ့သိ၊ ပညာရှိမူ
ကဝိပျူငှါ၊ ဆန်းဂါထာနှင့်
ကဗျာသံချို၊ ဖွဲ့ဆိုခြင်းလျှင်
တန်းဆာဆင်၏။
၇။ နှုတ်မင်္ဂလာ၊ စကားမှာကား
အသာအချို၊ သူနာလိုအောင်၊
မိန့်ဆိုခြင်းလျှင်၊ တန်းဆာဆင်၏။
၈။ သန့်စင်ကြည်ဖြူ၊ ကိုယ်ကိုမူကား
ဆံမြူခြမ်းမျှ၊ ဒေါသမသင့်၊
အကျင့်သီတင်း၊ ကောင်းခြင်းသည်လျှင်
တန်းဆာဆင်၏။
၉။ ရွယ်အင်လွန်သူ၊ မိန်းမမူကား
မူယူဆိပ်ငြိမ်၊ မွေ့သိမ်ခြင်းလျှင်
တန်းဆာဆင်၏။
၁၀။ ပျော်ရွှင်စေလို၊ နှလုံးကိုမူ
ကုသိုလ်ကောင်းမှု၊ မကောင်းမှုဟု
နှစ်ခုရောရာ၊ အာသာစုံမက်
နှစ်သက်မူးမော်၊ မွှေ့လျော်ခြင်းလျှင်
တန်းဆာဆင်၏။
၁၁။ ဂုဏ်အင်မချို့၊ ရဟန်းတို့မူ
နောက်ဘို့ရွယ်ရည်း၊ သည်းညည်းခံချုပ်
ကြည်ဖွယ်လုပ်သား၊ သာရုပ္ပလျှင်
တန်းဆာဆင်၏။
၁၂။ အားအင်ထက်မြန်၊ စွမ်းသန်သသူ
ထိုထိုလူကို၊ မယူရန်တုံ့
မလှုံ့ရန်ကြွင်း၊ သည်းခံခြင်းနှင့်
မပျင်းကျိုးကုတ်၊ အားစုတ်စုတ်တိ
တုပ်ဝပ်ခြင်းလျှင်၊ တန်းဆာဆင်၏။
၁၃။ လူတွင်အိမ်ရာ၊ ထောင်သူမှာကား
ဥစ္စာရွှေငွေ၊ ဆန်ရေစပါး
ကျွဲနွားကျေးကျွန်၊ သာမြေးကုံလုံ
ပြည့်စုံခြင်းလျှင်၊ တန်းဆာဆင်၏။
၁၄။ ကျယ်မြင်ပညာ၊ သူကောင်းမှာကား
ပါယ်ရွာကြောက်ရှက်၊ ရမက်ဆွံ့ရှား
စကား မယွင်း၊ မှန်ခြင်းသည်လျှင်
တန်းဆာဆင်သည်။
လူတွင်နိမ့်မြင့်သို့မှတင့်။ ။
သာရုပ္ပ(သရူပ+ဏျ)(တိ)လျောက်ပတ်သည်။
(န)လျောက်ပတ်ခြင်း။ တင့်တယ်ခြင်း။ (စိန္တကျော်သူ ဦးသြ)
ဒေါက်တာတင့်ဆွေ